ខេត្តកំពត ៖ ប្រជាពលរដ្ឋដណ្ដើមគ្នាសង់តូបនៅលើដីសហគមន៍ព្រៃកោងកាង គឺជាដីសហគមន៍ព្រៃកោងកាងមួយកន្លែងនៅជាប់មាត់សមុទ្រដែលគេប៉ាន៉ប្រមាណថា ជាប់10ហិតាស្ថិតនៅឃុំព្រែកត្នោត ស្រុកទឹកឈូ ខេត្តកំពត។ ដីសហគមន៍ដែលលាតសន្ធឹងតាមឆ្នេរសមុទ្រមួយនេះ ប្រជាពលរដ្ឋបានពឹងផ្អែកទាំងស្រុងលើផលនេសាទមានបង្គារ ត្រី…
ខេត្តកំពត ៖ ប្រជាពលរដ្ឋដណ្ដើមគ្នាសង់តូបនៅលើដីសហគមន៍ព្រៃកោងកាង គឺជាដីសហគមន៍ព្រៃកោងកាងមួយកន្លែងនៅជាប់មាត់សមុទ្រដែលគេប៉ាន៉ប្រមាណថា ជាប់10ហិតាស្ថិតនៅឃុំព្រែកត្នោត ស្រុកទឹកឈូ ខេត្តកំពត។
ដីសហគមន៍ដែលលាតសន្ធឹងតាមឆ្នេរសមុទ្រមួយនេះ ប្រជាពលរដ្ឋបានពឹងផ្អែកទាំងស្រុងលើផលនេសាទមានបង្គារ ត្រី ក្ដាមជាដើម ប៉ុន្តែនៅដើមខែវិច្ឆិកានេះ ពលរដ្ឋនៅក្នុងសហគមន៍បាននាំគ្នាសំរុកទៅសង់តូបរបៀបជាផ្ទះស្នាក់នៅបាន។ ភ្លាមៗនោះអាជ្ញាធរស្រុកទឹកឈូរួមទាំងលោក ស សូរិន នាយខណ្ឌរដ្ឋបាលជលផលខេត្ត បានចុះទៅហាមឃាត់ពួកអ្នកសហគមន៍មិនឱ្យសាងសង់លើដីព្រៃលិចទឹកបន្តទេ។
បងស្រី ង៉ែត ញ៉ាញ់ អាយុ55ឆ្នាំ នៅភូមិចង្ហោន ឃុំព្រែកត្នោត បាននិយាយប្រាប់អ្នកយកព័ត៌មានឱ្យដឹងកាលពីព្រឹកថ្ងៃទី12 វិច្ឆិកាថា ប្រជាពលរដ្ឋនៅឃុំព្រែកត្នោតភាគច្រើនមិនមានដីស្រែសម្រាប់ធ្វើស្រែទេ ពួកគាត់ជាទូទៅមានមុខរបរជាអ្នកនេសាទ។ បងស្រីនិយាយប្រាប់បន្តថា ជាពិសេសដីសហគមន៍ដែលមានព្រៃកោងកាងនោះ គឺសំបូរទៅដោយធនធានធម្មជាតិណាស់ ពេលទឹកនាចកូនបង្គារ មឹក ត្រី ក្ដាម អាចរកបានដោយងាយ។
បងស្រីខាងលើនិយាយបន្តទៀតថា ពាក់ព័ន្ធនឹងពលរដ្ឋនាំគ្នាសង់តូបម្នាក់មួយៗលើដីសហគមន៍នោះ ដោយសារតែឮពាក្យល្ហៀកល្ហៀងថា ដីព្រៃកោងកាងរបស់សហគមន៍ចង្ហោននោះធ្លាក់ទៅលើដៃឧកញ៉ាទៀតទៅហើយ ។ មួយទៀតថា ក្រុមហ៊ុនចិនជាអ្នកយក។
បងស្រីនិយាយថា កន្លងមក វាមានរឿងរួចទៅហើយដែលមានគេយកដីសហគមន៍អ្នកនេសាទ។ បើមានមេរៀនរួចទៅហើយ ទើបពួកគាត់មកសង់តូបដូចចាំដីផង បើរដ្ឋត្រូវការយកវិញទៅមិនចាំបាច់ប្ដឹងពួកគាត់ទៅតុលារធ្វើអី បើគេចាក់លប់សមុទ្ររាប់ខែឆ្នាំទៅហើយ ម៉េចមិនប្ដឹងគេទៅ។
លោក ស សូរិន នាយខណ្ឌរដ្ឋបាលជលផលខេត្តកំពតកាលពីម្សិលមិញបានថ្លែងប្រាប់អោយដឹងថា តូបរបៀបជាផ្ទះសាងសង់លើដីសហគមន៍ព្រៃលិចទឹកនៅចង្ហោនមានចំនួន51កន្លែង។ លោក ស សូរិន បានអះអាងថា សំណុំរឿងសង់តូបលើដីសហគមន៍នោះ ខាងជំនាញបានដាក់ចូលដល់តុលាខេត្តកំពតហើយ។
ចែករំលែកព័តមាននេះ