រាជធានីភ្នំពេញ ៖ រថយន្តម៉ាក ford ពីរបាំងមួយគ្រឿងបានបែកស្តុបម្ខាង ខណៈដែលកំពុងតែឈប់ភ្លើងស្តុប ហើយត្រូវបានរថយន្តម៉ាកកាម៉ារីបាឡែនមួយគ្រឿងដែលបើកបរដោយបុរសម្នាក់ទំនងជាទើបមកពីកន្លែងផឹក និងស្រវឹងស្រា យ៉ាងជោកជាំបើកមកបុកពីក្រោយ រួចហើយមិននៅដោះស្រាយបែរជាដើរទ្រេតទ្រោតឡើងជិះម៉ូតូទៅដេកផ្ទះបាត់ ទាល់តែប្រពន្ធចេញមុខមកដោះស្រាយជំនួយ ។
ករណីគ្រោះថ្នាក់ចរចរណ៍នេះដែរបានកើតឡើង កាលពីវេលាម៉ោង៣និង០០នាទីរសៀលថ្ងៃទី ១២ ខែ វិច្ឆិកា ឆ្នាំ ២០១៨ នៅចំណុចភ្លើងស្តុបបឹងកក់ ផ្លូវរថភ្លើងR6 ក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុបុរសវ័យក្មេងម្នាក់បានបើករថយន្តម៉ាក ford ពីរបាំង ពណ៌ស ពាក់ស្លាកលេខភ្នំពេញ 2AL – 9336 មួយគ្រឿងក្នុងទិសដៅពីជើងទៅត្បូងតែម្នាក់ឯងលុះមកដល់ចំណុចខាងលើដែលជាចំណុចភ្លើងស្តុបក៏លោតឡើងភ្លើងក្រហម និងឈប់នៅនឹងមួយកន្លែង ។ ពេលដែលកំពុងតែឈប់ភ្លើងស្តុបនោះក៏ស្រាប់តែមានរថយន្តម៉ាកកាម៉ារីបាឡែន ពណ៌ទឹកមាស ពាក់ស្លាកលេខភ្នំពេញ 2AI – 0034 មួយគ្រឿងដែលបើកបរដោយបុរសវ័យជាង៤០ឆ្នាំម្នាក់បើកមកពីក្រោយ និងបុកចំស្តុបខាងក្រោយផ្នែកខាងខាងឆ្វេងបែកម្ខាងតែម្តង ។
តាមប្រភពដដែលបានប្រាប់បន្តទៀតថា ភ្លាមនោះកម្លាំងនគរបាលចរាចរណ៍ក្រុងដែលនៅឈរជើងក្បែរនោះក៏បានជួយធ្វើអន្តរាគមន៍ដោយបានដកកូនសោរពីភាគីរថយន្តម៉ាកកាម៉ារី បាឡែនបង្កឲ្យនិយាយដោះស្រាយគ្នា ជាមួយ និងម្ចាស់រថយន្ត ford តែបែរជារូបគាត់បានដើរទ្រេតទ្រោតស្រវឹងស្រាយ៉ាងខ្លាំង និងទំនងជាទើបចេញមកពីកន្លែងផឹក និយាយស្តាប់គ្នាមិនបាន និងបានឡើងជិះម៉ូតូឌុបទៅបាត់ស្រមោល ។
ក្រោយពេលកើតហេតុកម្លាំងនគរបាលចរចរណ៍នគរបាលក្រុងក៏បានរាយការណ៍ទៅប្រាប់កម្លាំងនគរបាលមូលដ្ឋានឲ្យចុះមកមើលកន្លែងគ្រោះថ្នាក់ចរចរណ៍ខាងលើ និងរង់ចាំអស់រយៈពេលជិតមួយម៉ោងទើបបានឃើញស្ត្រីពីរនាក់ដែលអះអាងថា ជាប្រពន្ធ និងប្អូនថ្លៃតំណាងខាងរថយន្តបាឡែនបានមកដល់ធ្វើការដោះស្រាយដោយយល់ព្រមសងថ្លៃខូចខាតទៅដល់ភាគីរថយន្ត ford ចំនួន១០០ដុល្លារបញ្ចប់រឿងផងដែរ ៕
ចែករំលែកព័តមាននេះ