រាជធានីភ្នំពេញ ៖ ទោះបីជាមិនបានបញ្ជាក់ចំឈ្មោះលោក កឹម សុខា ក្តី តែអតីតមន្ត្រីជាន់ខ្ពស់គណបក្សសង្គ្រោះជាតិ លោក គឹម សួភីរិទ្ធ បានអះអាងថា ការភ្នាល់ល្បែងនយោបាយ
របស់លោក សម រង្ស៊ី ធ្វើឲ្យអ្នកជាប់ពន្ធនាគារពិបាកជាងស្លាប់ទៅទៀត ។
លោក គឹម សួភីរិទ្ធ ដែលជាមនុស្សជំនិតរបស់លោក សម រង្ស៊ី បានដាក់សំណួរលើ ករណីលោក កឹម សុខា ដែលជាប់ពន្ធនាគារយ៉ាងដូច្នេះថា តើអ្នកណាជាអ្នកចាប់ឃុំឃាំងលោក កឹម សុខា ? តើតុលាការ ឬអ្នកណាដែលមានអំណាចដោះលែង ? សង្ឃឹមថា អ្នកទាំងអស់គ្នាអាចនឹងដឹងពីចម្លើយពិត បើចេះគិតពិចារណា ។
លោកបានបញ្ជាក់លើបណ្តាញសង្គមហ្វេសប៊ុកនៅថ្ងៃទី១២ វិច្ឆិកាថា «ដឹងថាមិនងាយនឹងឈ្នះ ហេតុអ្វីក៏គាត់ម្នាក់នេះនៅតែមានះយកជីវិតទៅភ្នាល់? ដោយមិនខ្វល់ពីនរណាកំពុងតែថា និងគិតអ្វី ពីព្រោះតែនេះមិនមែនជាការភ្នាល់ល្បែងសុីសងដូចអ្នកផងគិត តែវាជាការភ្នាល់ដាក់ជីវិតនៅក្នុងល្បែងនយោបាយ» ។
លោកបន្ថែមថា យុទ្ធសាស្ត្រ «កកូរអង្រួនខួរ» សត្រូវនៅរស់រានមានជីវិត តែសុខភាពផ្លូវចិត្តពិតជារស់មិនបានសុខស្រួល ឈឺចុក ពើតផ្សារមួល រស់ពិបាកជាងស្លាប់» ។
ចំណែកលោក គង់ គាំ ដែលជាអតីតមន្ត្រីជាន់ខ្ពស់គណបក្សប្រឆាំងដែរបានលើកឡើងថាហេតុអ្វីជាបានលោក សម រង្ស៊ី យកលោក កឹម សុខា ធ្វើជាវត្ថុនៃការភ្នាល់គ្នាទៅវិញ ។
លោក គង់ គាំ បានលើកឡើងថា តើសុខៗស្រាប់តែលើកយកការភ្នាល់ពីការដោះលែងលោក កឹម សុខា ថាជាការរងសម្ពាធអន្តរជាតិ និងដាក់វត្ថុភ្នាល់ គឺការចុះចេញពីតំណែងរបស់នាយករដ្ឋមន្ត្រីកម្ពុជាបច្ចុប្បន្ន ។ ហេតុអ្វី?
លោក គង់ គាំ បានលើកឡើងទៀតថា មូលហេតុដែលលោក សម រង្ស៊ី យកលោក កឹម សុខា មកធ្វើកម្មវត្ថុនៃការភ្នាល់នេះ ក៏ដោយសារតែខ្លាចលោក កឹម សុខា រួចខ្លួន ហើយខ្លួន(សម រង្ស៊ី)មិនបានចូលស្រុក ។
លោកបានបញ្ជាក់ថា ៖ «ខ្លាចលោក កឹម សុខា ត្រូវដោះលែងនៅថ្ងៃទី២៩ ខែធ្នូ ឆ្នាំ២០១៨ និងយ៉ាងយូរនៅខែមីនា ឆ្នាំ២០១៩ ដោយទុកខ្លួនក្រៅកញ្ចប់ឬ ? ផលជាក់ស្តែងនៃល្បែងភ្នាល់គឺ ៖
១-នាយករដ្ឋមន្ត្រី អន្តរជាតិ និង កឹម សុខា បានត្រឹមតែទាល់ច្រក និងខកចិត្ត ។ ២-សេចក្តីសង្ឃឹមទាំងរបស់លោក កឹម សុខា ទាំងរបស់អ្នកគាំទ្រ និងទាំងរបស់ប្រទេសជាតិ ដែលទន្ទឹងគន្លឹះតែមួយគត់ គឺខ្មែរនិងខ្មែរចេះដោះស្រាយបញ្ហាជាតិរបស់ខ្លួនដោយខ្លួនឯង ត្រូវបានរលាយខ្សុល» ។
លោក គង់ គាំ បានដាក់ជាសំណួរថា តើមានន័យយ៉ាងម៉េចដែលថា មតិ កឹម សុខា គ្មានសេរីភាព និងមតិអ្នកផ្សេងមិនយកជាការ ។ លោកក៏បានលើកឡើងថា មានតែលោក ប៉ុល ហំម(មួយ) ទល់(ពីរ) គឺលោកស្រី មូរ សុខហួរ និងលោក អេង ឆៃអ៊ាង ទើបអាចវាយតម្លៃថាល្បែងភ្នាល់នេះ គឺជាគន្លឹះសង្គ្រោះជាតិតែមួយគត់ ។
លោក គង់ គាំ បានអះអាងថា លោកមិនយល់ទេសម្រាប់ការបង្កើតល្បែងនយោបាយភ្នាល់គ្នារបស់លោក សម រង្ស៊ី និងសម្តេចតេជោ ហ៊ុន សែន នោះ ។ លោកបានលើកឡើងថា «ចំពោះខ្ញុំ កិច្ចព្រមព្រៀងទីក្រុងប៉ារីសសំខាន់ គោរពរដ្ឋធម្មនុញ្ញសំខាន់ ការបោះឆ្នោតសំខាន់ ប្រជាពលរដ្ឋសំខាន់» ៕
ចែករំលែកព័តមាននេះ