រាជធានីភ្នំពេញ ៖ បុរសម្នាក់ជិះម៉ូតូមួយគ្រឿងបោះពួយយ៉ាងលឿនដោយមិនប្រុងប្រយ័ត្នត្រង់ចំណុចផ្លូវបំបែកក៏ជ្រុលទៅបុករថយន្តមួយគ្រឿងទៀតដែលបើកឆ្លងផ្លូវចំពេញទំហឹង បណ្តាលឱ្យរងរបួសធ្ងន់ ហើយក៏បានស្លាប់ពេលបញ្ជូនទៅកាន់មន្ទីរពេទ្យ។ ហេតុការណ៍នេះកើតឡើងកាលពីវេលាម៉ោង១១និង៥០នាទីយប់ថ្ងៃទី៩ ខែវិច្ឆិកា ឆ្នាំ២០១៨ត្រង់ចំណុចតាមបណ្តោយផ្លូវហាណូយកែងនឹងផ្លូវសម្តេចជា ស៊ីម ស្តុប២៤ម៉ោង…
រាជធានីភ្នំពេញ ៖ បុរសម្នាក់ជិះម៉ូតូមួយគ្រឿងបោះពួយយ៉ាងលឿនដោយមិនប្រុងប្រយ័ត្នត្រង់ចំណុចផ្លូវបំបែកក៏ជ្រុលទៅបុករថយន្តមួយគ្រឿងទៀតដែលបើកឆ្លងផ្លូវចំពេញទំហឹង បណ្តាលឱ្យរងរបួសធ្ងន់ ហើយក៏បានស្លាប់ពេលបញ្ជូនទៅកាន់មន្ទីរពេទ្យ។
ហេតុការណ៍នេះកើតឡើងកាលពីវេលាម៉ោង១១និង៥០នាទីយប់ថ្ងៃទី៩ ខែវិច្ឆិកា ឆ្នាំ២០១៨ត្រង់ចំណុចតាមបណ្តោយផ្លូវហាណូយកែងនឹងផ្លូវសម្តេចជា ស៊ីម ស្តុប២៤ម៉ោង ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
សមត្ថកិច្ចបានអោយដឹងទៀតថា ជនរងគ្រោះដែលស្លាប់ឈ្មោះ នៅ គិរី អាយុ៣១ឆ្នាំ ស្នាក់នៅភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្ដាល។
តាមប្រភពព័ត៌មានពីកម្លាំងសមត្ថកិច្ចខណ្ឌសែនសុខដែលប្រចាំការនៅគោលដៅខាងលើបានឲ្យដឹងថានៅមុនពេលកើតហេតុ មានរថយន្តមួយគ្រឿងម៉ាកកាមរី ពណ៌ខ្មៅ មិនចាំស្លាកលេខ ធ្វើដំណើរតាមបណ្តោយផ្លូវសម្តេចជាស៊ីម ក្នុងទិសដៅពីលិចទៅកើត។
លុះមកដល់ចំណុចកើតហេតុក៏បានបើកឆ្លងកាត់ផ្លូវហាណូយបំរុងឆ្ពោះទៅផ្លូវឧកញ្ញាម៉ុងរិទ្ធី ពេលដែលឆ្លងបានពាក់កណ្ដាលផ្លូវ ក៏ស្រាប់តែមានម៉ូតូមួយគ្រឿងទៀតម៉ាកហុងដាឌ្រីម ស៊េរី០១៨ ពណ៌ខ្មៅ ពាក់ស្លាកលេខ ភ្នំពេញ ១GR-៨៥៧៦ បើកបរដោយបុរសម្នាក់ ធ្វើដំណើរតាមបណ្តោយផ្លូវហាណូយ ក្នុងទិសដៅពីត្បូងទៅជើង និងក្នុងល្បឿនយ៉ាងលឿនខ្វះការប្រុងប្រយ័ត្នមកដល់ចំណុចផ្លូវខ្វែង ក៏ជ្រុលទៅបុករថយន្តខាងលើចំពាក់កណ្តាលពេញទំហឹងបណ្ដាលឲ្យម៉ូតូរងការខូចខាតផ្នែកខាងមុខយ៉ាងដំណំ ចំណែកឯអ្នកបើកបរម៉ូតូបានរងរបួសបាក់ដៃទាំងសងខាងនិងបែកមាត់សន្លប់ស្តូកស្តឹង។
ភ្លាមៗនោះរថយន្តខាងលើក៏បានព្យាយាមបើកគេចឆ្ពោះទៅផ្លូវឧកញ្ញ៉ាម៉ុងរិទ្ធី ក៏ត្រូវសមត្ថកិច្ចអន្តរាគមន៍សែនសុខដែលប្រចាំការនៅគោលដៅខាងលើបានជិះម៉ូតូដេញតាមពីក្រោយដែរ តែដោយសារផ្លូវស្ងាត់ ហើយរថយន្តក៏បន្ថែមល្បឿនយ៉ាងលឿនគេចខ្លួនបាត់ស្រមោល ធ្វើឲ្យសមត្ថកិច្ចមិនអាចដេញស្ទាក់ឃាត់បាននោះទេ។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅឯមន្ទីរពេទ្យព្រះកុសុមៈ តែជាអកុសលពេលដឹកទៅតាមផ្លូវជនរងគ្រោះក៏ស្លាប់បាត់ទៅហើយ។
នៅកន្លែងកើតហេតុ ក៏ត្រូវបានសមត្ថកិច្ចជំនាញចុះមកធ្វើការវាស់វែងនិងយកម៉ូតូខាងលើទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំប្រគល់ទៅអោយសាច់ញាតិសពនៅពេលក្រោយ។ ចំណែកឯសពបុរសរងគ្រោះក៏ត្រូវបានសមត្ថកិច្ចប្រគល់ទៅអោយក្រុមគ្រួសារដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ