រាជធានីភ្នំពេញ ៖ យុវជន២នាក់ជិះម៉ូតូមួយគ្រឿងម៉ាកស៊ុយហ្ស៊ុយគីឡែត ទើបតែចេញមកពីក្លឹបបើកយ៉ាងលឿន ហើយដេញតាមម៉ូតូមួយគ្រឿងទៀតម៉ាកហុងដាឌ្រីមជិះគ្នា៣នាក់ (ប្រុស២នាក់និងស្រីម្នាក់) ហើយស្រែកថា «ចោរៗ» ជ្រុលទៅបុករថយន្តកាមរីបាឡែនចំពីមុខពេញទំហឹង បណ្តាលអោយរងរបួសធ្ងន់២នាក់ និងស្រាលម្នាក់ ។
ហេតុការណ៍នេះបានកើតឡើងកាលពីវេលាម៉ោង១២និង១០នាទីរំលងអាធាត្រឈានចូលថ្ងៃទី១៤ ខែវិច្ឆិកា ឆ្នាំ២០១៨ តាមបណ្តោយផ្លូវព្រះនរោត្តម នៅចំណុចមុខផ្ទះសម្តេចក្រឡាហោម ស ខេង ស្ថិតនៅក្នុងសង្កាត់ចតុមុខ ខណ្ឌដូនពេញ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញយុវជន២នាក់ជិះម៉ូតូមួយគ្រឿងម៉ាកស៊ុយហ្ស៊ុយគីឡែត ពណ៌ប្រផេះ ពាក់ស្លាកលេខ ភ្នំពេញ ១CY-០៥៩០បើកបរតាមបណ្តោយផ្លូវព្រះនរោត្តមក្នុងទិសដៅពីត្បូងទៅជើងក្នុងល្បឿនយ៉ាងលឿនជិះដេញតាមម៉ូតូមួយគ្រឿងទៀតម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ កណ្តាល ១P-៨៣៧៧ បើកបរស្របទិសដៅគ្នា ។
ប្រភពដដែលបានបន្តថា ភាគីខាងម៉ូតូស៊ុយសុគីឡែតនោះដេញតាមពីក្រោយហើយស្រែកថាចោរទើបម៉ូតូហុងដាឌ្រីមភ័យស្លន់ស្លោកពេកក៏រេចង្កូតជ្រុលទៅបុករថយន្តមួយគ្រឿងម៉ាកកាមរីបាឡែន ពណ៌ស្ករ ពាក់ស្លាកលេខ ភ្នំពេញ ២AB-៩៧៤៩ បើកបរតាមបណ្តោយផ្លូវព្រះនរោត្តមទិសដៅពីជើងទៅត្បូងត្រូវហុងដាឌ្រីមបុកយ៉ាងពេញទំហឹងបណ្តាលអោយរថយន្តរងការខូចខាតខ្ទេចអស់មួយកំណាត់ខាងមុខផ្នែកខាងឆ្វេង រីឯម៉ូតូហុងដាឌ្រីមវិញរងការខូចខាតវៀចកង់មុខនឹងដាច់ស្លាកលេខ ។
ចំណែកម៉ូតូម៉ាកស៊ុយហ្ស៊ុយគីឡែតនោះវិញ ពេលដែលឃើញជនរងគ្រោះ២នាក់រងរបួសហើយបំរុងនឹងឈប់ម៉ូតូចុះវាយម៉ូតូជនរងគ្រោះទៀត តែបានសមត្ថកិច្ចប្រចាំគោលដៅមុខផ្ទះសម្តេចក្រឡាហោម ស ខេង ជួយអន្តរាគមន៍ ទើបឃាត់ខ្លួនបានម្នាក់យកទៅប៉ុស្តិ៍ចតុមុខភ្លាមៗផងដែរ ។
បន្ទាប់ពីកើតហេតុ រថយន្តសង្គ្រោះរបស់គ្លីនិកឯកជនបានមកដឹកយកជនរងគ្រោះទៅព្យាបាល ចំណែកឯជនសង្ស័យដែលសមត្ថកិច្ចឃាត់យកទៅប៉ុស្តិ៍គឺសារភាពប្រាប់ថាខ្លួនទើបតែចេញមកពីក្លឹបម្តុំចាក់អង្រែក្រោម ក្នុហគោលបំណងជិះទៅផ្ទះនៅឯចាក់អង្រែលើ ប៉ុន្តែកំពុងតែជិះតាមផ្លូវក៏ត្រូវគេលួចវាយមួយមួកសុវត្ថិភាព ហើយភាគីខាងម៉ូតូស៊ុយហ្ស៊ុយគីឡែត ខឹងក៏ដេញវាយគេតែម្តង ។
ក្រោយពេលកើតហេតុ ខាងរថយន្តម្ចាស់រថយន្តតាក់ស៊ីមិនចង់អោយមានរឿងរាវច្រើនក៏សុខចិត្តយករថយន្តយកទៅជួសជុលដោយខ្លួនឯង ចំណែកជនបង្កវិញត្រូវបានសមត្ថកិច្ចកសាងសំណុំចាត់ការទៅតាមនីតិវិធី ៕
ចែករំលែកព័តមាននេះ