អ៊ីស្រាអែល-ប៉ាឡេស្ទីន ៖ ទាហានអ៊ីស្រាអែលម្នាក់ និងជនប៉ាឡេស្ទីន៧នាក់បានត្រូវស្លាប់ ពេលមានការបាញ់តតាំងគ្នារវាងកងទាហានអ៊ីស្រាអែល និងពួកយុទ្ធជនក្រុមហាម៉ាស់នៅជ្រោយហ្គាហ្សា កាលពីថ្ងៃទី១១ វិច្ឆិកា។ សភាពការណ៍នោះគំរាមកំហែងបង្កើនភាពតានតឹង ក្រោយកិច្ចព្រមព្រៀងមួយនាពេលថ្មីៗនេះដែលសង្ឃឹមស្ដារភាពស្ងប់ស្ងាត់ឡើងវិញ។
ក្នុងសេចក្ដីប្រកាសមួយនាវេលាល្ងាចថ្ងៃនោះ កងទ័ពអ៊ីស្រាអែលបញ្ជាក់ថា នាយទាហានម្នាក់នៃកងកម្លាំងពិសេសបានត្រូវស្លាប់ រួចទាហានម្នាក់ទៀតរងរបួសស្រាល។
មុននេះក្រុមកងពលEZZEDINE AL QASSAMសាខាប្រដាប់អាវុធរបស់ក្រុមហាម៉ាស់ប៉ាឡេស្ទីនអះអាងថា នោះជាប្រតិបត្តិការសម្ងាត់មួយរបស់កងកម្លាំងពិសេសអ៊ីស្រាអែល ដែលប៉ុនប៉ងជ្រៀតចូលភាគខាងកើតតំបន់ខាន់យូណេស នាភាគខាងត្បូងជ្រោយហ្គាហ្សាតាមរថយន្តស៊ីវិលមួយ ដើម្បីសម្លាប់មេបញ្ជាការក្រុមហាម៉ាស់ម្នាក់។
នាយករដ្ឋមន្ត្រីអ៊ីស្រាអែលលោកបេនចាមីននេតាន់យ៉ាហ៊ូ បានសម្រេចកាត់ផ្ដាច់ទស្សនកិច្ចរបស់លោកនៅក្រុងប៉ារីស កន្លែងដែលលោកចូលរួមក្នុងពិធីប្រារព្ធខួបលើកទី១០០ នៃការបញ្ចប់សង្គ្រាមលោកលើកទី១។លោកសម្រេចផ្ដាច់ទស្សនកិច្ចនេះនៅក្រុងប៉ារីស ដើម្បីវិលមកកាន់អីុស្រាអែលវិញ ព្រោះឧប្បត្តិហេតុទាំងនោះ។
ពីដំបូងកងទ័ពអ៊ីស្រាអែលរៀបរាប់ពីការបាញ់តតាំងគ្នាមួយ នាឱកាសនៃប្រតិបត្តិការយោធាមួយនៅជ្រោយហ្គាហ្សា ដែលនាំឲ្យមានការប៉ះទង្គិចគ្នា។កងទាហានចូលរួមក្នុងប្រតិបត្តិការបានដកចូលដែនដីអ៊ីស្រាអែលវិញ។ នាវេលាល្ងាចគ្រាប់រ៉ុក្កែតប្រមាណជា១០គ្រាប់បាញ់ចេញពីជ្រោយហ្គាហ្សា ឆ្ពោះទៅអីុស្រាអែល មុនពេលត្រូវស្ទាក់កម្ទេច ដោយប្រព័ន្ធការពារប្រឆាំងមីស៊ីល។ អ្នកនាំពាក្យម្នាក់របស់ក្រុមហាម៉ាស់ដែលកាន់អំណាចនៅហ្គាហ្សាបានបរិហារថា នេះជាការវាយប្រហារដ៏កំសាកមួយរបស់អ៊ីស្រាអែល។
ការបាញ់តតាំងគ្នានោះកើតមានខណៈសភាពការណ៍នៅហ្គាហ្សា ហាក់មានស្ថេរភាព ក្រោយការប៉ះទង្គិចបង្ហូរឈាមគ្នាជាច្រើនខែរវាងពួកប៉ាឡេស្ទីន និងកងទាហានអ៊ីស្រាអែល ជិតរបាំងពុះចែករវាងជ្រោយហ្គាហ្សា និងអ៊ីស្រាអែល។ អាជ្ញាធរអ៊ីស្រាអែលបានអនុញ្ញាតឲ្យប្រទេសកាតាបញ្ជូនប្រាក់ចំនួន១៥លានដុល្លារ ដើម្បីបើកប្រាក់ខែឲ្យមន្ត្រីរដ្ឋការ នៅជ្រោយហ្គាហ្សា។ នាយករដ្ឋមន្ត្រីអ៊ីស្រាអែលកាលពិីថ្ងៃទី១០វិច្ឆិកា ហៅការសម្រេចចិត្តនោះថានឹងជាការរួមចំណែក នាំមកវិញនូវភាពស្ងប់ស្ងាត់។
ក្នុងសន្និសីទសារព័ត៌មានមួយនាទីក្រុងប៉ារីស លោកនេតាន់យ៉ាហ៊ូអះអាងថា ខ្ញុំនឹងមិនរាថយឡើយចំពោះសង្គ្រាមចាំបាច់មួយ ប៉ុន្តែខ្ញុំចង់ចៀសវាងវា ប្រសិនបើវាមិនចាំបាច់ទេនោះ៕
ចែករំលែកព័តមាននេះ