ខេត្តសៀមរាប៖ កុមារា ធុច សាឡិក អាយុ១៤ឆ្នាំ ដែលចេះភាសាបរទេស១៥ភាសា ហើយកំពុងល្បីក្នុងបណ្តាញសង្គមហ្វេសបុ៊កនោះ គឺជាកុមារលក់វត្ថុអនុស្សាវរីយ៍នៅមុខប្រាសាទតាព្រហ្ម ជាមួយម្តាយនិងប្អូនប្រុសឈ្មោះ ធុច តិត្យា អាយុ១២ឆ្នាំ ក៏ចេះ១២ភាសាដែរនោះ មានឪពុកជាជាងគំនូរក្នុងត្រកូលខ្សត់ខ្សោយ ។
តាមសម្តីរបស់ឪពុក កុមារា ធុច សាឡិក លោក សុន វុទ្ធី អាយុ៤១ឆ្នាំ មុខរបរជាងគំនូរ និងប្រពន្ធឈ្មោះ ម៉ាន់ វណ្ណា អាយុ៣៥ឆ្នាំ មុខរបរលក់ដូរ នៅមុខប្រាសាទតាព្រហ្ម បានប្រាប់កោះសន្តិភាពនៅមុខផ្ទះថា គាត់មានកូនចំនួន៣នាក់ (ប្រុសទាំង៣) គឺកូនប្រុសច្បង មានឈ្មោះ ធុច សីហា អាយុ១៦ឆ្នាំ ជាសិស្សថ្នាក់ទី១០ ។ កូនទី២ ឈ្មោះ ធុច សាឡិក អាយុ១៤ឆ្នាំ ដែលចេះភាសាបរទេស១៥ភាសានោះ ជាសិស្សថ្នាក់ទី៩ និងកូនពៅឈ្មោះ ធុច តិត្យា អាយុ១២ឆ្នាំ ជាសិស្សថ្នាក់ទី៥ ពួកគាត់រៀននៅអនុវិទ្យាល័យស្រះស្រង់ ដែលមានទីលំនៅបច្ចុប្បន្ននៅក្រុមទី៥ ភូមិរហាល សង្កាត់នគរធំ ក្រុងសៀមរាប ។
លោកបានបន្តថា ពួកគាត់ទាំង២នាក់បងប្អូនទំនេរពីការសិក្សា ត្រូវបាននាំគ្នាជិះកង់ឌុបគ្នា ទៅជួយលក់វត្ថុអនុស្សាវរីយ៍ជាមួយម្តាយនៅតាមមុខប្រាសាទ ដើម្បីជួយរកប្រាក់បន្ថែមផ្គត់ផ្គង់ ក្នុងក្រុមគ្រួសារ ដោយសារពួកគាត់ឃើញឪពុកម្តាយខ្វះខាត ដើរខ្ចីលុយគេយកមករកស៊ី ទើបពួកគាត់ជួយបែបនេះ ។
លោកបានបញ្ជាក់ទៀតថា តាំងពីរកស៊ីលក់គំនូរអស់រយៈពេលជាង១០ឆ្នាំមក មិនដែលឃើញកូនទាំងអស់ ចេះនិយាយភាសានោះសោះ ទើបរយៈពេលប៉ុន្មានថ្ងៃនេះ ខ្ញុំរំភើបរកអ្វីប្រៀបផ្ទឹមពុំបាន ដោយឃើញគេបង្ហោះក្នុងសង្គមហេ្វសបុ៊ក រហូតដល់មានលោកឧកញ៉ាមួយចំនួន ព្រមទាំងសប្បុរសជន គាត់ផ្ញើលុយឱ្យកូនរបស់ខ្ញុំ ខំរៀនសូត្របន្ថែម រហូតដល់ចប់បរិញ្ញាបត្រ ។
ទោះជាយ៉ាងណាក៏ដោយ ក៏ខ្ញុំសុខចិត្តលំបាកលំបិនឱ្យកូនបានរៀនសូត្របន្តចប់ការសិក្សា និងគេដែរ មិនមែនឃើញពួកគាត់ចេះភាសាបរទេសប៉ុណ្ណឹង មកជួយលក់ដូរឪពុកម្តាយ ដើម្បីឱ្យពួកគាត់ឈប់រៀននោះទេ ដូច្នេះខ្ញុំមិនឱ្យពួកគាត់ឈប់រៀនជាដាច់ខាត ។
ចំណែកការលក់ដូររបស់ពួកគាត់នៅតាមប្រាសាទនោះ វាមិនសូវជាដាច់ប៉ុន្មានទេ បានតែម៉ារស់ ។ ចំណែកវត្ថុអនុស្សាវរីយ៍ ដែលគាត់ទិញពីគេយកទៅលក់នោះមានដូចជា៖ ខ្លុយ, ផ្លិត, ម៉ាកាណែត (ដែកឆក់), កន្ទ្រៃកាត់ក្រចក ។ល។ រីឯរូបគំនូរដែលខ្ញុំគូរ ក្នុង១ផ្ទាំង ត្រូវគូររយៈពេល២ថ្ងៃ ទើបបានយកទៅលក់ ក្នុង១ផ្ទាំង លក់បានតម្លៃចាប់ពី៥ដុល្លារ ទៅដល់១៥ដុល្លារ ក្នុង១អាទិត្យ ទើបដាច់បាន១ ។
កុមារា ធុច សាឡិក អាយុ១៤ឆ្នាំ ដែលចេះនិយាយភាសាបរទេសចំនួន១៥ភាសា ជាកូនជាងគំនូររូបនេះ បាននិយាយពីភាសាទាំង១៥ភាសា ដែលខ្លួនអាចនិយាយបាន ប្រាប់ភ្នាក់ងារកោះសន្តិភាពយើងថា ភាសាទាំង១៥នោះមាន៖ ១-ភាសារខ្មែរ ។ ២-ភាសាអង់គ្លេស ។ ៣-ភាសាចិនកាតាំង ។ ៤-ភាសាចិនកុកងឺ ។ ៥-ភាសាចិនហៃណាំ ។ ៦-ភាសា រុស្ស៊ី ។ ៧-ភាសាបារាំង ។ ៨-ភាសាថៃ ។ ៩-ភាសាវៀតណាម ។ ១០-អេស្ប៉ាញ ។ ១១-សាំងហ្គាពួរ ។ ១២-កូរ៉េ ។ ១៣-ម៉ាឡេស៊ី ។ ១៤-ហ្វ៊ីលីពីន និង១៥-ជប៉ុន ដែលភាសាទាំងអស់នេះ គឺចេះមកពីរបរលក់ដូរ និងរៀនបន្ថែម ។
ចំណែកលោក ភៀង ពៅ មេភូមិរហាលបានមានប្រសាសន៍ថា តាំងពីគាត់ធ្វើជាមេភូមិមក មិនដែលមានបងប្អូនប្រជាពលរដ្ឋណា ដូចកូនលោក សុន វុទ្ធីនេះទេ ដែលធ្វើឱ្យភូមិរហាលទាំងមូល មានកិត្តិយស ល្បីល្បាញ ខ្ទរខ្ទារពេញសង្គមហ្វេសបុកដោយសារកុមារា ធុច សាឡិក អាយុ១៤ឆ្នាំ ដែលចេះនិយាយភាសាបរទេសចំនួន១៥ភាសា គួរឱ្យរំភើបរកអ្វីប្រៀបប្រដូចគ្មាន មានតែជូនពរឱ្យក្មួយខិតខំបន្ថែមទៀត។
រីឯអ្នកស្រី ធារ៉ា មគ្គុទេសទេសចរណ៍ចិន បានប្រាប់កោះសន្តិភាពនៅមុខប្រាសាទតាព្រហ្មថា តាំងពីគាត់ចូលបកប្រែភាសាចិន ទៅតាមប្រាសាទមក មិនដែលឃើញក្មេងណាចេះនិយាយភាសាបរទេសច្រើនដូចកុមារា ធុច សាឡិកនេះទេ យ៉ាងច្រើនម្នាក់ៗចេះតែ២ទៅ៣ភាសាប៉ុណ្ណោះ ។ ចំណែកកុមារា សាឡិក នេះ ចេះទៅដល់១៥ភាសា គ្រាន់តែគាត់លក់វត្ថុអនុស្សាវរីយ៍ប៉ុណ្ណឹងសោះ បើបរទេសចិនដូចពួកខ្ញុំ គាត់រត់មកនិយាយភាសាចិន បើបរទេស ជនជាតិជប៉ុនគាត់និយាយភាសាជប៉ុន បរទេស ថៃមក រត់ទៅនិយាយភាសាថៃ ហើយការលក់ដូររបស់ពួកគាត់នោះ គឺលក់បានត្រឹមតែមុខរបងខ្លោងទ្វារប៉ុណ្ណោះ មិនអាចចូលលក់ដល់ក្នុងប្រាសាទបានទេ ដោយសារខាងសមត្ថកិច្ច ហាមឃាត់ ៕
ចែករំលែកព័តមាននេះ