ខេត្តកំពង់ឆ្នា្ំង ៖ សពយុវជនម្នាក់និងម៉ូតូ ត្រូវបានគេប្រទះឃើញនៅក្នុងប្រឡាយ ដែលភ្លាមៗគេស្មានថាជាការជិះម៉ូតូធ្លាក់ប្រឡាយស្លាប់ តែលុះពិនិត្យស្លាកស្នាមគឺបង្ហាញច្បាស់ថា ទាំងអ្នកស្លាប់និងម៉ូតូត្រូវបានគេអូសយកទៅទម្លាក់ចោលក្នុងប្រឡាយ ដែលមានចម្ងាយប្រមាណ៨ម៉ែត្រពីកន្លែងកើតហេតុ ។
តាមព័ត៌មានថា គ្រោះថ្នាក់ចរាចរណ៍មួយបានកើតឡើងកាលពីវេលាម៉ោងប្រមាណ១០និង១៥នាទីយប់ថ្ងៃទី៨ ខែវិច្ឆិកា នៅតាមផ្លូវក្រាលក្រួសក្រហម ស្ថិតក្នុងភូមិវាលស្បូវ ឃុំតាំងក្រសាំង ស្រុកទឹកផុស ។ប្រភពពីចនគរបាលមូលដ្ឋាន បានឲ្យដឹងថា ជនរងគ្រោះឈ្មោះ សែម សេះ អាយុ២៣ឆ្នាំ មានទីលំនៅក្នុងភូមិភ្នំតាសាំ ឃុំក្រាំងស្គារ ស្រុកទឹកផុស ។
មុនពេលកើតហេតុយុវជនខាងលើបានជិះម៉ូតូហុងដាសេ១២៥ ពណ៌ខ្មៅ ពាក់ផ្លាកលេខ ព្រះសីហនុ ១A-៣០៧១ បើកបរពីខាងជើងទៅខាងត្បូង លុះទៅដល់ចំណុចកើតហេតុ គេមិនបានដឹងថាបុកជាមួយអ្វីនោះទេ ។ ប៉ុន្តែតាមការស្រាវជ្រាវរបស់សមត្ថកិច្ចបានសង្ស័យថា បានបុកជាមួយនឹងគោយន្តដឹកឈើ ហើយក្រោយកើតហេតុ សពជនរងគ្រោះរួមទាំងម៉ូតូត្រូវបានភាគីបង្កអូសយកទម្លាក់ចូលក្នុងប្រឡាយពីខាងលិចផ្លូវចម្ងាយប្រមាណ៨,៥ម៉ែត្ររួចហើយអ្នកបើកបរគោយន្តក៏គេចខ្លួនបាត់ទៅ ។
ប្រភពដដែលបន្តថា នៅព្រឹកថ្ងៃទី៩ ខែវិច្ឆិកា សមត្ថកិច្ចបានចុះទៅពិនិត្យនិងកំណត់ថា ពិតជាមានគ្រោះថ្នាក់ចរាចរណ៍ដូចខាងលើមែនហើយត្រូវបានភាគីម្ខាងនោះ អូសសពនិងម៉ូតូទម្លាក់ចោលក្នុងប្រឡាយដើម្បីបំបាត់ដាន ។ ក្រោយពីការពិនិត្យសពរួចហើយសមត្ថកិច្ចបានប្រគល់សពជនរងគ្រោះទៅឲ្យក្រុមគ្រួសារដើម្បីធ្វើបុណ្យតាមប្រពៃណី ចំណែកម៉ូតូត្រូវបានយកទៅរក្សាទុកដើម្បីបន្តការស្រាវជ្រាវរកជនបង្កគ្រោះថ្នាក់មកដោះស្រាយតាមផ្លូវច្បាប់ ៕
ចែករំលែកព័តមាននេះ