ខេត្តកំពង់ស្ពឺ ៖ បុរសម្នាក់ជិះម៉ូតូ១គ្រឿងកំពុងបើកដឹកប្រពន្ធ និងកូនស្រី ស្រាប់តែរថយន្ត១គ្រឿងបើកបុកចំពីមុខពេញទំហឹង បណ្តាលឲ្យស្លាប់ទាំង៣នាក់នៅកន្លែងកើតហេតុភ្លាមៗ ចំណែកអ្នកបើកបររថយន្តបានរត់គេចខ្លួនបាត់។
គ្រោះថ្នាក់ចរាចរណ៍បណ្តាលឱ្យស្លាប់១គ្រួសារនេះបានកើតឡើងកាលពីម៉ោង៣និង៤៥នាទីរសៀលថ្ងៃទី១០ ខែវិច្ឆិកា ឆ្នាំ២០១៨ តាមផ្លូវជាតិលេខ៤ ស្ថិតក្នុងភូមិកែវឧត្តម ឃុំត្រពាំងគង ស្រុកសំរោងទង។
ជនរងគ្រោះដែលស្លាប់ទាំង៣នាក់ខាងលើ ១-ឈ្មោះ សន ព្រាន ភេទប្រុស អាយុ២៨ឆ្នាំ ត្រូវជាប្តី និងជាអ្នកបើកបរម៉ូតូ ២-ឈ្មោះ ហម នឿន ភេទស្រី អាយុ២៥ឆ្នាំ ត្រូវជាប្រពន្ឋ និង៣-ឈ្មោះ ហម កា ភេទស្រី អាយុ៩ឆ្នាំ ត្រូវជាកូន ។ ជនរងគ្រោះទាំង៣នាក់រស់នៅភូមិក្រាំងតារ័ត្ន ឃុំព្នាយ ស្រុកសំរោងទង ខេត្តកំពង់ស្ពឺ។ ម៉ូតូរបស់រងគ្រោះម៉ាកហុងដាឌ្រីម ធុនសេ១២៥ ស៊េរីឆ្នាំ២០០៩ ពណ៌ខ្មៅ ពាក់ស្លាកលេខ បាត់ដំបង ១J-៥៣៧៧ ។
ចំណែករថយន្តម៉ាកកាមរីឆ្លាម ពណ៌ស្ករ ពាក់ស្លាកលេខភ្នំពេញ ២A-៦៥២៨ អ្នកបើកបររត់គេចខ្លួន។
ប្រភពព័ត៌មានសាក្សីនៅកន្លែងកើតហេតុបានប្រាប់សមត្ថកិច្ចឱ្យដឹងថា នៅមុនពេលកើតហេតុ គេឃើញរថយន្តខាងលើបើកបរតាមផ្លូវជាតិលេខ៤ ទិសដៅពីលិចទៅកើត លុះមកដល់គីឡូម៉ែត្រលេខ៣៥-៣៦ បានជ្រុលចង្កូតទៅបុកម៉ូតូរបស់ជនរងគ្រោះ ដែលកំពុងបើកបញ្ច្រាសទិសគ្នាចំពីមុខពេញទំហឹង បណ្តាលឲ្យអ្នកជិះលើម៉ូតូទាំង៣នាក់ស្លាប់ភ្លាមៗនៅកន្លែងកើតហេតុ។
ចំណែករថយន្ត និងម៉ូតូបានរងការខូចខាតធ្ងន់ធ្ងរ រីឯអ្នកបើករថយន្តបានរត់គេចខ្លួនបាត់។
ក្រោយកើតហេតុ សមត្ថកិច្ចបានចុះអន្តរាគមន៍ ប្រគល់សពឲ្យក្រុមគ្រួសារដឹកយកទៅគេហដ្ឋានដើម្បីធ្វើបុណ្យតាមប្រពៃណី។ចំណែករថយន្ត និងម៉ូតូត្រូវបានសមត្ថកិច្ចយកមករក្សាទុកនៅអធិការដ្ឋានដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ