ខេត្តបាត់ដំបង ៖ ស្ត្រីម្នាក់ត្រូវរថយន្តបុកស្លាប់ទាំងព្រឹក ពេលកំពុងជិះម៉ូតូ កាលពីវេលាម៉ោង៦ និង១០នាទីព្រឹក ថ្ងៃទី១១ វិច្ឆិកា នៅកំណាត់លើផ្លូវគ្រួសក្រហម ត្រង់ចំណុចភូមិអូរពងមាន់ ឃុំតាគ្រាម ស្រុកបាណន់ ខណៈដែលធ្វើដំណើរផ្ទុយគ្នា។ សមត្ថកិច្ចបានរបាយការណ៍ថា ឧប្បត្តិហេតុគ្រោះថ្នាក់ ចរាចរណ៍នេះ បង្កឡើងដោយរថយន្តម៉ាកហ៊ីយ៉ាន់ដាយពណ៌ស ពាក់ស្លាកលេខ បប3A-1819 អ្នកបើបរមិនស្គាល់សាវតា ព្រោះបានរត់គេចខ្លួនក្រោយបង្កគ្រោះថ្នាក់។
មន្ត្រីដដែលនិយាយថា រថយន្តដឹកទឹកកកអនាម័យលក់ ហើយទំនងជាបែកកង់ទើបជ្រុលចង្កូតទៅបុកស្ត្រីម្នាក់ ដែលកំពុង ជិះម៉ូតូក្នុងទិសដៅផ្ទុយគ្នា បណ្ដាលឲ្យស្លាប់នៅនឹងកន្លែង។ ស្ត្រីរងគ្រោះឈ្មោះ អោក សុខណាង អាយុ៣១ឆ្នាំ រស់នៅភូមិតាង៉ែន ឃុំរាគ្រាម ស្រុកបាណន់ ជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ បប1AB-9273។ សាក្សីនៅកន្លែងកើតហេតុបានប្រាប់សមត្ថកិច្ចថា រថយន្តដឹកទឹក និងអ្នកជិះម៉ូតូបានធ្វើដំណើរផ្ទុយគ្នាពីជើងទៅត្បូង។
ប្រភពដដែលបានបញ្ជាក់ថា ពេលធ្វើដំណើរដល់ចំណុចគ្រោះថ្នាក់ រថយន្តដឹកទឹកកក និងបានផ្ទុះកង់ ខណៈកំពុងបើកលឿនគួរសម ធ្វើឲ្យអ្នកបើកបរគ្រប់គ្រងចង្កូតមិនបានទើបរេចង្កូតទៅខាងស្ដាំបុកអ្នកជិះម៉ូតូចំពីមុខទាំងកំរោលបណ្ដាលឲ្យស្លាប់ភ្លាមៗតែម្ដង។ ប៉ុន្តែខណៈនោះ ពេលកំពុងជ្រួលច្របល់ ស្រាប់តែអ្នកបើករថយន្តបន្លំគេចខ្លួន ពីកន្លែងកើតហេតុបាត់។ ទោះយ៉ាងណា ក្រោយពេលកើតហេតុសមត្ថកិច្ចបានចុះទៅដល់កន្លែងកើតហេតុ ដើម្បីពិនិត្យ និងធ្វើការវាស់វែងភ្លាមៗដែរ។
បើតាមសមត្ថកិច្ចបានវាយតម្លៃជាបឋមថា ឧប្បត្តិហេតុនេះ អាចជាកំហុសខាងភាគីរថយន្តច្រើនជាងភាគីម៉ូតូ។ ព្រោះពេលធ្វើដំណើររថយន្តនោះបានបែកកង់ ហើយរេចង្កូតទៅខាងស្ដាំបុកអ្នកជិះម៉ូតូដែលធ្វើដំណើរផ្ទុយទិសគ្នា។ យ៉ាងណាសពស្ត្រីរងគ្រោះ ត្រូវក្រុមគ្រួសារយកទៅធ្វើបុណ្យតាមប្រពៃណីហើយ រីឯរថយន្ត និងម៉ូតូ ត្រូវបានមន្ត្រីចរាចរខេត្ត នាំយកទៅរក្សាទុកនៅការិយាល័យជំនាញ ដើម្បីរង់ដោះស្រាយតាមផ្លូវច្បាប់៕
ចែករំលែកព័តមាននេះ