ទីក្រុងយ៉ាំងហ្គោន ៖ ក្រុមហ៊ុនតាក់ស៊ីក្នុងស្រុកនិយាយថា ពួកគេកំពុងប្រឈមនឹងបរិយាកាសរកស៊ីមិនល្អ បើទោះជាមានការចាកចេញរបស់ក្រុមហ៊ុន Uber ពីមីយ៉ាន់ម៉ា កាលពីដើមឆ្នាំនេះក៏ដោយ ។ នេះក៏មកពីការកាន់កាប់ទីផ្សាររបស់ក្រុមហ៊ុនតាក់ស៊ី Grab ។
មុនពេល Uber និង Grab ចាប់ផ្តើមដំណើរការនៅក្នុងប្រទេសមីយ៉ាន់ម៉ា សេវាតាក់ស៊ីត្រូវបានផ្តល់ដោយក្រុមហ៊ុនក្នុងស្រុកពីរគឺ Hello Cabs និង Oway Ride ប៉ុន្តែកាលពី៤ខែមុន ក្រុមហ៊ុន Hello Cabs បានបិទនូវកម្មវិធីរបស់ខ្លួនចោល ព្រោះតែមិនអាចប្រកួតប្រជែងជាមួយនឹងក្រុមហ៊ុន Grab បាន ។
ក្រុមហ៊ុនរថយន្តតាក់ស៊ីក្នុងស្រុក កន្លងមកតែងតែស្នើសុំឲ្យរដ្ឋាភិបាលកំណត់បទបញ្ជាណាមួយ ដើម្បីជួយកុំឲ្យងាប់ក្រុមហ៊ុនក្នុងស្រុក ដោយសារតែក្រុមហ៊ុនមកពីក្រៅប្រទេស ដូចជា Grab ជាដើម ។
លោក Aung Win នាយកគ្រប់គ្រងក្រុមហ៊ុន Dagon Logistics Co Ltd ដែលជាក្រុមហ៊ុនមេរបស់ Hello Caps បាននិយាយថា ៖« ឥឡូវនេះ Grab បានគ្រប់គ្រងទីផ្សារតាក់ស៊ី ដែលយើងមិនអាចប្រកួតប្រជែងបាន។ ក្រុមហ៊ុនតាក់ស៊ីក្នុងស្រុកបានចាប់ផ្តើមតាំងពីយូរយារណាស់មកហើយ មុនពេលមានការកើនឡើងនៃអុីនធើរណេតនៅក្នុងប្រទេសមីយ៉ាន់ម៉ា។ នៅពេលក្រុមហ៊ុនក្រៅស្រុកមកលុកលុយ ពួកគេបានជះលុយដើម្បីផ្តល់ប្រូម៉ូសិនដល់អតិថិជន »។
ស្ថិតក្រោមច្បាប់បច្ចុប្បន្នរបស់ប្រទេសមីយ៉ាន់ម៉ា គ្មានមនុស្សឬអាជីវកម្មណាត្រូវបានអនុញ្ញាតឲ្យផ្តាច់មុខទីផ្សារ ដោយការលក់ទំនិញក្នុងតម្លៃទាបជាងថ្លៃដើមឡើយ ។ ទោះជាយ៉ាងណាក៏ដោយ ការចែងនេះមិនបានគ្របដណ្តប់លើផ្នែកក្រុមហ៊ុនផ្តល់សេវាឡើយ ។
លោក Aung Win បានថ្លែងបន្តថា ៖« យើងមានច្បាប់ប្រកួតប្រជែងដែលត្រូវបានអនុម័តនៅឆ្នាំ២០១៥ ប៉ុន្តែតាមដែលខ្ញុំដឹងអំពីបទបញ្ជា និងការអនុវត្តតាមច្បាប់ទាំងនោះ គឺមិនទាន់ត្រូវបានគេធ្វើឲ្យពេញលេញឡើយ ។
យើងបានធ្វើបទបង្ហាញមួយទៅកាន់ប្រធានាធិបតីកាលពីឆ្នាំមុន អំពីរបៀបដែលរដ្ឋាភិបាលគួរចាត់វិធានការ និងធ្វើសកម្មភាព ខណៈដែលអាជីវកម្មតាក់ស៊ីក្នុងស្រុកកំពុងទទួលរងផលប៉ះពាល់ពីក្រុមហ៊ុនមួយទៀត ដែលហ៊ានយកប្រាក់ដើមទៅចោល »។
ការយកដើមទៅចោលនេះ គឺនៅពេលដែលក្រុមហ៊ុនមួយលក់ផលិតផល ឬសេវាកម្មរបស់ខ្លួនក្នុងតម្លៃទាបជាងតម្លៃទូទៅ ឬ ថ្លៃនៃការផលិត វាធ្វើឡើងដើម្បីឲ្យខ្លួនឆាប់រីកដុះដាលលើទីផ្សារ និងអស់គូប្រជែង ។ ដល់ពេលចុងក្រោយ ក្រុមហ៊ុននោះនឹងតម្លើងថ្លៃឲ្យខ្ពស់ជាងមុន ៕
ចែករំលែកព័តមាននេះ