ប្រទេសយេម៉ែន ៖ ប្រភពព័ត៌មានយោធានិងមន្ទីរពេទ្យគូសបញ្ជាក់នាថ្ងៃទី១២វិច្ឆិកាថា ពួកឧទ្ទាមយ៉ាងតិច១១០នាក់និងទាហានរដ្ឋាភិបាល៣២នាក់ ព្រមទាំងជនស៊ីវិល៧នាក់ស្លាប់ រយៈពេល២៤ម៉ោងចុងក្រោយនេះ នៃការប្រយុទ្ធគ្នាដណ្ដើមកាន់កាប់ទីក្រុងកំពង់ផែHODEIDAភាគខាងលិចយេម៉ែន។
តុល្យការនោះត្រូវបានចេញផ្សាយខណៈពួកឧទ្ទាមហ៊ូធី ជួយទ្រទ្រង់ដោយអ៊ីរ៉ង់ បានវាយទប់ទល់យ៉ាងសាហាវ ការរុលទៅមុខរបស់កងទ័ពរដ្ឋាភិបាល គាំទ្រដោយអារ៉ាប់ប៊ីសាអ៊ូឌីតក្នុងសង្កាត់មួយចំនួននៃទីក្រុងនោះ។
ប្រភពមួយរបស់ក្រុមចម្រុះប្រឆាំងពួកឧទ្ទាម នាំមុខដោយអារ៉ាប៊ីសាអ៊ូឌីតគូសបញ្ជាក់ថា ពួកហ៊ូធីវាយយ៉ាងសាហាវរុញច្រានការវាយលុកមួយ របស់កងទ័ពរដ្ឋាភិបាលសំដៅទៅកំពង់ផែ។ម្យ៉ាងទៀតក្រុមចម្រុះបានវាយប្រហារតាមអាកាសជាច្រើនប្រឆាំងពួកឧទ្ទាម។
ការវាយលុករបស់កងទ័ពរដ្ឋាភិបាលលើក្រុងHODEIDAចាប់ធ្វើពីខែមិថុនាមក តែបង្កើនខ្លាំងចាប់ពីថ្ងៃទី១វិច្ឆិកាមក។តុល្យការមកទល់ពេលនេះ ការវាយលុកនោះបណ្ដាលឲ្យមនុស្សស្លាប់យ៉ាងតិច៥៩២នាក់ហើយ៕
ចែករំលែកព័តមាននេះ