រាជធានីភ្នំពេញ៖ តារាសម្តែងកញ្ញាឌី លីណា ហៅពីយ៉ា បានប្រកាសដើរចេញពីពិភពសិល្បៈពាក់កណ្តាលទី ក្នុងពេលដែលវត្តមានសម្តែងរបស់នាងបានលេចឡើងជាបន្តបន្ទាប់ស្ទើរមិនដាច់រយៈទាំងរឿងភាគទូរទស្សន៍ និងរឿងដុំ ។
ឌី លីណា បានប្រកាសដំណឹងដ៏គួរឲ្យភ្ញាក់ផ្អើលមួយនេះតាមរយៈហ្វេសប៊ុកកាលពីពេល ថ្មីៗកន្លងមក ។ នាងបញ្ជាក់ថា បន្ទាប់ពីនាងថតបញ្ចប់ខ្សែភាពយន្តចំនួនបួនរឿងហើយនោះនាងនឹងឈប់ពីសិល្បៈហើយ ។ ដំណឹងនេះបានធ្វើឲ្យប្រិយមិត្តគាំទ្រភ្ញាក់ផ្អើល ។ គេចង់ដឹងពីមូលហេតុយ៉ាងណាដែលធ្វើឲ្យនាងសម្រេចចិត្តបែបនេះ ព្រោះនាងកំពុងតែមានឈ្មោះបោះសំឡេងក្នុងវិស័យភាពយន្តក្នុងរយៈពេលចុងក្រោយនេះ ។ បើទោះបីជាការប្រកាសរបស់ពីយ៉ា វាជាចេតនាពិត ឬគ្រាន់តែជាការនិយាយចោលក៏ដោយ ប៉ុន្តែប្រិយមិត្តគាំទ្ររូបនាងមួយចំនួនមិនចង់ឲ្យនាងដើរចេញពីសិល្បៈទាំងពាក់កណ្តាលទីដូច្នេះឡើយ ។
ពាក់ព័ន្ធទៅនឹងបញ្ហានេះតារាសម្តែងនៅក្នុងរឿង«ភរិយាឥតខាន់ស្លា» នាងពីយ៉ា បានអះអាងប្រាប់កោះសន្តិភាពតាមសារអេឡិចត្រូនិកថា នាងមានបញ្ហាស្មុគស្មាញច្រើននៅក្នុងវិស័យសិល្បៈ។ នាងបញ្ជាក់ថា «ដោយសារតែបញ្ហាច្រើនពេកទើបនាងខ្ញុំមានបំណងចង់ដើរចេញពីសិល្បៈ ដើម្បីបានធូរស្រាលអារម្មណ៍ និងរំសាយភាពស្មុគស្មាញចេញ »។ ពីយ៉ា មិនអាចរៀបរាប់ឲ្យលម្អិតពីបញ្ហាដែលធ្វើឲ្យនាងចង់ដើរចេញពីសិល្បៈឡើយ ខណៈពេលដែលការសម្រេចចិត្តនេះនាងក៏មិនទាន់ប្រាកដច្បាស់នៅក្នុងចិត្តនៅឡើយទេ ។
កញ្ញាពីយ៉ា គឺជាតារាស្រីមួយរូបកំពុងទទួលគាំទ្រ និងលេចធ្លោក្នុងរឿងភាគជាច្រើន ហើយជាពិសេសនាងទើបលេចមុខក្នុងរឿងភាគរបស់ស្ថានីយទូរទស្សន៍លេខ៥គឺរឿង«ភូមិគ្រឹះមួយរយល្បិច» ដោយជានាងតួនាងខ្មោចសាហាវគួរឲ្យខ្លាច ។
កន្លងមកពីយ៉ា បានបង្កការភ្ញាក់ផ្អើលនៅក្នុងពិភពសិល្បៈ បន្ទាប់ពីនាងត្រូវគេសង្ស័យថា បានលួចបង្កាត់ភ្លើងស្នេហ៍ជាមួយលោក សុវណ្ណ មករា ។ បញ្ហាមួយនេះបានធ្វើឲ្យអតីតភរិយារបស់លោកសុវណ្ណ មករា គឺអ្នកនាងឈិន សុធារី ខឹងយ៉ាងខ្លាំង រហូតបង្ហោះសារដៀមដាមជាបន្តបន្ទាប់ ។ ទោះជាយ៉ាងណាក៏ដោយពីយ៉ា បានបដិសេធ ដោយនាងថាមិនមានអ្វីលើសពីការរាប់អានគ្នាជាបងប្អូនទេជាមួយសុវណ្ណ មករា ៕
ចែករំលែកព័តមាននេះ