ខេត្តកំពង់ស្ពឺ ៖ យ៉ាងហោចណាស់មនុស្ស៤នាក់ទាំងអ្នកបង្ក និងអ្នករងគ្រោះបានរងរបួសធ្ងន់និងស្រាល បន្ទាប់ពីភាគីបង្កបើកបរម៉ូតូក្នុងស្ថានភាពស្រវឹងជោកជាំទៅបុកភាគីម្ខាងទៀតពេញទំហឹងដួលរដូករណែលពេញផ្លូវ ។
ក្រោយកើតហេតុសមត្ថកិច្ចបានបញ្ជូនអ្នករបួសទាំងអស់ទៅកាន់មន្ទីរពេទ្យភ្លាមៗផងដែរ ចំពោះរឿងខុស និងត្រូវរង់ចាំដោះស្រាយគ្នានៅពេលក្រោយ ។ ហេតុការណ៍គ្រោះថ្នាក់ចរាចរណ៍នេះកើតឡើង កាលពីវេលាម៉ោង១៨និង៤០នាទីថ្ងៃទី១៣ ខែវិច្ឆិកា ឆ្នាំ២០១៨ នៅលើផ្លូវជាតិលេខ៤៤ ចន្លោះគីឡូម៉ែតលេខ៨០-៨១ ស្ថិតក្នុងភូមិអូរអង្គុំ ឃុំអមលាំង ស្រុកថ្ពង ខេត្តកំពង់ស្ពឺ ។
ភាគីបង្កម៉ូតូម៉ាកស្មាក់គ្មានអាវគ្មានស្លាកលេខគ្មានភ្លើងជិះគ្នា២នាក់ បើកក្នុងទិសដៅពីលិច ទៅកើតអ្នកបើកឈ្មោះ ឡុក លឿន (ហៅអាពូថៅ) ភេទប្រុស អាយុ៤៧ឆ្នាំ រស់នៅភូមិគោគ ឃុំអមលាំង ស្រុកថ្ពង គ្មានមួកសុវត្ថិភាព រងរបួសស្រាល និងអ្នករួមដំណើរឈ្មោះ សុង ពុធ ភេទប្រុស អាយុ៣៧ឆ្នាំ នៅភូមិវាលលៀង ឃុំក្បាលទឹក ស្រុកទឹកផុស ខេត្តកំពង់ឆ្នាំង គ្មានមួក រងរបួសធ្ងន់ទាំង២នាក់ ។
ចំណែកភាគីម្ខាងទៀតម៉ាក C125 ពណ៌ខ្មៅសេរី ២០១៥ ពាក់ស្លាកលេខកំពង់ស្ពឺ 1G- 26 68 បើកបរដោយឈ្មោះ ឈឺន ចាន់រ៉ា ភេទប្រុស អាយុ២៦ឆ្នាំ នៅភូមិក្រាំចំបក់ ឃុំអមលាំង ស្រុកថ្ពង ខេត្តកំពង់ស្ពឺ គ្មានមួករងរបួសធ្ងន់ បញ្ជូនទៅពេទ្យកំពង់ស្ពឺ និងអ្នករួមដំណើរ ឈ្មោះ គែល សារ៉ាត់ ភេទប្រុស អាយុ២៩ ឆ្នាំ នៅភូមិឃុំជាមួយគ្នា គ្មានមួករងរបួសស្រាល ។
ប្រភពពីសមត្ថកិច្ចបានឲ្យដឹងថា មុនពេលកើតហេតុគេបានឃើញភាគីម៉ូតូស្មាសបើកបរក្នុងស្ថានភាពស្រវឹង ហើយម៉ូតូអត់មានភ្លើងបំភ្លឺផ្លូវទៀត លុះដល់ចំណុចកើតហេតុ ស្រាប់តែរេចង្កូតទៅបុកសេ១២៥ ដែលជិះបញ្ច្រាសទិសគ្នាយ៉ាងពេញទំហឹង បណ្តាលឲ្យដួលរដូករណែលពេញផ្លូវតែម្តង ។ ប្រភពបន្តថា ភាគីបង្កម៉ូតូម៉ាកស្មាក់គ្មានអាវគ្មានស្លាកលេខគ្មានភ្លើង ជិះគ្នា២នាក់ បើកក្នុងទិសដៅពីលិចទៅកើត ក្នុងស្ថានភាពស្រវឹងស្រា ពេលបើកបរមកដល់ចំណុចកើតហេតុខាងលើបានរេចង្កូតទៅបុកម៉ូតូ១គ្រឿងម៉ាក C125 ពណ៌ខ្មៅសេរី ២០១៥ ពាក់ស្លាកលេខកំពង់ស្ពឺ 1G -2668 បណ្តាលឲ្យរងរបួសជាទម្ងន់ ។
ក្រោយកើតហេតុសមត្ថកិច្ចបានចុះធ្វើកំណត់ហេតុ និងបញ្ជូនអ្នករងរបួសទាំងអស់ទៅកាន់ពេទ្យកំពង់ស្ពឺ ដើម្បីជួយសង្គ្រោះ ។ ចំណែកម៉ូតូទាំង២ខូចខាតស្រាលសមត្ថកិច្ចជំនាញបានយកមករក្សារទុកនៅអធិការនគរបាលស្រុកថ្ពង ដើម្បីចាត់ការតាមនីតិវិធីនៅពេលក្រោយ៕
ចែករំលែកព័តមាននេះ