ប្រយោជន៍បច្ចុប្បន្នលោកសំដៅដល់បុគ្គលដែលចេះរកទ្រព្យសម្បត្តិ ចេះទុកដាក់ថែរក្សាទ្រព្យ និងការចេះចាយវាយទ្រព្យសម្បត្តិឱ្យសមទៅនឹងឋានៈតួនាទីរបស់ខ្លួន។ ខាងក្រោមនេះជាលក្ខណៈ៤យ៉ាងដែលបុគ្គលគួរយកមកអនុវត្តដើម្បីឱ្យកើតជាប្រាក់ជាទ្រព្យសម្បត្តិ៖
១-កិច្ចប្រឹងប្រែងរកទ្រព្យសម្បត្តិ គឺជាកាតព្វកិច្ចដ៏សំខាន់សម្រាប់មនុស្សម្នាក់ៗ ទ្រព្យសម្បត្តិមិនអាចកើតមានដល់មនុស្សខ្ជិលច្រអូសបានឡើយ ដូចបុរាណបានពោលថា ចេះពីរៀនមានពីរក ។
២-ការថែរក្សាទ្រព្យដែលរកបានមកឲ្យគង់វង្សល្អ បានដល់ការចេះសន្សំសំចៃទ្រព្យទុក ឱ្យផុតពីសេចក្ដីអន្តរាយផ្សេងៗ ហើយចេះកែខៃរកផលកម្រៃអំពីទ្រព្យនោះទៀតផង។ តាមធម្មតាក្នុងប្រទេសនីមួយៗ គេតែងមានកន្លែងផ្ញើប្រាក់ ដែលហៅថាធនាគារ ដើម្បីឱ្យប្រជាជនចេះ សន្សំទ្រព្យសម្បត្តិ ហើយបានថ្លៃការអំពីប្រាក់ទាំងនោះបន្ថែមទៀត ។
៣-ការជ្រើសរើសមិត្ត គឺជាការជ្រើសរើសផ្លូវដើរសម្រាប់ជីវិត បើសេពគប់មិត្តអាក្រក់រមែងនាំមកនូវសេចក្ដីវិនាស តែបើសេពគប់មិត្តល្អ នឹងមានសេចក្ដីសុខចម្រើនកើនប្រយោជន៍ ព្រោះមិត្តល្អគេអាចជួយពន្យល់ពីវិធីស្វែងរកសេចក្ដីសុខចម្រើន ទាំងផ្នែកទ្រព្យសម្បត្តិ ទាំងផ្នែកគំនិតប្រាជ្ញាស្មារតី គេស្ទាត់ជំនាញក្នុងកិច្ចការណា គេនឹងជួយពន្យល់មិត្តក្នុងកិច្ចការនោះមិនខាន ។
៤-ការចេះចាយវាយឲ្យសមនឹងឋានៈរបស់ខ្លួន បានសេចក្ដីថា ការចាយវាយមិនឲ្យ លើសចំនួនទ្រព្យដែលមានបើរកបានតិចចាយតាមតិច បើរកបានច្រើនកុំភ្លើតភ្លើនចាយទាល់តែអស់ប្រាក់ ត្រូវវៀរចាកការចំណាយណាដែលគ្មានការចាំបាច់ឬគ្មានប្រយោជន៍ និងត្រូវចេះសំចៃទុកខ្លះសម្រាប់ពេល ណាដែលរកទ្រព្យមិនបានឬមានគ្រោះថ្នាក់ផ្សេងៗមានជំងឺតម្កាត់ជាដើម យកប្រាក់នោះមកប្រើប្រាស់ ។
បុគ្គលណាវៃឆ្លាតក្នុងកិច្ចការទាំងបួននេះឱ្យប្រាកដ បុគ្គលនោះនឹងបានជាអ្នករស់នៅបរិបូរដោយទ្រព្យសម្បត្តិ និងសុខចម្រើនពេញមួយជីវិត។
ចែករំលែកព័តមាននេះ