រាជធានីភ្នំពេញ ៖ ស្ត្រីម្នាក់ខូចចិត្តតាចិញ្ចឹមជាជនជាតិខ្មែរអ៊ិស្លាម វាយធ្វើបាបនឹងយកទូរស័ព្ទដៃម៉ាក iPhone XS វិញ សម្រេចចិត្តគិតខ្លីជិះម៉ូតូ Zoomer-X ទៅលោតទឹកនៅលើស្ពានជ្រោយចង្វារសម្លាប់ខ្លួន សំណាងល្អសមត្ថកិច្ចឃាត់ទាន់យកទៅប៉ុស្តិ៍ជ្រោយចង្វារ កាលពី ម៉ោង7និង30នាទីយប់ ថ្ងៃទី១២ ខែវិច្ឆិកា ឆ្នាំ២០១៨ តាមបណ្តោយផ្លូវជាតិលេខ៦ នៅចំណុចលើស្ពានជ្រោយចង្វារថ្មី ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
ស្ត្រីប៉ុនប៉ងលោតទឹកសម្លាប់ខ្លួនមិនបានសម្រេចមានឈ្មោះ លី លី អាយុ៣៤ទៅ៣៥ឆ្នាំ ស្នាក់នៅម្តុំបឹងសាឡាង ខណ្ឌទួលគោក ។
តាមសាក្សីដែលឃើញហេតុការណ៍ឱ្យដឹងថា មុនពេលកើតហេតុគេឃើញស្ត្រីម្នាក់ជិះម៉ូតូមួយគ្រឿងម៉ាក Zoomer-X ពណ៌ស្វាយ ពាក់ស្លាកលេខភ្នំពេញ1GL2238 ធ្វើដំណើរឆ្លងស្ពានជ្រោយចង្វារថ្មីក្នុងទិសដៅពីលិចទៅកើត ខណៈពេលជិះដល់ពាក់កណ្តាលស្ពានបានឈប់ម៉ូតូ រួចចុះពីលើម៉ូតូប៉ុនប៉ងទៅលោតទឹកសម្លាប់ខ្លួនក៏ត្រូវប្រជាពលរដ្ឋធ្វើដំណើរឆ្លងកាត់លើស្ពាននាំគ្នាជួយចាប់ និងស្រែកហៅសមត្ថកិច្ចដែលយាមនៅគោលដៅស្ពានជ្រោយចង្វារចាប់ឃាត់យកទៅរង្វង់មូលព្រហ្មមុខបួន ដើម្បីធ្វើការសួរនាំ ។
តាមសម្តីស្ត្រីដែលប៉ុនប៉ងលោតទឹកបានបង្ហើបឲ្យដឹងថា មូលហេតុដែលគាត់មកលោតទឹកសម្លាប់ខ្លួនមកពីគាត់មានតាចិញ្ចឹមម្នាក់ជាជនជាតិខ្មែរអ៊ិស្លាមរកស៊ីខាងទិញលក់ដី ហើយបានចិញ្ចឹមរូបគាត់រយៈពេល១០ឆ្នាំមកហើយ។ ស្ត្រីរូបនេះបញ្ជាក់ប្រាប់ថា គាត់មានប្តីមុនបានកូនស្រីម្នាក់អាយុ១៥ឆ្នាំ ទើបមានទំនាក់ទំនងជាមួយតាខ្មែរអ៊ិស្លាមរហូតមក ស្រាប់តែកន្លងមកថ្មីៗនេះ តាចិញ្ចឹមរូបនោះវាយធ្វើបាប និងដកហូតយកទូរស័ព្ទដៃរបស់គាត់ម៉ាក iPhone XS តម្លៃជាង1300ដុល្លារយកទៅវិញធ្វើឲ្យគាត់តូចចិត្ត ក៏សម្រេចចិត្តទៅលោតទឹកសម្លាប់ខ្លួនតែម្តង ។
បន្ទាប់ពីសួរនាំដឹងរឿងហើយសមត្ថកិច្ចបានធ្វើការណែនាំ និងយកទៅប៉ុស្តិ៍ជ្រោយចង្វាររួចក៏បានទំនាក់ទំនងហៅសាច់ញាតិមកយកត្រឡប់ទៅផ្ទះវិញ៕
ចែករំលែកព័តមាននេះ