ខេត្តព្រះវិហារ ៖ កាលពីថ្ងៃទី១៩ មីនា ឆ្នាំ២០១១ លោកបណ្ឌិតម៉ុក ម៉ារ៉េត ទេសរដ្ឋមន្ដ្រី រដ្ឋមន្ដ្រីក្រសួងបរិស្ថានបានដឹកនាំប្រតិភូក្រសួងនាំយកអំណោយប្រគល់ជូនកងទ័ពកំពុងឈរជើងការពារបូរណភាពទឹកដីក្នុងតំបន់ប្រាសាទព្រះវិហារចំនួនពីរកន្លែងទី១-នៅទីបញ្ជាការវរសេនាតូចលេខ៣៨២ក្បែរជើងភ្នំដងរែកខាងលិចប្រាសាទព្រះវិហារ និងទី២-នៅទីបញ្ជាការដ្ឋានកងអង្គរក្សចំណុចទួល៩៥ក្បែរប្រាសាទ
ខេត្តព្រះវិហារ ៖ កាលពីថ្ងៃទី១៩ មីនា ឆ្នាំ២០១១ លោកបណ្ឌិតម៉ុក ម៉ារ៉េត ទេសរដ្ឋមន្ដ្រី រដ្ឋមន្ដ្រីក្រសួងបរិស្ថានបានដឹកនាំប្រតិភូក្រសួងនាំយកអំណោយប្រគល់ជូនកងទ័ពកំពុងឈរជើងការពារបូរណភាពទឹកដីក្នុងតំបន់ប្រាសាទព្រះវិហារចំនួនពីរកន្លែងទី១-នៅទីបញ្ជាការវរសេនាតូចលេខ៣៨២ក្បែរជើងភ្នំដងរែកខាងលិចប្រាសាទព្រះវិហារ និងទី២-នៅទីបញ្ជាការដ្ឋានកងអង្គរក្សចំណុចទួល៩៥ក្បែរប្រាសាទព្រះវិហារ ។ ពិធីនោះរៀបចំឡើងនៅវរៈ៣៨២ ក្រោមអធិបតីភាពលោកនាយឧត្ដមសេនីយ៍ផ្កាយមាស៤ គន់ គីម អគ្គមេបញ្ជាការរងនៃកងយោធពលខេមរភូមិន្ទ និងជានាយសេនាធិការចំរុះប្រចាំទិសខ្សែបន្ទាត់ព្រំដែនខ្មែរ-សៀមដោយមានការចូលរួមពីនាយ-ពលទាហានជាច្រើនរយនាក់ ។
នៅទីបញ្ជាការដ្ឋានកងអង្គរក្សមានការស្វាគមន៍ពីលោកឧត្ដមសេនីយ៍អ៊ុង សារិទ្ធិ មេបញ្ជាការរងបញ្ជាការដ្ឋាន ព្រមទាំងនាយ-ពលទាហានជាច្រើនរយនាក់ ។ លោកនាយឧត្ដមសេនីយ៍ផ្កាយមាស៤ គន់ គីម បានរំលឹកពីការតស៊ូប្ដូរផ្ដាច់របស់វីរកងទ័ពទាំងអស់ដែលប្រឈមមុខទប់ទល់នឹងសត្រូវឈ្លានពានសៀមមកលើអធិបតេយ្យភាពខ្មែរតាមគ្រប់ល្បិចកល។ លោកនាយឧត្ដមសេនីយ៍គន់ គីម បញ្ជាក់ថា ទោះជាសៀមប្រើប្រាស់អាវុធធុនធ្ងន់បាញ់ផ្លោងមកលើកងទ័ពកម្ពុជា ក្នុងមហិច្ឆតាចង់លេបត្របាក់ទឹកដីខ្មែរក្នុងស្ថានភាពដ៏ធ្ងន់ធ្ងរបែបណាក៏ដោយ ក៏វីរកងទ័ពកម្ពុជានៅតែតស៊ូក្រាញននៀលទប់ទល់មិនឱ្យបាត់បង់ទឹកដី សូម្បី១មីល្លីម៉ែត្រឡើយ ។
លោកទេសរដ្ឋមន្ដ្រី ម៉ុក ម៉ារ៉េត កោតសរសើរដល់វីរកងទ័ពដែលលះបង់សាច់ស្រស់ ឈាមស្រស់ក្នុងបុព្វហេតុការពារជាតិទឹកដី និងប្រឈមមុខជាមួយខ្មាំងសៀមឈ្លានពានរហូតការពារបានអធិបតេយ្យរបស់ជាតិខ្មែរ។ អំណោយដែលលោកទេសរដ្ឋមន្ដ្រី ម៉ុក ម៉ារ៉េត យកទៅប្រគល់ជូនកងទ័ពនៅ២កន្លែងស្មើៗគ្នា ដោយមួយកន្លែងៗទទួលបានមី២០០កេសធំ ទឹកសុទ្ធ១៥០កេស ត្រីងៀត៣០០គីឡូក្រាម ត្រីខ២០កេសធំ ប្រេងឆា២០កេសធំ ទឹកស៊ីអ៊ីវ១៥យួរ ឆៃប៉ូវ៤០០គីឡូក្រាម ស៊ីម៉ង់ត៍២០០តោន ដែក២០០តោន សម្រាប់សង់អង្គភាព និងលេណដ្ឋាន ឧបត្ថម្ភថវិកាដល់អង្គភាព១០លានរៀល និងឧបត្ថម្ភថវិកាដល់ដៃនាយ-ពលទាហានក្នុង១ អង្គភាព២០០០នាក់ ក្នុងម្នាក់ៗ៥ម៉ឺនរៀល ៕
ចែករំលែកព័តមាននេះ