ខេត្តកំពង់ឆ្នាំង ៖ ព័ត៌មានដែលទទួលបានបឋមឲ្យដឹងថា ក្មេងស្ទាវចំនួន៨នាក់បានត្រូវនគរបាលខេត្ត ស្រុក និងក្រុង សហការគ្នាដាក់កម្លាំងពួនស្ទាក់ចាប់បានជាបន្តបន្ទាប់ និងនាំមកកាន់ស្នងការដ្ឋាននគរបាលខេត្ត ពាក់ព័ន្ធនឹងការគប់កញ្ចក់រថយន្តតាមផ្លូវជាតិលេខ៥ ។…
ខេត្តកំពង់ឆ្នាំង ៖ ព័ត៌មានដែលទទួលបានបឋមឲ្យដឹងថា ក្មេងស្ទាវចំនួន៨នាក់បានត្រូវនគរបាលខេត្ត ស្រុក និងក្រុង សហការគ្នាដាក់កម្លាំងពួនស្ទាក់ចាប់បានជាបន្តបន្ទាប់ និងនាំមកកាន់ស្នងការដ្ឋាននគរបាលខេត្ត ពាក់ព័ន្ធនឹងការគប់កញ្ចក់រថយន្តតាមផ្លូវជាតិលេខ៥ ។
លោកឧត្តមសេនីយ៍ទោ ឡុច វណ្ណារ៉ា ស្នងការនគរបាលខេត្ត បានឲ្យដឹងថា មានព័ត៌មានប៉ុន្មានថ្ងៃនេះថា មានក្មេងស្ទាវមួយក្រុមតែងតែពួនស្ទាក់ និងខ្លះជិះម៉ូតូដេញគប់កញ្ចក់រថយន្តតាមផ្លូវជាតិលេខ៥ ចាប់ពីភូមិត្រពាំងអញ្ចាញ ឃុំស្វាយជ្រំ ស្រុករលាប្អៀរ រហូតទៅដល់ភូមិថ្មី ឃុំផ្សារ ស្រុកបរិបូណ៌ បណ្តាលឲ្យខូចខាតអស់រថយន្តជាច្រើនគ្រឿង និងកាលពីយប់ថ្ងៃទី១២ ខែវិច្ឆិកា ក្រុមក្មេងទាំងនោះបានធ្វើសកម្មភាពគប់កញ្ចក់រថយន្តបណ្តាលឲ្យបែក២កន្លែង និងរងរបួសបែកក្បាលអ្នកបើកបររថយន្តម្នាក់ផងដែរ។
លោកស្នងការថា បន្ទាប់ពីមានសេចក្តីរាយការណ៍និងបណ្តឹងតាមទូរស័ព្ទពីជនរងគ្រោះជាម្ចាស់រថយន្ត ដែលតាមការប្រមាណមានចំនួនជាង២០គ្រឿងតែក្នុងរយៈពេលតែ២យប់ប៉ុណ្ណោះលោកក៏បានទទួលការណែនាំពីប្រធានគណៈបញ្ជាការឯកភាពខេត្ត ហើយបញ្ជាឲ្យកម្លាំងតាមគោលដៅសហការគ្នាចាប់តាំងពីក្រុងកំពង់ឆ្នាំង រហូតដល់ស្រុកបរិបូណ៌ ដើម្បីពួនស្ទាក់ ចាប់ក្រុមក្មេងទំនើងទាំងនេះ ដោយមិនត្រូវទុកឲ្យបង្កភាពអសន្តិសុខដល់សង្គមបែបនេះឡើយ។
ជាលទ្ធផល នាយប់ថ្ងៃទី១៣ ខែវិច្ឆិកា កម្លាំងនគរបាលស្ទាក់ចាប់បានជនដៃដល់ចំនួន៣នាក់ ដែលកំពុងធ្វើសកម្មភាពគប់កញ្ចក់រថយន្តនៅចំណុចផ្សារបរិបូណ៌ ហើយនាំយកមកសាកសួរ ។ លុះនៅថ្ងៃទី១៤ ខែវិច្ឆិកា ចាប់ខ្លួនបាន៥នាក់ទៀត សរុបទាំងអស់៨នាក់ ដើម្បីយកមកផ្ដន្ទាទោសទៅតាមផ្លូវច្បាប់ ។
ជនដៃដល់ទាំង៨នាក់នេះមាន ១-ឈ្មោះ សេង ហាន អាយុ២០ឆ្នាំ ២-ឈ្មោះ អុំ ចន អាយុ២០ឆ្នាំ ៣-ឈ្មោះ យឿន ចាន់ឌី អាយុ១៨ឆ្នាំ ៤-ឈ្មោះ សៀន សារ៉ាត់ អាយុ១៦ឆ្នាំ ៥-ឈ្មោះ ម៉ាល់ ចាន់រ៉ុង អាយុ១៧ឆ្នាំ ៦-ឈ្មោះ ហ៊ន សុខចាន់ អាយុ២៧ឆ្នាំ ៧-ឈ្មោះ ឌឿន សីហា អាយុ១៧ឆ្នាំ និង៨-ឈ្មោះ ខាំ ឈាងម៉ាលី អាយុ២០ឆ្នាំ ។ ជនទាំង៨នាក់មានទីលំនៅក្នុងស្រុកបរិបូណ៌ ហើយក្រោយពីចាប់ឃាត់ខ្លួនរួមជាមួយវត្ថុតាង ក៏បានកសាងសំណុំរឿងបញ្ជូនទៅសាលាដំបូងខេត្ត ។
លោកស្នងការនគរបាលខេត្ត បានអំពាវនាវដល់ម្ចាស់រថយន្តទាំងអស់ សូមអញ្ជើញមកមកដាក់ពាក្យប្តឹងនៅស្នងការដ្ឋានតាមផ្លូវច្បាប់ ៕
ចែករំលែកព័តមាននេះ