រាជធានីភ្នំពេញ ៖ រថយន្តដឹកម្នាងសិលា សង្ស័យដឹកលើទម្ងន់ ពេលចុះផ្លូវចំណោត ធ្លាក់ជង្ហុកក៏ក្រឡាប់តែម្តង សំណាងល្អមិនមានអ្នករបួស ករណីនេះបានបង្កការភ្ញាក់ផ្អើកាលពី៩និង២០នាទីព្រឹកថ្ងៃទី១២ វិច្ឆិកា ២០១៨នៅចំណុចផ្លូវ២០១១កែងផ្លូវបេតុងខាងជើងសាលារៀនបឋមសិក្សា ប៊ុន រ៉ានី ហ៊ុនសែន សាមគ្គី ភូមិដំណាក់ សង្កាត់គោកឃ្លៀង ខណ្ឌសែនសុខ។
ប្រភពនៅកន្លែកើតហេតុខាងលើបានឲ្យដឹងថា មុនកើតហេតុ គេឃើញរថយន្តមួយគ្រឿងម៉ាកហ៊ីយ៉ាន់ដាយ មានដឹកសន្លឹកម្នាងសិលាពេញ ពណ៌ស ពាក់ស្លាកលេខ ភ្នំពេញ ៣E-៣៧៨៥ បើកបរដោយបុរសម្នាក់មិនត្រូវបានគេប្រាប់ពីអត្តសញ្ញាណ។
រថយន្តខាងលើបានបើកបរមកពីជើងទៅត្បូងតាមផ្លូវ២០១១ លុះមកដល់ចំណុចកើតហេតុ រថយន្តបានព្យាយាមបត់ស្តាំមកផ្លូវបេតុងវិញ ក៏បានធ្លាក់ជង្ហុកជិតនោះ គាប់ជួនរថយន្តដឹកធ្ងន់ផងក៏ផ្អៀងក្រឡាប់តែម្តង សំណាងល្អមិនមានអ្នករបួស។
ក្រោយហេតុការណ៍នេះកើតឡើង សមត្ថកិច្ចមូលដ្ឋានបានចុះដល់គោលដៅខាងលើជួយសំរួលចរាចរណ៍ដើម្បីកុំឱ្យកកស្ទះ ។
ដោយសារការក្រឡាប់រថយន្តខាងលើមិនមានប៉ះពាល់អ្នកដំណើរ ទើបសមត្ថកិច្ចបានអោយម្ចាស់រើបន្ទះម្នាងសិលាចេញ និងរករថយន្តមកស្ទូចដោយខ្លួនឯង ៕
ចែករំលែកព័តមាននេះ