ប្រទេសយេម៉ែន ៖ ការវាយលុករបស់កងទ័ពរដ្ឋាភិបាលយេម៉ែន ដើម្បីដណ្ដើមយកទីក្រុងកំពង់ផែHODEIDA ពីពួកឧទ្ទាមហ៊ូធី បានក្លាយទៅជាសង្គ្រាមតាមដងវិថី ដែលគំរាមកំហែងដល់អាយុជីវិតជនស៊ីវិលច្រើនពាន់នាក់ ដែលជាប់ក្នុងរង្វង់នៃភ្លៀងគ្រាប់ផ្លោង និងការវាយប្រហារតាមអាកាសយ៉ាងសាហាវ។
ទីក្រុងកំពង់ផែនោះស្ថិតនៅមាត់សមុទ្រក្រហម ជាចំណុចនៃការនាំចូលទំនិញ ៣ភាគ៤របស់ប្រទេស ហើយជាកន្លែងបញ្ជូនជំនួយមនុស្សធម៌អន្តរជាតិ ដល់ប្រទេសរងគ្រោះមហន្តរាយនៃសង្គ្រាម ហើយកំពុងរងការគំរាមនៃគ្រោះទុរ្ភិក្ស។
បើកធ្វើពីខែមិថុនាមក ការវាយលុកលើក្រុង HODEIDA ជួយទ្រទ្រង់ដោយក្រុមចម្រុះអារ៉ាប់ នាំមុខដោយអារ៉ាប៊ីសាអ៊ូឌីត ត្រូវបានបង្កើនចាប់តាំងពីថ្ងៃទី១ វិច្ឆិកាមក ខណៈក្រុងវ៉ាស៊ិនតោនទើបបញ្ចប់ ការជួយទ្រទ្រង់ខាងយោធា ដល់ក្រុមចម្រុះនោះរយៈពេល៣ឆ្នាំមកហើយនៃជម្លោះ។មនុស្សប្រមាណជា៤៤៥.០០០នាក់បានចាកចេញពីក្រុងHODEIDAចាប់ពីខែមិថុនាមក ខណៈទីក្រុងនេះមានប្រជាជន៦០០.០០០នាក់។
ការប្រយុទ្ធគ្នាយ៉ាងសាហាវនានាកើតមានកាលពីថ្ងៃទី១០ វិច្ឆិកា រវាងកងទ័ពរដ្ឋាភិបាលនិងពួកឧទ្ទាមហ៊ូធី ជិតផ្លូវថ្នល់សំខាន់មួយភ្ជាប់ក្រុងHODEIDA ទៅរដ្ឋធានីសាណា ដែលត្រួតត្រាដោយពួកហ៊ូធី។
មានការបាញ់កាំភ្លើងធំដាក់គ្នាខ្លាំងក្លាបំផុត ហើយកងយន្តហោះរបស់ក្រុមចម្រុះ ហោះក្រឡឹងលើទីក្រុងនោះ ខណៈពួកហ៊ូធីបាញ់មីស៊ីលការពារអាកាស។ ជាមួយការបាញ់ស្រោចគ្រាប់កាំភ្លើងត្បាល់ ការប្រយុទ្ធគ្នាតាមដងវិថីពិតជាសាហាវ។ ចំណែកជនស៊ីវិលយ៉ាងតិច២៣នាក់ស្លាប់នៅក្រុងHODEIDAចាប់តាំងពីថ្ងៃទី២៤តុលាមក។ រីឯក្នុងរយៈពេល២៤ម៉ោងចុងក្រោយនេះនៃការប្រយុទ្ធគ្នា យុទ្ធជនយ៉ាងតិច៦១នាក់ស្លាប់ ក្នុងនោះមានពួកឧទ្ទាម៤៣នាក់និងទាហានរដ្ឋាភិបាល១៨នាក់។
កងទ័ពរដ្ឋាភិបាលវាយរុលទៅមុខពីភាគខាងត្បូងនិងភាគខាងកើតឆ្ពោះទៅកំពង់ផែ រួចពេលនេះស្ថិតនៅប្រមាណជា៣គីឡូម៉ែត្រពីទីតាំងសំខាន់របស់ពួកឧទ្ទាម ហៅទីតាំង៧កក្កដា ជាតំបន់មានកិច្ចការពារសន្តិសុខខ្ពស់បំផុតនាភាគខាងកើតក្រុង។
ការរុលទៅមុខរបស់កងទ័ពរដ្ឋាភិបាលត្រូវរារាំងដោយខ្មាន់កាំភ្លើង ច្រើននាក់ដែលពួកឧទ្ទាមដាក់ពង្រាយ ព្រមទាំងដោយគ្រាប់មីននិងរណ្ដៅនានាដែលជីកក្នុងទីក្រុង។ ម្យ៉ាងទៀតការប្រយុទ្ធគ្នាគំរាមកំហែងដល់ការបញ្ជូនជំនួយមនុស្សធម៌ ដែលប្រជាជនយេម៉ែនច្រើនលាននាក់ពឹងផ្អែកលើនោះ។ ការប្រយុទ្ធគ្នាតាមជើងគោក និងតាមជើងអាកាស បង្កើនគ្រោះថ្នាក់ថែមទៀតនៃការកាត់ផ្ដាច់ផ្លូវផ្គត់ផ្គង់ តែមួយគត់នូវផលិតផលស្បៀង ប្រេងឥន្ធនៈនិងថ្នាំពេទ្យឲ្យដល់ប្រជាជនយេម៉ែនប្រមាណជា២០លាននាក់ដែលពឹងផ្អែកលើការនាំចូលកាត់តាមក្រុងកំពង់ផែHODEIDA៕
ចែករំលែកព័តមាននេះ