ខេត្តកំពង់ឆ្នាំង ៖ ក្រុមអ្នកសារព័ត៌មានមួយក្រុមដែលមានគ្នាប្រមាណជាង ២០នាក់ នៅព្រឹកថ្ងៃទី១២ ខែវិច្ឆិកា ឆ្នាំ២០១៨ បាននាំគ្នាទៅកាន់ទំនប់កុមារ ស្ថិតនៅភូមិអ្នកតាហាង ឃុំកំពង់ត្រឡាច ស្រុកកំពង់ត្រឡាច ដើម្បីចង់ដឹងថា តើការអភិវឌ្ឍន៍របស់ក្រុមហ៊ុន លោក រឿង ថាវរឹទ្ធ មានទីលំនៅខេត្តព្រះសីហនុ បានអនុវត្តទៅតាមច្បាប់ស្នើសុំទៅអាជ្ញាធរខេត្តដែរឬទេ? ព្រោះកន្លងទៅក្រុមហ៊ុននេះមិនបានគោរពកិច្ចសន្យា នោះទេ បែរជាយកគ្រឿងចក្របូមខ្សាច់ធ្វើអាជីវកម្មខុសនឹងច្បាប់ស្មើសុំទៅវិញ?ទោះយ៉ាងនេះក្តី ក្រុមអ្នកសារព័ត៌មានទាំងអស់នោះមិនអាចចូលទៅថតផ្តិតយករូបភាពពីការបូមខ្សាច់ខាងលើបានទេ ដោយក្រុមហ៊ុនបានដាក់បារ៉ាស់ រារាំងក្រុមអ្នកសារព័ត៌មានមិនឲ្យចូលទៅថតរូបភាពឡើយ។
ការរារាំងរបស់ក្រុមហ៊ុននេះ អាចបញ្ជាក់ថា ក្រុមហ៊ុននេះពិតជាមានភាពទុច្ចរិត ក្នុងការអនុវត្តនូវអ្វី ដែលបានស្នើសុំទៅអាជ្ញាធរខេត្ត។ ក្រុមអ្នកសារព័ត៌មានទាំងនោះ បានលើកឡើងថា បើសិនការអភិវឌ្ឍ គឺត្រូវតែថតចុះផ្សាយ ដើម្បីឲ្យប្រជាពលរដ្ឋបានដឹង នឹងមិនត្រូវលាក់បាំងបែបនេះឡើយ ហើយនេះជាការពិតសិទ្ធិដល់អ្នកសារព័ត៌មាន។ ក្រុមអ្នកសារព័ត៌មានទាំងនោះបានបញ្ជាក់ថា មានប្រជាពលរដ្ឋបានរាយការណ៍ថាការអភិវឌ្ឍទំនប់កុមារខាងលើនេះ មិនត្រូវទៅតាមគោលការណ៍ នៃច្បាប់ស្នើសុំនោះឡើយ បែរជាដាក់គ្រឿងចក្របូមខ្សាច់ធ្វើអាជីវកម្មទៅវិញម្យ៉ាងវិញ។
តាមការអះអាងរបស់ប្រជាពលរដ្ឋបានបញ្ជាក់ទៀតថា នៅតំបន់នោះសម្បូរដោយផ្នូរបូរាណ ដែលក្រុមហ៊ុនបានឈូសឆាយប៉ះពាល់ទៀតផង។ ពួកគាត់បានស្នើសុំដល់អាជ្ញាធរស្រុកអាជ្ញាធរខេត្ត ជួយអន្តរាគមន៍ឲ្យបើកទូលាយដើម្បីអ្នកសារព័ត៌មានចុះទៅថតយករូបភាពបង្ហាញការពិតដល់ប្រជាពលរដ្ឋបានដឹងផង។ ជុំវិញបញ្ហានេះ យើងមិនអាចសុំការបំភ្លឺ ពីក្រុមហ៊ុន លោករឿង ថាវរឹទ្ធ បានទេ បានត្រឹមតែជួបអ្នកយាមផ្លូវ ដែលហាមមិនឲ្យចូលតែប៉ុណ្ណោះ។ គួររំលឹកដែរថា ក្រុមហ៊ុនរឿងថារិទ្ធ បានធ្វើពាក្យស្នើសុំទៅ ធនធានទឹក និងអាជ្ញាធរខេត្តកំពង់ឆ្នាំង ដើម្បីសុំអភិវឌ្ឍន៍ដោយសារបណ្តាញជួសជុលទ្វារទឹក និងទំនប់កុមារ ប៉ុន្តែ បែរជាដាក់គ្រឿងចក្របូមយកខ្សាច់ធ្វើអាជីវកម្មខុសច្បាប់ទៅវិញ៕
ចែករំលែកព័តមាននេះ