រាជធានីភ្នំពេញ ៖ បើទោះជាទុនវិនិយោគក្នុងវិស័យសំណង់នៅរយៈពេល៣ត្រីមាសឆ្នាំ ២០១៨នេះហាក់មានកំណើនថមថយបន្តិចក្ដី ប៉ុន្តែបើមើលពីសក្ដានុពល និងឱកាសវិនិយោគនៅតែមានភាពល្អប្រសើរដដែល ធៀបនឹងប្រទេសជិតខាង ដែលធ្វើឲ្យតម្រូវការអ្នកជំនាញនៅក្នុងវិស័យនៅតែមានសម្រាប់ការអភិវឌ្ឍ។ បើតាមលោក គុយ…
រាជធានីភ្នំពេញ ៖ បើទោះជាទុនវិនិយោគក្នុងវិស័យសំណង់នៅរយៈពេល៣ត្រីមាសឆ្នាំ ២០១៨នេះហាក់មានកំណើនថមថយបន្តិចក្ដី ប៉ុន្តែបើមើលពីសក្ដានុពល និងឱកាសវិនិយោគនៅតែមានភាពល្អប្រសើរដដែល ធៀបនឹងប្រទេសជិតខាង ដែលធ្វើឲ្យតម្រូវការអ្នកជំនាញនៅក្នុងវិស័យនៅតែមានសម្រាប់ការអភិវឌ្ឍ។
បើតាមលោក គុយ វ៉ាត អ្នកជំនាញអចលនទ្រព្យ បានមានប្រសាសន៍ថា ចង់ឲ្យមានការវិនិយោគដោយយូរអង្វែងនៅក្នុងប្រទេសកម្ពុជា ចាំបាច់ត្រូវមានការផ្ដល់សេវាកម្មល្អប្រសើរទៅកាន់វិនិយោគិនដែលបានឈានជើងដល់កម្ពុជា ដូច្នេះសក្ដានុពលនៃអ្នកជំនាញ ដែលមានចំណេះដឹងក្នុងវិស័យអចលនទ្រព្យ គឺជារឿងចាំបាច់ណាស់ដែលត្រូវតែបណ្ដុះបណ្ដាលបន្ថែមទៀតដល់ធនធានមនុស្សកម្ពុជា ។ លោកបន្តថា ៖« ដើម្បីផ្ដល់សេវាកម្មជូនទៅវិនិយោគិនឲ្យបានល្អបំផុតនោះ គឺត្រូវការឲ្យធនធានមនុស្សរបស់កម្ពុជាយើងចូលរួមធ្វើការងារជាក្រុម ក្នុងគោលដៅជំរុញការអភិវឌ្ឍវិស័យអលនទ្រព្យ សំណង់ឲ្យកាន់តែល្អប្រសើរ នៅពេលអនាគតដ៏ខ្លីខាងមុខនេះ » ។
លោក ខន គង្គា អគ្គនាយកប្រតិបត្តិក្រុមហ៊ុនវាយតម្លៃនិងភ្នាក់ងារអចលនទ្រព្យ អុីអរអេ ( ERA ) បានឲ្យដឹងថា បច្ចុប្បន្ននេះទីផ្សារអចលនទ្រព្យនៅក្នុងប្រទេសកម្ពុជា ត្រូវការធនធានជំនាញក្នុងវិស័យអចលនទ្រព្យរាប់ម៉ឺននាក់ដើម្បីចូលរួមចំណែកក្នុងការលក់ និងប្រឹក្សាយោបល់ទៅអ្នកអភិវឌ្ឍន៍ក្នុង និងក្រៅប្រទេស ជាពិសេសអ្នកអភិវឌ្ឍន៍ដែលមកពីបណ្ដាប្រទេសនានាជុំវិញសាកលលោក ព្រោះថាកាលណាអ្នកជំនាញ និងធនធានមនុស្សនៅក្នុងវិស័យនេះកាន់តែច្រើន វាកាន់តែល្អសម្រាប់ការអភិវឌ្ឍនៅក្នុងប្រទេស ។
លោកបន្ដថា ៖« សក្ដានុពលវិនិយោគក្នុងវិស័យអចលនទ្រព្យនៅកម្ពុជា យើងមើលឃើញថា នៅមានភាពទូលំទូលាយណាស់ បើធៀបនឹងប្រទេសជិតខាង ដូចនេះ ធនធានមនុស្សក្នុងវិស័យនេះ ត្រូវការច្រើនទៀត មិនថាតែក្រុមហ៊ុនយើងមួយ ឬក្រុមហ៊ុនអចលនទ្រព្យផ្សេងៗ ក៏ត្រូវការពង្រីកបន្ថែមដែរ »។
លោកបន្តថា បច្ចុប្បន្ននេះ មានមនុស្សជាច្រើនបានតាំងខ្លួនជាអ្នកជំនាញ ឬជាភ្នាក់ងារអចលនទ្រព្យ ក៏ដូចជាអ្នកវាយតម្លៃអចលនទ្រព្យ ទាំងដែលខ្លួនមិនធ្លាប់មានបទពិសោធន៍ មិនធ្លាប់បានឆ្លងកាត់ការបណ្ដុះបណ្ដាលត្រឹមត្រូវ ដូចនេះ បើសិនជាបែបនេះកាន់តែច្រើន នឹងធ្វើឲ្យវិស័យអចលនទ្រព្យមានបញ្ហា ព្រោះតែជំនាញមិនពិតប្រាកដ ហើយវាយតម្លៃមិនត្រូវនឹងស្ថានការណ៍អចលនទ្រព្យនៅពេលបច្ចុប្បន្ន ។
លោកបន្ដថា ៖« អ្នកជំនាញ មិនពិតប្រាកដ និងមិនមានបទពិសោធន៍ច្បាស់លាស់ ហើយតាំងខ្លួនជាអ្នកជំនាញនិងអ្នកវាយតម្លៃ នឹងធ្វើឲ្យវិនិយោគិនអស់ជំនឿ ពេលនោះគេអាចនឹងបាត់បង់ទំនុកចិត្តក្នុងការវិនិយោគនៅកម្ពុជា យើង » ។
យោងតាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា នៅក្នុងរយៈពេល៣ត្រីមាសកន្លងទៅនេះ កម្ពុជាទទួលបានទុនវិនិយោគសរុបជាង៤.៨០០លានដុល្លារអាមេរិក ដោយអាជ្ញាធរបានផ្ដល់សិទ្ធិក្នុងការវិនិយោគចំនួនជាង២.៥០០គម្រោង ដែលមានផ្ទៃក្រឡាជាង១០លានម៉ែត្រការ៉េ។ ក្នុងចំណោមគម្រោងទាំងនោះ មាន៣៣គម្រោងជាការវិនិយោគរបស់ក្រុមហ៊ុនបរទេស ដែលមានតម្លៃជាទឹកប្រាក់ប្រមាណជាង៤៨០លានដុល្លារអាមេរិក ៕
ចែករំលែកព័តមាននេះ