រាជធានីភ្នំពេញ ៖ ជាសារនយោបាយយ៉ាងមុតស្រួចមួយរបស់ប្រមុខដឹកនាំគណបក្សកាន់អំណាចដែលបានដឹកនាំប្រទេសជាង៣០ឆ្នាំមកនេះ ទៅកាន់អតីតមេបក្សប្រឆាំងគឺលោក សម រង្ស៊ី ដែលចង់ឲ្យមានការដោះលែងលោក កឹម សុខា ដែលកំពុងជាប់ក្នុងផ្ទះ គឺ១០០០ឆ្នាំទៀតក៏គ្មានទោសសម្រាប់លើកលែងដែរ ។
សម្តេចតេជោបានសរសេរលើបណ្តាញសង្គមនៅយប់ថ្ងៃទី១១ ខែវិច្ឆិកានេះ ដែលជាសារមួយ ប្រាប់ទៅលោក សម រង្ស៊ី ដែលអះអាងថា នឹងមានការដោះលែងលោក កឹម សុខា ចន្លោះពីខែធ្នូ រហូតដល់ដើមខែមីនា ឆ្នាំ២០១៩ យ៉ាងដូច្នេះថា ថ្ងៃនេះខ្ញុំបានឃើញវីដេអូមួយដែលគេបាន បង្ហោះតាម YouTube អំពីជនពាល សម រង្ស៊ី ដែលបានសរសេរក្នុង Facebook បបួលខ្ញុំភ្នាល់ អំពីការដោះលែង កឹម សុខា ។ អបដោយវីឌីអូឃ្លីបដែលមានចំណងជើង «សម រង្ស៊ីត្រូវរៀនស្តាប់សំដីរបស់នាយករដ្ឋមន្ត្រី ហ៊ុន សែន ឲ្យច្បាស់» នោះសម្តេចតេជោ ហ៊ុន សែន បានលើកឡើងថា ការបកស្រាយក្នុងវីដេអូឃ្លីបនេះ គឺបានបង្ហាញនូវហេតុផលត្រឹមត្រូវខាងផ្លូវច្បាប់ ដែលខ្ញុំបាននិយាយទាក់ទងជាមួយដែនសមត្ថកិច្ចរបស់នាយករដ្ឋមន្ត្រី ដែលគ្មានចំណុចណាមួយបំពានដល់សមត្ថកិច្ចរបស់តុលាការទាល់តែសោះ ។
នាយករដ្ឋមន្ត្រីពុំមានសិទ្ធស្នើសុំលើកលែងទោសឲ្យអ្នកដែលមិនទាន់បានកាត់ទោស ឬសាលក្រមមិនទាន់ចូលស្ថាពរនោះទេ (ទោះសេះដុះស្នែងក៏មិនកើតឡើងទេ) ។ សម្តេចតេជោគូសបញ្ជាក់ថា «យោងតាមច្បាប់ជាធរមានទោះ១០០០ឆ្នាំទៀត ក៏មិនអាចកើតបានដែរ សម្រាប់ការលើកលែងទោសឲ្យអ្នកដែលមិនមានទោស ឬតុលាការមិនទាន់កាត់ឲ្យមានទោស ឬកាត់ហើយ តែសាលក្រមមិនទាន់ចូលជាស្ថាព កុំថា ឡើយត្រឹមសេះដុះស្នែង ។ តែមនុស្សដែលចូលចិត្តវាយប្រហារខ្ញុំគេអត់ចេះស្តាប់ និងសិក្សាពីសំដីដែលបង្កប់ដោយន័យនយោបាយ និងផ្លូវច្បាប់ដែលខ្ញុំបាននិយាយនោះទេ ដូចនេះទើបគេរៀបអន្ទាក់ដាក់ខ្ញុំពេលនេះ គេដើរជាន់អន្ទាក់ខ្លួនឯងហើយ» ។
ប្រមុខរាជរដ្ឋាភិបាលបន្ថែមដោយសារការភ្នាល់លើកនេះ ជាការភ្នាល់ដាក់ជីវិតនយោបាយដែលអ្នកបបួលខ្ញុំភ្នាល់ គឺជាជនពាលខាងនយោបាយ ដូចនេះតម្រូវឲ្យខ្ញុំត្រូវមានភស្តុតាង និងសូមស្នើឲ្យមេធាវីខ្ញុំរក្សាទុកភស្តុតាងនេះតាមផ្លូវច្បាប់ ។ វីដេអូឃ្លីបនេះខ្ញុំនឹងបង្ហោះក្នុង Facebook ខ្ញុំរហូតដល់ថ្ងៃទី០៣ ខែមិនា ឆ្នាំ២០១៩ ហើយនៅពេលនោះតើនឹងមានអ្វីកើតឡើងដូចដែលជនពាលនេះបានបបួលខ្ញុំភ្នាល់នៅក្នុង Facebook គាត់មែន ឬអត់ ។
យោងតាមខ្លឹមសារដែលធ្វើអត្ថាធិប្បាយបានលើកឡើងយ៉ាងដូច្នេះថា ទណ្ឌិត សម រង្ស៊ី ដែលសុខស្រាប់តែបបួលលោក ហ៊ុន សែន ភ្នាល់ពីរឿងដោះលែងលោក កឹម សុខា ពីថ្ងៃទី២៩ ធ្នូ ឆ្នាំ២០១៨ រហូតដល់ថ្ងៃទី៣ មិនា ឆ្នាំ២០១៩ នោះត្រូវបានអ្នកគាំទ្រលោក កឹម សុខា នឹងមនុស្សទូទាំងខឹងសម្បានឹងផ្ទុះកំហឹងយ៉ាងខ្លាំង ។ យើងតែងតែតាមដាន និងកម្គាល់ឃើញថា សម រង្ស៊ី នេះឈ្នាននីសមិនត្រឹមតែលោក ហ៊ុន សែន ប៉ុណ្ណោះទេតែក៏ឈ្នាននីសអតីតគូសត្រូវរបស់ខ្លួនដែរ គឺ លោកកឹម សុខា ។
ហេតុនេះហើយបានជាម្តងហើយម្តងទៀត សម រង្ស៊ី តែងតែទប់ស្កាត់មុនមិនឲ្យមានការដោះលែងលោក កឹម សុខា ឡើយ ដែលល្បិចបបួលភ្នាល់បែបនេះដែលមិនមែនជាអាថ៏កំបាំង ដែលគ្មានអ្វីពិបាកយល់នោះទេ ។ ឈានពីការស្បថមកបបួលនាយករដ្ឋមន្ត្រី ហ៊ុន សែន ភ្នាល់ទៅវិញនេះ សម រង្ស៊ី បានខិតខំបកស្រាយសំដីបំភ្លៃរបស់លោក ហ៊ុន សែន ដែលថ្លែង កាលពីថ្ងៃទី០៧ វិច្ឆិកា ឆ្នាំ២០១៨ ដោយធ្វើឲ្យគេយល់ថា សេះដុះស្នែងទើបដោះលែង លោកកឹម សុខា ៕
ចែករំលែកព័តមាននេះ