រាជធានីភ្នំពេញ ៖ កម្មការិនីជាង៤០នាក់ និងកម្មករ២នាក់បានដួលសន្លប់ជាបន្តបន្ទាប់គ្នានៅចុងម៉ោងដែលដល់ពេលត្រូវឈប់សម្រាកហូបបាយថ្ងៃត្រង់ទៅហើយនោះ ។ ចំណែកមូលហេតុនៃការដួលសន្លប់បែបនេះមិនទាន់ត្រូវបានគេដឹងច្បាស់នៅឡើយទេ ប៉ុន្តែតាមកម្មករភាគច្រើនបានអះអាងចោទប្រកាន់ទៅលើបុរសដែលជាអ្នកបកប្រែភាសាចិនម្នាក់ថា ជាអ្នកបង្ក ។
ដោយបុរសនោះខឹងសម្បាកម្មករក្រុមឡាញទី៧ ហើយបានស្រែកឡូឡាលាន់ឮពេញអគាររោងចក្រធ្វើឲ្យកម្មការិនីម្នាក់ភ័យតក់ស្លុតរហូតដួលសន្លប់ ភ្លាមៗនោះកម្មការិនីជាច្រើននាក់ដែលធ្វើការក្បែរនោះឃើញបែបនេះ មានការជ្រួលច្របល់ ហើយក៏បានដួលសន្លប់ជាបន្តបន្ទាប់បែបនេះតែម្ដង ។ ហេតុការណ៍នោះបានកើតឡើង កាលពីវេលាម៉ោង១០និង៤០នាទីព្រឹកថ្ងៃទី១២ ខែវិច្ឆិកា ឆ្នាំ២០១៨ នៅក្នុងរោងចក្រកាត់ដេរសម្លៀកបំពាក់យីហោ «ហ្គ្រីនមីដូវ ឌីវេឡុបមេន ខេមបូឌា ខូអិលធីឌី» ដែលមានទីតាំងស្ថិតនៅក្នុងភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។
កម្មករកម្មការិនីដែលដួលសន្លប់ទាំងនោះត្រូវបានក្រុមរថយន្តសង្គ្រោះរបស់អង្គភាព៧១២ ដឹកយកទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗ ។ ចំណែករោងចក្រត្រូវបានបិទទ្វារជាបណ្ដោះអាសន្ន ព្រោះកម្មករកម្មការិនីបាននាំគ្នារត់ចេញក្រៅអស់ គ្មានអ្នកធ្វើការឡើយ ។ កម្មករបាននិយាយថា ការដួលសន្លប់ជាបន្តបន្ទាប់នេះ ផ្ដើមចេញពីអ្នកបកប្រែភាសាចិនម្នាក់ដោយនៅមុនពេលកើតហេតុ ខណៈកម្មករទាំងអស់កំពុងធ្វើការងារញាប់ដៃញាប់ជើង ។ ស្រាប់តែបុរសជាអ្នកបើកបរភាសាចិនដែលមានចិត្តក្ដៅ និងស្រាលដូចសំឡីបានមានទំនាស់ជាមួយកម្មករក្រុមឡាញទី៧ ។ ខណៈនោះបុរសខាងលើមិនបានដោះស្រាយតាមសន្តិវិធីនោះទេ បែរជាស្រែកឡូឡាទៅតាមកំហឹងរបស់ខ្លួន បង្កសម្លេងខ្លាំងៗលាន់ឮពេញក្នុងអគាររោងចក្រតែម្ដង ។ បន្ទាប់ពីមានរឿងបែបនេះកើតឡើងបានធ្វើឲ្យកម្មការិនីម្នាក់ភិតភ័យរហូត ដួលសន្លប់ទាំងកម្រោល ។
ប្រភពដដែលបានបន្តទៀតថា ពេលនោះជិតដល់ម៉ោងចេញហូបបាយថ្ងៃត្រង់ទៅហើយ និងបានបង្កឲ្យមានការជ្រួលច្របល់យ៉ាងខ្លាំង ហើយកម្មការិនីផ្សេងៗទៀតឃើញបែបនេះមានអារម្មណ៍តក់ស្លុតតាម ក៏បានដួលសន្លប់តៗគ្នា ។ ចំណែកអ្នកដែលមិនដួលសន្លប់បាននាំគ្នារត់សម្រុកចេញក្រៅទាំងសភាពស្លន់ស្លោ ហើយរោងចក្រក៏ត្រូវបានបិទទ្វារជាបណ្ដោះអាសន្នផងដែរ ។
ចំណែកក្រុមកម្មករដែលដួលសន្លប់ត្រូវបានរថយន្តក្រុមសង្គ្រោះអង្គភាព៧១១ ជាច្រើនគ្រឿងបាននាំយកទៅសង្គ្រោះបន្ទាន់ភ្លាមៗ ហើយមិនមានអ្នកស្លាប់បាត់បង់ជីវិតឡើយ ។ ដោយឡែកអាជ្ញាធរ និងសមត្ថកិច្ចមូលដ្ឋានបានចេញអន្តរាគមន៍ និងពិនិត្យពីស្ថានភាពជាក់ស្ដែងនៅក្នុងរោងចក្រនោះ ប៉ុន្តែមិនទាន់បញ្ជាក់ពីមូលហេតុពិតប្រាកដនៃការដួលសន្លប់នេះក្រៅពីការអះអាងរបស់ក្រុមកម្មករកម្មការិនីខាងលើនោះនៅឡើយទេ ៕
ចែករំលែកព័តមាននេះ