ខេត្តសៀមរាប ៖ អាជីវករលក់ដូរនៅផ្សារសម្តេចតេជោ ហ៊ុន សែន ដើមក្រឡាញ់ដែលមានឈ្មោះជាម្ចាស់តូបជាង៤០០តូបស្មើនឹង១៥មុខរបរបានព្រមព្រៀងគ្នា ទទួលយកដំណោះស្រាយចុងក្រោយដែលសាលាក្រុងសៀមរាប គណៈកម្មការផ្សារ និងអង្គភាពពាក់ព័ន្ធថ្នាក់ខេត្តបានឯកភាពគ្នារៀបចំជូនតាមរយៈនៃការចាប់ឆ្នោតដោយយុត្តិធម៌ដែលការចាប់ឆ្នោតនេះ បានធ្វើឡើងនៅសាលាក្រុងសៀមរាបនាថ្ងៃទី១០ ខែវិច្ឆិកា ឆ្នាំ២០១៨នេះ ។
លោកសុខ តុញ ប្រធានគណៈកម្មការសម្របសម្រួលរៀបចំការចាប់ឆ្នោតបានឲ្យដឹងថា បងប្អូនអាជីវករអ្នកលក់ដូរមានប្រមាណជា៩៩ភាគរយបានមកចូលរួមការចាប់ឆ្នោតនេះលើកលែងតែអ្នកនៅឆ្ងាយ ឬមានធុរកិច្ចរវល់តែប៉ុណ្ណោះ ហើយក្រោយពីការព្រមព្រៀងទទួលយកការចាប់ឆ្នោតផ្សារសម្តេចតេជោ ហ៊ុន សែន ដើមក្រឡាញ់នេះនឹងត្រូវបានរៀបចំឲ្យក្លាយជាផ្សារគំរូនៅក្នុងខេត្តសៀមរាប ។
លោកសុខ តុញ បានឱ្យដឹងទៀតថា នៅក្នុងរយៈពេលមិនតិចជាង៣ឆ្នាំ ក្រោយការសាងសង់រួចដោយពុំមានការឯកភាពគ្នាលើការបែងចែកកំណត់ប្រភេទទីតាំងមុខរបរលក់ដូរនោះ គណៈកម្មការផ្សារបានឯកភាពគ្នាជាមួយអាជ្ញាធរក្រុងបាន អនុញ្ញាតឱ្យបងប្អូនអាជីវករយកចំណតរថយន្តមុខផ្សារ និងតាមដងផ្លូវជិតផ្សារនោះលក់ដូរជាបណ្តោះអាសន្ន ប៉ុន្តែក្រោយពីបងប្អូនចូលទៅកាន់តូបលក់ដូររបស់ខ្លួន និងមានរៀបចំទីលានចំណតរថយន្តមុខផ្សារ និងដងផ្លូវលក់ដូរបណ្តោះអាសន្ននោះឡើងវិញឱ្យមានបរិស្ថាន និង សោភ័ណភាពបានស្អាតបាតផងដែរ ។
សូមបញ្ជាក់ថា ផ្សារសម្តេចតេជោ ហ៊ុន សែន ដើមក្រឡាញ់នេះកសាងដោយកម្លាំងកងវិស្វកម្មសម្តេចអគ្គមហាសេនាបតីតេជោ ហ៊ុន សែន សៀមរាប ដែលមានវត្តមានលោកឧកញ៉ា តំណាងរាស្ត្រ សៀង ណាំ ជាប្រធាន ៕
ចែករំលែកព័តមាននេះ