រាជធានីភ្នំពេញ ៖ ជនសង្ស័យម្នាក់ដែលជាមុខសញ្ញាចោរប្លន់ប្រដាប់អាវុធផង និងជាអ្នកជួញដូរគ្រឿងញៀនទ្រង់ទ្រាយធំផង បានមានទំនាក់ទំនងជាសម្ងាត់ជាមួយទណ្ឌិតម្នាក់ ដែលកំពុងជាប់ឃុំក្នុងពន្ធនា
គារព្រៃ.សយ៉ាងជិតស្និទ្ធ ទាំងការរកស៊ីជួញដូរអាវុធ និងគ្រឿងញៀនទ្រង់ទ្រាយធំជាមួយគ្នា ។
ប៉ុន្តែទីបំផុត ជននេះនិងបក្សពួកត្រូវនគរបាលចាប់ខ្លួនបានទើបសារភាពថា «ខ្លួនបានទិញកាំភ្លើងទំនើប១ដើមតម្លៃ២០០០ដុល្លារ រួមនិងថ្នាំញៀនម្ដងៗ១គីឡូក្រាម ពីទណ្ឌិតម្នាក់ឈ្មោះ ល័ក្ខ អាយុប្រហែល២៨ឆ្នាំ ដែលកំពុងជាប់គុកព្រៃ.ស តាមរយៈទូរស័ព្ទ ។
ពិតជាគួរឱ្យភ្ញាក់ផ្អើលពន់ពេក តាមរយៈការសារភាពនេះ ដែលមានទាក់ទងទៅនឹងអ្នកទោសដែលកំពុងជាប់គុកព្រៃសនោះ ។ ជននេះសារភាពទៀតថា ពេលទូរស័ព្ទទៅទិញម្តងៗឈ្មោះ ល័ក្ខ បានតម្រូវឲ្យវេរលុយតាមវីងជាមុន ទើបបានប្រាប់ឲ្យខ្លួនទៅយកទំនិញ ដែលកប់ដីទុកនៅតាមផ្លូវអូរដឹមកប់ស្រូវ ។
តាមរយៈការសារភាពនេះបានបង្ហាញថា មេខ្លោងឈ្មោះ ល័ក្ខ ដែលជាប់គុកនោះមានដៃជើងប៉ុន្មាននាក់នោះទេ ។ តាមមន្ត្រីប៉ូលិសបានចោទថា ជនសង្ស័យរូបនេះ ជិះម៉ូតូកាន់កាំភ្លើងគ្រវីឌឺដាក់នគរបាលធ្លាប់បាញ់តបតដៃជាមួយកម្លាំងនគរបាលស្រុកឧដុង្គ ខេត្តកំពង់ស្ពឺ ដែលធ្វើឲ្យនគរបាលបះសក់ដោយសារពួកគេទៀតផង ។ ប៉ុន្តែមកត្រូវអស់លក្ខណ៍ ក្រោមកណ្ដាប់ដៃនគរបាលស្រុកអង្គស្នួល ខេត្តកណ្ដាល ។
ជនសង្ស័យខាងលើ រួមនិងបក្សពួកម្នាក់ត្រូវបានកម្លាំងនគរបាលផ្នែកព្រហ្មទណ្ឌ និងផ្នែកប្រឆាំងគ្រឿងញៀនស្រុកអង្គស្នួល រួមជាមួយកម្លាំងនគរបាលប៉ុស្តិ៍ម្កាក់ បានចាប់ខ្លួនវេលាម៉ោង៥និង៣០នាទីល្ងាចថ្ងៃទី៩ វិច្ឆិកា នៅចំណុចក្នុងភូមិវែង ឃុំម្កាក់ ស្រុកអង្គស្នួល ក្នុងខណៈពេលដែលជននេះ ត្រៀមចេញធ្វើសកម្មភាពប្លន់។ មន្ត្រីប៉ូលិសថា ជននេះក៏មានដីកាចាប់ខ្លួនរបស់សាលាដំបូងខេត្តកណ្ដាលផងដែរ ។
នគរបាលបានឲ្យដឹងថា ជនសង្ស័យដែលត្រូវចាប់ខ្លួនទាំង២នាក់ម្នាក់ឈ្មោះ កែវ ក្រូច អាយុ៣១ឆ្នាំ មុខរបរជួញដូរគ្រឿងញៀន និងប្លន់ មានទីលំនៅក្នុងភូមិខាងលើ ហើយជននេះមានដីកាចាប់ខ្លួនលេខ៖០១០ ដ.ក.ប.ច ខ/១៧ ចុះថ្ងៃទី៣ ខែមករា ឆ្នាំ២០១៨ ពីបទ៖ ជួញដូរដោយខុសច្បាប់ នូវសារធាតុញៀន ចេញដោយលោក ចៅក្រមគឹម ម៉េង ។ ឯម្នាក់ទៀតឈ្មោះ សយ យ៉ា អាយុ២៤ឆ្នាំ មានទីលំនៅក្នុងភូមិជាមួយគ្នា និងម្នាក់ទៀតដែលគេចខ្លួនរួចឈ្មោះ សយ ម៉ៅ អាយុ២២ឆ្នាំ មានទីលំនៅក្នុងភូមិជាមួយគ្នាដែរ ។
ក្រោយចាប់ខ្លួន នគរបាលបានដកហូតកាំភ្លើងខ្លីទំនើបម៉ាក CF98-9 លេខ៖ 004980 07236,គ្រាប់ចំនួន២០គ្រាប់, សំបកគ្រាប់កាំភ្លើងខ្លី១គ្រាប់ អាវុធច្នៃបាញ់គ្រាប់កាំកង់២ដើម, ជញ្ជីងថ្លឹង ថ្នាំញៀន១គ្រឿង, ថ្នាំញៀន៣កញ្ចប់ធំ, ឯកសណ្ឋានយោធាប៉ារ៉ា១កំប្លេ និងឧបករណ៍សម្រាប់ប្រើប្រាស់គ្រឿងញៀន មួយចំនួនទៀត ។
ជនសង្ស័យឈ្មោះ កែវ ក្រូច បានសារភាពប្រាប់នគរបាលថា ខ្លួនជាម្ចាស់កាំភ្លើងខ្លីនិងថ្នាំញៀនដោយខ្លួនបានទិញពីឈ្មោះ ល័ក្ខ ដែលជាទណ្ឌិតកំពុងជាប់ឃុំនៅពន្ធនាគារព្រៃស ។ ការទិញនេះគឺតាមរយៈទូរស័ព្ទ និងមិនដែលបានជួបផ្ទាល់ទេ គឺឲ្យតែខ្លួនចង់ទិញពេលណាបានពេលនោះ និយាយរួមនៅក្រោយពេលវេរលុយឱ្យមុនរួច គឺបានទំនិញហើយ ។
ជនសង្ស័យរូបនោះបានបញ្ជាក់ថា កាំភ្លើងខ្លីម៉ាក CF98-9 មួយដើមនោះខ្លួនបានទិញពីឈ្មោះល័ក្ខកាលពីដើមខែសីហា ឆ្នាំ២០១៨ក្នុងតម្លៃ២០០០ដុល្លារ ដោយកាលណោះខ្លួនបានទូរស័ព្ទទាក់ទងជននេះ ។ បន្ទាប់ពីចរចាតម្លៃត្រូវគ្នា និងវេរលុយទៅឲ្យមុនរួចហើយ ឈ្មោះ ល័ក្ខ បានប្រាប់ឲ្យខ្លួនទៅយកកាំភ្លើងខ្លីនោះដែលកប់ដីនៅក្នុងព្រៃ តាមផ្លូវអូរដឹមកប់ស្រូវ ក្នុងភូមិសាស្ត្ររាជធានីភ្នំពេញ ដែលអ្នកលក់បានប្រាប់ពីទីតាំងនិងសញ្ញាសម្គាល់ច្បាស់លាស់ទៀតផង ។
លុះពេលទៅដល់ខ្លួនបានគាស់យកកាំភ្លើងចេញមកប្រើប្រាស់បានដូចបំណង ។ ចំណែកគ្រឿងញៀនក៏ដូចគ្នាដែរ ខ្លួនបានទិញពីឈ្មោះ ល័ក្ខ តាមរយៈទូរស័ព្ទម្ដងៗ១គីឡូក្រាម ។ ដោយឈ្មោះ ល័ក្ខ បានឲ្យទៅកាយយកចេញពីក្នុងដីតាមផ្លូវអូរដឹមកប់ស្រូវនោះដែរ ហើយខ្លួនមិនបានដឹងថាបក្សពួកឈ្មោះល័ក្ខដែលយកកាំភ្លើងនិងថ្នាំញៀនទៅកប់សម្រាប់លក់ឲ្យខ្លួននោះ ជានរណាឡើយ ប៉ុន្តែដូចជារបស់ទិព្វអុីចឹង ឲ្យតែចង់កុម្ម៉ង់ទិញពេលណាបានពេលនោះឲ្យតែវេរលុយទៅឲ្យមុន ។
ជនសង្ស័យខាងលើបានបន្តទៀតថា ខ្លួនលក់គ្រឿងញៀន១គីឡូក្រាម ត្រឹមតែ២ទៅ៣ថ្ងៃប៉ុណ្ណោះអស់ហើយ ក៏បានខលទៅរកឈ្មោះល័ក្ខ នៅពន្ធនាគារព្រៃសដើម្បីយកមកលក់បន្តទៀត ។ មិនតែប៉ុណ្ណោះកន្លងមកខ្លួនបានយកាំភ្លើងខ្លី១ដើមនោះទៅធ្វើសកម្មភាពប្លន់យកម៉ូតូម៉ាកយ៉ាម៉ាហាស៊ីរូស១គ្រឿងពីអ្នកដំណើរតាមផ្លូវក្នុងភូមិស្ដុកឆ្លាត ឃុំភ្នំតូច ស្រុកឧដុង្គ ខេត្តកំពង់ស្ពឺបានសម្រេច និងធ្លាប់បានបាញ់តដៃគ្នាជាមួយនគរបាលស្រុកឧដុង្គថែមទៀតផង ។
ទោះបីជាបែបនេះក្តី នគរបាលបានប្រាប់ថា ជនសង្ស័យមិនមែនទើបប្លន់បានសម្រេច១លើកនេះទេ គឺរាប់មិនអស់ទៅហើយ។ នគរបាលស្រុកឧដុង្គ ខេត្តកំពង់ស្ពឺបានកំណត់មុខសញ្ញាយ៉ាងច្បាស់ ព្រោះជននេះធ្លាប់ជិះម៉ូតូកាន់កាំភ្លើងខ្លីគ្រវីដាក់នគរបាល និងបាញ់ចំនួន៤គ្រាប់តដៃរំដោះខ្លួន នៅពេលនគរបាលចុះប្រតិបត្តិការបង្ក្រាប ។
ទាក់ទិននឹងការសារភាពរបស់ជនសង្ស័យនេះ មិនទាន់មានការបំភ្លឺផ្លូវការណាមួយថា ជាការពិតឬបែបណានោះទេ រឿងទិញតពីអ្នកជាប់ពន្ធនាគារព្រៃស ព្រោះការប្រាស្រ័យទាក់ទងតាមទូរស័ព្ទទៅអ្នកជាប់គុក វាហាក់ដូចជាងាយពេកហើយ ៕
ចែករំលែកព័តមាននេះ