រាជធានីភ្នំពេញ ៖ លំនៅឋានប្រជាពលរដ្ឋចំនួន៣ខ្នងផ្ទះ ត្រូវបានអគ្គិភ័យឆាបឆេះបំផ្លាញអស់ទាំងស្រុង បង្កការភ្ញាក់ផ្អើលទាំងព្រឹកថ្ងៃទី១២ ខែវិច្ឆិកា ឆ្នាំ២០១៨ ស្ថិតតាមបណ្តោយផ្លូវលេខ៣៦៩ ក្នុងក្រុមទី១១ ភូមិអូរអណ្តូង១…
រាជធានីភ្នំពេញ ៖ លំនៅឋានប្រជាពលរដ្ឋចំនួន៣ខ្នងផ្ទះ ត្រូវបានអគ្គិភ័យឆាបឆេះបំផ្លាញអស់ទាំងស្រុង បង្កការភ្ញាក់ផ្អើលទាំងព្រឹកថ្ងៃទី១២ ខែវិច្ឆិកា ឆ្នាំ២០១៨ ស្ថិតតាមបណ្តោយផ្លូវលេខ៣៦៩ ក្នុងក្រុមទី១១ ភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។
លំនៅឋានដែលត្រូវអគ្គិភ័យឆាបឆេះ ជាសំណង់ថ្មក្រោមឈើលើ និងមានផ្ទៃទំហំចន្លោះពី៤ម៉ែត្រគុណ៦ម៉ែត្រ ដល់៨គុណ៦ម៉ែត្រ ហើយផ្ទះទាំង៣ខ្នងខាងកលនេះជាកម្មសិទ្ធិរបស់មនុស្ស៣នាក់ដែលជាម្តាយកូននឹងគ្នា ។
យោងតាមប្រភពព័ត៌មានអោយដឹងថា នៅមុនពេលកើតហេតុ គេឮសូរសំឡេងផ្ទុះចេញពីក្នុងផ្ទះ១ខ្នង ក្នុងចំណោមផ្ទះទាំង៣ខាងលើ លុះមួយសន្ទុះក្រោយមកស្រាប់តែមានផ្សែងហ៊ុយចេញពីក្នុងផ្ទះមកខាងក្រៅ លាយឡំជាមួយអណ្តាតភ្លើងផងដែរ បង្កអោយម្ចាស់ផ្ទះរត់ស្រវេស្រវាចេញមកខាងក្រៅទាំងអស់គ្នា ស្រែកឆោរឡោអោយគេឯងជួយ បង្កការភ្ញាក់ផ្អើលតែម្តង ។
ភ្លាមៗនោះ កម្លាំងអាជ្ញាធរចម្រុះ មានកម្លាំងនគរបាល កម្លាំងប្រជាការពារជាច្រើននាក់ ដឹកនាំដោយលោកចេង មុនីរ៉ា អភិបាលខណ្ឌច្បារអំពៅ បានចុះអន្តរាគមន៍ផងដែរ ក្នុងនោះរថយន្តពន្លត់អគ្គិភ័យជាច្រើនគ្រឿងក៏បានទៅដល់ ដើម្បីអន្តរាគមន៍បាញ់ទឹកពន្លត់អណ្តាតភ្លើង ។
បន្ទាប់ពីមានការអន្តរាគមន៍យ៉ាងយកចិត្តទុកដាក់ អណ្តាតភ្លើងត្រូវរលត់សូន្យសុងទៅវិញនៅវេលាម៉ោង៧ និង៤៥នាទីព្រឹកថ្ងៃដដែល ក្នុងហេតុការណ៍អគ្គិភ័យខាងលើបានបំផ្លាញផ្ទះចំនួន៣ខ្នងអស់ទាំងស្រុងតែម្តង ។
ក្នុងការឆាបឆេះខាងលើ កម្លាំងនគរបាលបានប្រើប្រាស់រថយន្តពន្លត់អគ្គិភ័យអស់៦គ្រឿង ក្នុងចំណោមរថយន្តជាច្រើនគ្រឿងដែលបានទៅដល់ ដោយប្រើប្រាស់ពេលវេលាជិត១ម៉ោងក្នុងការបាញ់ទប់ស្កាត់អណ្តាតភ្លើងអោយរលត់សូន្យសុងទៅវិញបានមួយរយភាគរយ ។ តាមប្រភពពីមន្ត្រីសមត្ថកិច្ចជំនាញ អោយដឹងថា ចំពោះមូលហេតុនៃការឆាបឆេះ គឺបណ្តាលមកពីទុស្សេចរន្តអគ្គិសនី ៕
ចែករំលែកព័តមាននេះ