រាជធានីភ្នំពេញ ៖ ទីបំផុតរដ្ឋសភាបានកំណត់ថ្ងៃទី១៥ វិច្ឆិកា ឆ្នាំ២០១៨ បើកសម័យប្រជុំពេញអង្គរដ្ឋសភាលើកទី១ នីតិកាលទី៦ ដើម្បីពិភាក្សា និងអនុម័តច្បាប់ស្តីពីហិរញ្ញវត្ថុ សម្រាប់ការគ្រប់គ្រង ឆ្នាំ២០១៩ និងរបៀបវារៈមួយចំនួនទៀត ។ នេះបើតាមលោក ឈាង វុន អ្នកនាំពាក្យរដ្ឋសភា ។
លោកឈាង វុន អ្នកនាំពាក្យរដ្ឋសភាបានឲ្យដឹង ក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភានាព្រឹកថ្ងៃទី១៣ វិច្ឆិកាបានគណៈកម្មាធិការគណៈកម្មាធិការអចិន្ត្រៃយ៍ រដ្ឋសភានៃព្រះរាជាណាចក្រកម្ពុជាបានបើកកិច្ចប្រជុំ ក្រោមអធិបតីភាពសម្ដេចហេង សំរិន ប្រធានរដ្ឋសភានិងមានការចូលរួមពីសមាជិកអចិន្ត្រៃយ៍ទាំងអស់ ។ អង្គប្រជុំបានធ្វើការពិភាក្សា និងអនុម័តតាមរបៀបវារៈដោយមានលទ្ធផលដូចខាងក្រោម ១- អង្គប្រជុំបានអនុម័តបញ្ចូលក្នុងរបៀបវារៈសម័យប្រជុំរដ្ឋសភា លើកទី១ នីតិកាលទី៦នូវទី១- សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០១៩ ។ ទី២ – សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រង ឆ្នាំ២០១៧ ។ ទី៣ – សេចក្តីព្រាងច្បាប់ស្តីពីការអនុម័តយល់ព្រមលើ ១- កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋសង្គមនិយមវៀតណាមស្តីពីការចៀសវាងការយកពន្ធត្រួតគ្នានិងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល ។ ២- កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋឥណ្ឌូណេស៊ីស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល ។ ទី៤ – សេចក្តីព្រាងច្បាប់ស្តីពីការអនុម័តយល់ព្រម លើសិន្ធិសញ្ញាស្តីពីបត្យាប័ន រវាងព្រះរាជាណាចក្រកម្ពុជា និងសហព័ន្ធរុស្ស៊ី ។
សូមជម្រាបថា បើតាមច្បាប់ថវិកាជាតិឆ្នាំ២០១៩ រាជរដ្ឋាភិបាលកម្ពុជាគ្រោងចំណាយថវិកាជាតិចំនួន២៧១៦៤ ៩៩៦ លានរៀលស្មើនឹង២៤,៧២% នៃ ផសស និងមានកំណើន ១១,៤% ធៀបនឹងច្បាប់ឆ្នាំ២០១៨ ខណៈចំណូលថវិកាជាតិមានចំនួន២១១៨៦ ២២៨ លានរៀល ស្មើនឹង១៩,២៨% នៃ ផសស និងមានកំណើន ១៤,០% បើធៀបនឹងច្បាប់ឆ្នាំ២០១៨ ។
យោងតាមខ្លឹមសារសង្ខេបស្តីពីសេចក្តីព្រាងច្បាប់ថវិកាជាតិឆ្នាំ២០១៩ របស់ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា ជាលទ្ធផលអតិរេកថវិកាចរន្តអាចរក្សាបានក្នុងកម្រិតប្រមាណ ២,៨១% នៃ ផសស នៅឆ្នាំ២០១៩ និងមានឱនភាពថវិកាសរុបស្មើនឹង-៥,៤៤% ផសស ស្របតាមគោលនយោបាយពង្រឹងការគ្រប់គ្រងថវិកា (Fiscal Consolidation) ។
ឱនភាពនេះត្រូវបានបំពេញបន្ថែម ដោយហិរញ្ញប្បទាន ក្រៅប្រទេសក្នុងទំហំ ៤,៨៤%នៃ ផសស មូលនិធិទ្រទ្រង់ថវិកាប្រមាណ ០,២៣% នៃ ផសស និងប្រាក់បញ្ញើរាជរដ្ឋាភិបាលក្នុងទំហំ ០,៣៧% នៃ ផសស ស្មើនឹង៤០៥ ០០០លានរៀល ឬសមមូលនឹង១០០លានដុល្លារអាមេរិក ដែលត្រូវបានគ្រោងយកមកប្រើប្រាស់សម្រាប់ផ្ដល់ទុកដល់ការបង្កើតធនាគារសហគ្រាសធុនតូច និងធម្យម (SMEs Bank) របស់រដ្ឋ ។
ដូច្នេះបើមិនគិតអំពីតម្រូវការទុនសម្រាប់បង្កើតធនាគារធុនតូច និងមធ្យមនេះទេ គឺថវិកាឆ្នាំ២០១៩ មានតុល្យភាពដោយមិនចាំបាច់ប្រើប្រាក់បញ្ញើ ឬហៅថា«ប្រាក់សន្សំ» របស់រាជរដ្ឋាភិបាលនោះទេ ។
សូមបញ្ជាក់ថា ក្នុងកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពសម្តេចតេជោ ហ៊ុន សែ ន នាយករដ្ឋមន្ត្រី នៃកម្ពុជានៅព្រឹកថ្ងៃទី២៦ ខែតុលានេះ បានអនុម័តទាំងស្រុងលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩ ខណៈរាជរដ្ឋាភិបាលកម្ពុជាបានកំណត់ទំហំនៃការខ្ចីប្រាក់ពីដៃគូអភិវឌ្ឍន៍សម្រាប់ឆ្នាំ២០១៩ ក្នុងកម្រិត១៤០០លានអេសដេអ៊ែរ (SDR) ៕
ចែករំលែកព័តមាននេះ