ខេត្តកំពង់ស្ពឺ ៖ មុខសញ្ញាជនសង្ស័យតែងតែចែកចាយថ្នាំញៀនយ៉ាងសកម្មដែលសមត្ថកិច្ចតាមដានជាយូរមកហើយនោះ ពេលនេះក្របួចបានហើយ ប៉ុន្តែទម្រាំក្របួចជននេះបានមិនធម្មតាទេ ព្រោះគេប្រើគ្រប់រូបភាព ដើម្បីដឹងដំណើររបស់សមត្ថកិច្ចទៀតផង បើទោះជាឆ្លាតយ៉ាងណាចុងក្រោយនៅតែគេចមិនផុតពីសំណាញ់ច្បាប់ដែរ។ ការបង្ក្រាបនេះធ្វើឡើងកាលពីម៉ោង៧និង៥០នាទីយប់ ថ្ងៃទី០៩ ខែវិច្ឆិកា ឆ្នាំ២០១៨ ស្ថិតនៅភូមិទួលសាលា ឃុំទួលសាលា ស្រុកបសេដ្ឋ ខេត្តកំពង់ស្ពឺ ។
ជនសង្ស័យខាងលើឈ្មោះ អ៊ា សេងឡុង ហៅក្ដាន់ ភេទប្រុស អាយុ៣៦ឆ្នាំ រស់នៅកន្លែងឃាត់ខ្លួនកើតហេតុខាងលើ។
ប្រភពពីសមត្ថកិច្ចឱ្យដឹងថា តាមបទបញ្ជារបស់លោកឧត្តមសេនីយ៍ទោ ស្នងការនគរបាលខេត្ត កម្លាំងជំនាញការិយាល័យប្រឆាំងគ្រឿងញៀនសហការជាមួយកម្លាំងប៉ុស្តិ៍នគរបាលរដ្ឋបាលទួលសាលា បង្ក្រាបមុខសញ្ញាចែកចាយ រក្សាទុក ជួញដូរ សារធាតុញៀនខុសច្បាប់យ៉ាងសកម្ម១ករណី ហើយឃាត់ខ្លួនជនសង្ស័យម្នាក់។
ប្រភពបន្តថា ជនសង្ស័យនេះគឺជាមុខសញ្ញាដែលកម្លាំងជំនាញធ្វើការតាមដានជាយូរមកហើយ តែមិនដែលមានឱកាសដើម្បីឃាត់ខ្លួនបានឡើយ ព្រោះជនសង្ស័យនេះ គឺគេឆ្លាតជាងជនសង្ស័យផ្សេងៗ ដោយសារតែគេប្រើគ្រប់រូបភាពតាមដានសមត្ថកិច្ច ជាពិសេសនៅពេលគេចរាចរណ៍ថ្នាំញៀនម្តងៗ សុទ្ធតែមានអ្នកមើលផ្លូវទៀតផង។ ហើយមុនពេលឃាត់ខ្លួនជនសង្ស័យរូបនេះ បានចែកចាយថ្នាំញៀនទៅឱ្យក្រុមអ្នកញៀនថ្នាំ ដើម្បីយកទៅប្រើប្រាស់ ដោយមានអ្នកឃ្លាំមើលផ្លូវសមត្ថកិច្ចទៀត តែទោះជាយ៉ាងណាសមត្ថកិច្ចបានប្រើជំនាញរហូតទាល់តែឃាត់ខ្លួនបាន។
ប្រភពដដែលបន្តទៀតថា បន្ទាប់ពីឃាត់ខ្លួនសមត្ថកិច្ចធ្វើការឆែកឆេរនៅលើខ្លួនជនសង្ស័យរូបនេះ ដោយរកឃើញម្ស៉ៅក្រាម ពណ៌សថ្លា សង្ស័យថា ជាសាធាតុញៀនចំនួន១០កញ្ចប់តូច ទូរស័ព្ទដៃចំនួន6គ្រឿង កន្ត្រៃចំនួន2ដើម ក្នុងនោះមានថង់ផ្លាស្ទិចសម្រាប់វេចខ្ចប់សារធាតុញៀន និងឧប្បករណ៍សំរាប់ប្រើគ្រឿងញៀនមួយចំនួនទៀត ។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា ថ្នាំញៀនទាំងអស់គឺជារបស់ខ្លួនប្រាកដមែន ។ ករណីនេះកម្លាំងជំនាញកំពុងកសាងសំណុំរឿងបញ្ជូនទៅកាន់តំណាងអយ្យការ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ