ចៅក្រមសម្រេចចេញដីកាឃុំខ្លួន ក្រុមចោរប្លន់ប្រដាប់ដោយកាំភ្លើងខ្លី
- កណ្តាល
ខេត្តកណ្តាល ៖ នៅល្ងាចថ្ងៃទី១២ វិច្ឆិកា ២០១៨នេះ លោក ងួន វុទ្ធី ចៅក្រមស៊ើបសួរសាលាដំបូង ខេត្តកណ្តាល…
ខេត្តកណ្តាល ៖ នៅល្ងាចថ្ងៃទី១២ វិច្ឆិកា ២០១៨នេះ លោក ងួន វុទ្ធី ចៅក្រមស៊ើបសួរសាលាដំបូង ខេត្តកណ្តាល បានសម្រេចចេញដីកាឃុំខ្លួន ក្រុមចោរប្លន់ប្រដាប់ដោយកាំភ្លើងខ្លី វែង ដែលក្រុមចោរ ទិញពីអ្នកទោសនៅគុកព្រៃស និងជាមុខសញ្ញាជួញដូរដោយខុសច្បាប់នូវសារធាតុញៀន ត្រូវបាននគរបាលស្រុកអង្គស្នួលធ្វើការបង្ក្រាបបានពីរនាក់នោះ ដាក់ពន្ធនាគារបណ្តោះអាសន្នពីបទ ” ជួញដូរដោយខុសច្បាប់នូវសារធាតុញៀន ” ដែលប្រព្រឹត្តនៅ ភូមិវែង ឃុំម្កាក់ ស្រុកអង្គស្នួល ខេត្តកណ្តាល កាលពីថ្ងៃទី០៩ វិច្ឆិកា ឆ្នាំ២០១៨ វេលាម៉ោង១៧ និង៣០នាទី តាមមាត្រា ៤០នៃច្បាប់ស្តីពីការត្រួតពិនិត្យគ្រឿងញៀន។
ចំណែកក្រុមចោរប្លន់ដែលធ្វើសកម្មភាព បានសម្រេចកន្លងមកនោះមិនត្រូវបានចោទប្រកាន់ទេ។ ជនត្រូវចោទទី០១-ឈ្មោះ កែវ ក្រូច ភេទប្រុស អាយុ៣១ឆ្នាំ ជនជាតិខ្មែរ មុខរបរមិនពិត នៅភូមិវែង ឃុំម្កាក់ ស្រុកអង្គស្នួល ខេត្តកណ្តាល និងទី០២-ឈ្មោះ សយ យ៉ា ភេទប្រុស អាយុ២៤ឆ្នាំ ជនជាតិខ្មែរ មុខរបរមិនពិត នៅភូមិវែង ឃុំម្កាក់ ស្រុកអង្គស្នួល ខេត្តកណ្តាល។ លោកវរសេនីយ៍ មាន សំណាង អធិការនគរបាលស្រុកអង្គស្នួលបានឲ្យដឹងថា នៅវេលាម៉ោងខាងលើ កម្លាំងជំនាញបានទទួលព័ត៌មានថា មានជនសង្ស័យ ត្រៀមធ្វើសកម្មភាពប្លន់ កងកម្លាំងជំនាញ បានចុះប្រតិបត្តិការបង្ក្រាប ដោយមានបទបញ្ជាពីឯកឧត្ដមស្នងការ លោកស្នងការរង
និងមានការសម្របសម្រួលពីលោក ឯក ស៊ុនរស្មី ព្រះរាជអជ្ញារងអមសាលាដំបូងខេត្តកណ្ដាល កងកម្លាំងជំនាញ បានធ្វើការឆែកឆេរ និងចាប់យកវត្ថុតាង កាំភ្លើងខ្លីម៉ាក CF98-9 លេខ៖ 00498007236 គ្រាប់ចំនួន២០គ្រាប់ សម្បកកាទូសចំនួន០១ អាវុធច្នៃបាញ់គ្រាប់កាំកង់០២ដើម ជញ្ជីងថ្លឹងថ្នាំញៀន០១ ម្សៅពណ៌សថ្លាសង្ស័យថាសារធាតុញៀន ០៣កញ្ចប់ធំ ខោអាវប៉ារ៉ា០១កំប្លេ ឧបករណ៍ប្រើប្រាស់សារធាតុញៀន មួយចំនួន។
លោកអធិការបានបញ្ជាក់ថា ជនសង្ស័យបានឆ្លើយថា ខ្លួនធ្លាប់ឲ្យឈ្មោះ សយ ម៉ៅ ភេទប្រុស អាយុ២២ឆ្នាំ និងឈ្មោះ សយ យ៉ា ភេទប្រុស អាយុ២៤ឆ្នាំ អ្នកទាំង០២ នៅភូមិវែងឃុំម្កាក់ ស្រុកអង្គស្នួលខេត្តកណ្តាល ធ្វើសកម្មភាពយកកាំភ្លើងម៉ាក CF98-9 របស់ខ្លួនទៅប្លន់យក បានម៉ូតូម៉ាក SERUS១គ្រឿង ក្នុងខែ១០ឆ្នាំ ២០១៨ មិនចាំថ្ងៃ។ ចំពោះកាំភ្លើងខ្លី ខ្លួនបានទិញពីឈ្មោះល័ក្ខ ភេទប្រុស អាយុខ្ទង់២៨ឆ្នាំ បច្ចុប្បន្នកំពុងជាប់ពន្ធនាគារព្រៃស ទាក់ទងតាមទូរស័ព្ទ ចេញពីពន្ធនាគារ លក់(តម្លៃ២.០០០ដុល្លារ) ហើយគេប្រាប់ឲ្យខ្លួនទៅ យកនៅទំនប់កប់ស្រូវ(ទិញដើមខែ០៨ឆ្នាំ២០១៨) និងជាមុខសញ្ញាជួញដូរដោយខុសច្បាប់នូវសារធាតុញៀន។
ចំពោះមុខជនសង្ស័យមានដីកាចាប់ខ្លួនលេខ៖ ០១០ ដ.ក.ប.ច ខ/១៧ចុះថ្ងៃទី០៣ ខែមករា ឆ្នាំ២០១៨ ពីបទ៖ ជួញដូរដោយខុសច្បាប់ នូវសារធាតុញៀន ចេញដោយលោក ចៅក្រម គឹម ម៉េង នៅថ្ងៃទី១០ វិច្ឆិកា ២០១៨ វេលាម៉ោង១១ និង៣០នាទី កម្លាំងជំនាញស្រាវជ្រាវ ឃាត់ខ្លួនបានឈ្មោះ សយ យ៉ានៅចំណុចភូមិវែង ឃុំម្កាក់ ស្រុកអង្គស្នួល ខេត្តកណ្តាល ករណីនេះកម្លាំងជំនាញកំពុងបន្ត ធ្វើការស្រាវជ្រាវចាត់ការតាមនីតិវិធី៕
ចែករំលែកព័តមាននេះ