រាជធានីភ្នំពេញ ៖ យ៉ាងហោចណាស់មនុស្ស៤នាក់ បានរងរបួសនៅក្នុងឧប្បត្តិហេតុគ្រោះថ្នាក់ចរាចរ រវាងរថយន្តបែនដឹកថ្ម១គ្រឿងបើកបុករថយន្តធុនតូច១គ្រឿងទៀតពេញទំហឹង។ បណ្ដាលឲ្យក្រឡាប់ ខ្លួនឯង ចាក់ថ្មចោលពេញផ្លូវ ចំណែករថយន្តតូចបានរងការខូចខាតយ៉ាងដំណំផងដែរ ហើយជនរងគ្រោះ ដែលរងរបួសនោះគឺអ្នកជិះរថយន្តធំ២នាក់ និងរថយន្តតូច២នាក់។ ឧប្បត្តិហេតុគ្រោះថ្នាក់ចរាចរនោះ បានកើតឡើងកាលពីវេលាម៉ោង២រសៀល ថ្ងៃទី១១ ខែវិច្ឆិកា ឆ្នាំ២០១៨ ស្ថិតនៅលើកំណាត់ផ្លូវ៦០ម៉ែត្រ កែងផ្លូវ៥០ម៉ែត្រ នៅត្រង់ចំណុចភូមិព្រែកថ្លឹង សង្កាត់ជើងឯក ខណ្ឌដង្កោ។
ប្រភពព័ត៌មានបានឲ្យដឹងថា រថយន្តដែលបើកបុកគ្នារហូតដល់ក្រឡាប់នោះ១គ្រឿងម៉ាកHINO ពណ៌ស្លាទុំ ពាក់ស្លាកលេខ កំពង់ស្ពឺ 3A-0671បែនដឹកថ្ម។ ចំណែក១គ្រឿងទៀត ម៉ាកសាយអន ពណ៌ស ពាក់ស្លាកលេខ ភ្នំពេញ 2AL-6634 ហើយអ្នកបើកបររថយន្តទាំង២គ្រឿងនេះមិនត្រូវបានគេស្គាល់អត្តសញ្ញាណឡើយ។ ប្រភពដដែលបានបន្តទៀតថា នៅមុនពេលកើតហេតុរថយន្តបែនដឹកថ្មម៉ាក HINO ពណ៌ស្លាទុំ បើកបរក្នុងល្បឿនយ៉ាងលឿន ក្នុងទិសដៅពីលិចទៅកើតតាមបណ្តោយផ្លូវ៥០ម៉ែត្រ។ ដោយឡែករថយន្ត ម៉ាកសាយអនបើកបរក្នុងទិសដៅពីជើងទៅត្បូងក្នុងល្បឿនលឿនដូចគ្នាតាមបណ្តោយផ្លូវ៦០ម៉ែត្រ។
លុះពេលទៅចំណុចកើតហេតុដែលជាចំណុចផ្លូវខ្វែងក៏បានបុកគ្នាពេញទំហឹង បណ្ដាលឲ្យរថយន្ត សាយអន រងការខូចខាតយ៉ាងដំណំ។ ចំណែករថយន្តដឹកថ្មបានរេចង្កូត ម្ដងឆ្វេងម្ដងស្ដាំរួចក៏ក្រឡាប់ ចាក់ថ្មចោលពេញផ្លូវតែម្ដង។ ប្រភពខាងលើបានបន្តថា ខណៈនោះបណ្ដាលឲ្យអ្នកជិះក្នុងរថយន្ត ទាំង២គ្រឿងនោះ របួសដូចគ្នា គឺរថយន្តតូចរបួស២នាក់ និងអ្នកជិះរថយន្តធំរបួស២នាក់។ ក្រោយពេលកើតហេតុត្រូវបានបញ្ជូនទៅសង្គ្រោះភ្លាមៗបន្ទាប់មកនគរបាលប៉ុស្តិ៍ជើងឯក និងនគរបាលចរាចរខណ្ឌដង្កោ បានចុះទៅវាស់វែង និងនាំយករថយន្តទៅរក្សាទុករង់ចាំការដោះស្រាយនៅពេលក្រោយ៕
https://youtu.be/6RJKVEfwZL8
ចែករំលែកព័តមាននេះ