រាជធានីភ្នំពេញ ៖ សមត្ថកិច្ចប៉ុស្តិ៍នគរបាលរដ្ឋបាលអូបែកក្អមជិះល្បាតក្នុងមូលដ្ឋានបានធ្វើការឃាត់ខ្លួនជនសង្ស័យម្នាក់ក្នុងចំណោមពីរនាក់និងដកហូតថ្នាំញៀនចំនួន១៤កញ្ចប់តូចធំ កាលពីវេលាម៉ោង១និង១០នាទីរំលងអាធ្រាត្រឈានចូលថ្ងៃទី១៣ ខែវិច្ឆិកា ឆ្នាំ២០១៨ ត្រង់ចំណុចខាងមុខស្ថានីយប្រេងឥន្ធនៈតូតាល់ តាមបណ្តោយផ្លូវណតប្រ៊ីដ ស្ថិតក្នុងសង្កាត់អូរបែកក្អម ខណ្ឌសែនសុខ។
ជនសង្ស័យខាងលើឈ្មោះ ហេង ស៊ុង អាយុ២៥ឆ្នាំ មុខរបរនិងកន្លែងស្នាក់នៅមិនពិតប្រាកដ។
បើកតាមសម្តីពីសមត្ថកិច្ចប៉ុស្តិ៍នគរបាលរដ្ឋបាលអូបែកក្អមបានអោយដឹងថា នៅមុនពេលកើតហេតុ កម្លាំងពួកគាត់បានធ្វើការល្បាតនៅក្នុងមូលដ្ឋានដើម្បីទប់ស្កាត់បទល្មើសផ្សេងៗដែលកើតឡើងដោយប្រការណាមួយ។
ពេលដែលជិះល្បាតដល់ចំណុចក៏ឃើញជនសង្ស័យខាងលើ និងបក្ខពួកម្នាក់ទៀតបានជិះម៉ូតូមួយគ្រឿងម៉ាក គុបជ្រុង មិនចាំស្លាកលេខ ធ្វើដំណើរតាមបណ្តោយផ្លូវណតប្រ៊ីដ ក្នុងទិសដៅពីត្បូងទៅជើង។
ដោយប្រទះឃើញមានការសង្ស័យ កម្លាំងពួកគាត់ក៏បានហៅអោយឈប់ដើម្បីធ្វើការឆែកឆេរ ខណៈពេលនោះជនសង្ស័យខាងលើបានបោះថង់ថ្នាំដែលកាន់នៅនឹងដៃចោលទៅក្នុងធុងសំរាម ឃើញដូច្នេះសមត្ថកិច្ចក៏ស្ទាក់ឃាត់បាន តែភ្លាមនោះជនសង្ស័យខាងលើបានប្រវាយប្រតប់ជាមួយសមត្ថកិច្ច និងព្យាយាមរត់គេចខ្លួន តែរត់មិនរួចក៏ត្រូវសមត្ថកិច្ចចាប់វាយខ្នោះ ចំណែកឯបក្ខពួកម្នាក់ទៀតបានឆ្លៀតឱកាសលើកជិះម៉ូតូរត់គេចខ្លួនបាត់ស្រមោលដោយសុវត្ថិភាព។
បន្ទាប់មកកម្លាំងសមត្ថកិច្ចក៏បានរើសយកថង់ដែលជនសង្ស័យខាងលើបានបោះចោលយកមកឆែកឆេរក៏ប្រទះឃើញថ្នាំញៀនប្រភេទក្រាមសថ្លាចំនួន១៣កញ្ចប់តូ និង១កញ្ចប់ធំល្មម។
បច្ចុប្បន្នជនសង្ស័យខាងលើរួមនិងវត្ថុតាងត្រូវបានកម្លាំងសមត្ថកិច្ចនាំខ្លួនទៅសាកសួរនាំនៅប៉ុស្តិ៍នគរបាលរដ្ឋបាលអូរបែកក្អម និងកសាងសំណុំរឿងបញ្ជូនទៅអធិការដ្ឋាននគរបានខណ្ឌសែនសុខដើម្បីចាត់ការតាមនីតិវិធី ៕
ចែករំលែកព័តមាននេះ