រាជធានីភ្នំពេញ ៖ កូនស្រីលោកកឹម សុខា និងក្រុមអ្នកគាំទ្រគណបក្សសង្គ្រោះជាតិនៅសហរដ្ឋអាមេរិកបានចេញសេចក្តីថ្លែងការណ៍ថ្កោលទោសលោកសម រង្ស៊ី ដែលយកលោកកឹម សុខា ភ្នាល់ជាមួយសម្តេចតេជោ ហ៊ុន…
រាជធានីភ្នំពេញ ៖ កូនស្រីលោកកឹម សុខា និងក្រុមអ្នកគាំទ្រគណបក្សសង្គ្រោះជាតិនៅសហរដ្ឋអាមេរិកបានចេញសេចក្តីថ្លែងការណ៍ថ្កោលទោសលោកសម រង្ស៊ី ដែលយកលោកកឹម សុខា ភ្នាល់ជាមួយសម្តេចតេជោ ហ៊ុន សែន ថា ដោះលែង ឬមិនដោះលែង ។
ថ្លែងការណ៍ចេញផ្សាយនៅថ្ងៃទី៩ វិច្ឆិកា ឆ្នាំ២០១៨ ហើយត្រូវបានកូនស្រីលោកកឹម សុខា យកមកបង្ហោញលើបណ្តាញសង្គមដែលមានខ្លឹមសារយ៉ាងដូច្នេះថា ក្រុមអ្នកគាំទ្រគណបក្សសង្គ្រោះជាតិប្រចាំនៅសហរដ្ឋអាមេរិក សូមសំដែងនូវការខកចិត្តយ៉ាងក្រែលែង បន្ទាប់ពីបានឃើញហ្វេសប៊ុកលោក សម រង្ស៊ី បានផ្តួចផ្តើមបបួលសម្តេចតេជោ ហ៊ុន សែន ភ្នាល់គ្នាលើករណីដោះលែងលោកកឹម សុខា ។ ថ្លែងការណ៍បន្តថា ក្រុមអ្នកគាំទ្រគណបក្សង្គ្រោះជាតិ ប្រចាំសហរដ្ឋអាមេរិកសូមថ្កោលទៅយ៉ាងដាច់អហង្ការចំពោះអាកប្បកិរិយារមាថម្តង ហើយម្តងទៀតដ៏អគុណធម៌ និងគ្មានសីលធម៌ដែលបានធ្វើឲ្យប៉ះពាល់យ៉ាងធ្ងន់ធ្ងរដល់ការលះបង់របស់លោក កឹម សុខា និងពលរដ្ឋរាបលាននាក់ដែលបានតស៊ូ ដើម្បីសិទ្ធិសេរីភាពលទ្ធិប្រជាធិបតេយ្យ និងគោរពសិទ្ធិមនុស្ស ។
ថ្លែងការណ៍ក៏អំពាវនាវដល់អ្នកនយោបាយគ្រប់រូប សូមបញ្ឈប់ជាបន្ទាន់នូវចរិកនយោបាយ ដែលប្រាក់ចាកគុណធម៌ ហើយសុំងាកមកប្រកាន់នូវក្រមសីលធម៌ និងគុណធម៌នយោបាយថ្លៃថ្នូរ និងធ្វើអ្វីៗដោយតម្កល់ប្រយោជន៍ជាតិជាធំ និងប្រជាពលរដ្ឋជាធំ ។ សូមជម្រាបថាលោកសម រង្ស៊ី អតីតប្រធានគណបក្សសង្គ្រោះជាតិ កាលពីថ្ងៃទី៩ វិច្ឆិកានេះ បានបបួលសម្តេចតេជោ ហ៊ុន សែន ភ្នាល់គ្នារឿងដោះលែងលោក កឹម សុខា ។ លោកសម រង្ស៊ី បានសរសេរលើបណ្តាញសង្គមយ៉ាងដូច្នេះថា «តើសម្តេចតេជោ ហ៊ុន សែន ហ៊ានភ្នាល់ជាមួយខ្ញុំទេ0x017d7 ។ លោកបញ្ជាក់ថា«កាលពីថ្ងៃ០៧ វិច្ឆិកា កន្លងទៅនេះសម្តេច ហ៊ុន សែន បានអះអាងថា គាត់មិនងាយដោះលែងលោក កឹម សុខា ទេទាល់តែចាំសេះដុះស្នែង ។ ខ្ញុំនៅតែជឿជាក់ថា ក្រោមសម្ពាធអន្តរជាតិ ហ៊ុន សែន នឹងត្រូវបង្ខំចិត្តដោះលែងលោក កឹម សុខា ក្នុងពេលឆាប់ៗ ខាងមុខនេះ ។ អាចថ្ងៃទី២៩ ធ្នូ ២០១៨ នេះ ឬក៏យ៉ាងយូរបំផុតថ្ងៃ០៣ មីនា ២០១៩» ។ លោកបន្ថែមថា បើសម្តេច ហ៊ុន សែន ចាញ់ខ្ញុំក្នុងការភ្នាល់នេះគាត់មិនចាំបាច់កាត់កខ្លួនឯងដូចក្នុងការសន្យាបញ្ឈប់ការកាប់ព្រៃឈើនោះទេ ។ ខ្ញុំគ្រាន់តែសុំឲ្យគាត់ចុះចេញពីតំណែងបានហើយ ។ តែបើខ្ញុំចាញ់លោក ហ៊ុន សែនវិញ ខ្ញុំសុខចិត្តដើរចូលឲ្យគាត់ចាប់ខ្ញុំយកទៅឃុំទន្ទឹមនឹងលោកកឹម សុខា បើមិនបញ្ចូលរឿងអ្វីថ្មី (ដូចជារដ្ឋប្រហារ) ក្រៅពីចំណុចដែលបានលើកឡើងខាងលើនេះ ។ យ៉ាងណាក្តីលោកមុត ចន្ថា មនុស្សជំនិតលោកកឹម សុខា បានលើកឡើងថា ករណីលោកកឹម សុខានោះជាមិនយុត្តិធម៌ទេ ។
លោកបន្តថា អ្នកនយោបាយគួរតែដឹង និងយល់ច្បាស់អំពីគុណធម៌នយោបាយ ។ ការកំណត់មុខសញ្ញាមនុស្សធ្វើជាល្បែងភ្នាល់នយោបាយ ដើម្បីគ្រាន់តែជាការចង់ឈ្នះចាញ់គ្នាជាអំពើអគុណធម៌បំផុតសម្រាប់មនុស្សម្នាក់ ។ គុណធម៌នយោបាយ គឺជាកត្តាសំខាន់សម្រាប់អ្នកនយោបាយ ។ សម្តេចតេជោ ហ៊ុន សែន ត្រូវបានគេហទំព័រសារព័ត៌មានហ្វ្រេសញ៉ូសង់ប្រសាសន៍ថា សម្តេចហ៊ានស្បថជាមួយលោក សម រង្ស៊ី ហើយមានការដោះលែងលោក កឹម សុខា មែនសម្តេចនឹងចុះចេញពីតំណែង ។ សម្តេចតេជោ ហ៊ុន សែន សម្រេចភ្នាល់តាមការបបួលរបស់លោកសម រង្ស៊ី បើសិនដោះលែងលោក កឹម សុខា សម្តេចនឹងចុះចេញពីតំណែង តែបើមិនដោះលែង សម រង្ស៊ី ត្រូវចូលឲ្យចាប់ខ្លួនភ្លាមៗ ។
សម្តេចតេជោ ហ៊ុន សែន បានប្រកាសតាមរយៈបណ្តាញព័ត៌មាន Fresh News ដោយសម្តេចបានសម្រេចភ្នាល់តាមការបបួលរបស់លោក សម រង្ស៊ី ហើយ ។ សម្តេចតេជោ បានកំណត់ថា ប្រសិនសម រង្ស៊ី ចាញ់ត្រូវចូលឲ្យចាប់ខ្លួនភ្លាមៗតែម្តងបន្ទាប់ពីបញ្ចប់ការភ្នាល់ ។ សម្តេចតេជោ ហ៊ុន សែន បានអះអាងបញ្ជាក់យ៉ាងដូច្នេះថា៖ «ខ្ញុំហ៊ានភ្នាល់ជាមួយលោកសម រង្ស៊ី បើសិនមានការដោះលែងលោកកឹម សុខា មែនខ្ញុំហ៊ុន សែន សុខចិត្តចុះចេញពីតំណែងតាមការបបួលភ្នាល់របស់សម រង្ស៊ី ប៉ុន្តែបើលោកកឹម សុខា មិនត្រូវបានដោះលែងវិញនោះនៅចន្លោះពីថ្ងៃទី២៩ ខែធ្នូ ឆ្នាំ២០១៨ រហូតដល់ថ្ងៃទី០៣ ខែមីនា ឆ្នាំ២០១៩ ទេ លោកសម រង្ស៊ី ត្រូវហ៊ានចុះចាញ់ទទួលស្គាល់ការភ្នាល់របស់ខ្លួនដោយចូលមកឲ្យចាប់ខ្លួនភ្លាមៗ បន្ទាប់ពីបញ្ចប់ការភ្នាល់» ។
សម្តេចតេជោ ហ៊ុន សែន បានបញ្ជាក់បន្ថែមថា«ខ្ញុំសូមប្រើប្រាស់សារព័ត៌មាន Fresh News ជាសាក្សី និងឆ្លើយតបជាមួយនឹង Facebook របស់លោកសម រង្ស៊ី សម្រាប់ការភ្នាល់គ្នានេះ និងសូមប្រកាសឲ្យសាធារណជនជាតិ និងអន្តរជាតិជួយធ្វើសាក្សី ហើយការភ្នាល់នេះចាប់ពីថ្ងៃទី០៩ ខែវិច្ឆិកានេះរហូតដល់ថ្ងៃទី០៣ ខែមីនា ឆ្នាំ២០១៩ តាមការបបួលភ្នាល់របស់សម រង្ស៊ី» ៕
ចែករំលែកព័តមាននេះ