រាជធានីភ្នំពេញ ៖ ជនសង្ស័យម្នាក់ ក្នុងចំណោមបក្សពួក២នាក់ បានត្រូវប្រជាពលរដ្ឋនាំគ្នាចាប់វាយទ្រមខ្លួន បន្ទាប់ពីជិះម៉ូតូធ្វើសកម្មភាពឆក់ទូរស័ព្ទដៃពីស្ត្រីម្នាក់បានសម្រេច ហើយជិះគេចខ្លួនតែក៏បានប្រវាយប្រតប់គ្នាធ្លាក់ពីលើម៉ូតូ ។ ហេតុការណ៍នេះ កើតឡើងកាលពីវេលាម៉ោង០៩និង៣០នាទីព្រឹកថ្ងៃទី៦ខែវិច្ឆិកា…
រាជធានីភ្នំពេញ ៖ ជនសង្ស័យម្នាក់ ក្នុងចំណោមបក្សពួក២នាក់ បានត្រូវប្រជាពលរដ្ឋនាំគ្នាចាប់វាយទ្រមខ្លួន បន្ទាប់ពីជិះម៉ូតូធ្វើសកម្មភាពឆក់ទូរស័ព្ទដៃពីស្ត្រីម្នាក់បានសម្រេច ហើយជិះគេចខ្លួនតែក៏បានប្រវាយប្រតប់គ្នាធ្លាក់ពីលើម៉ូតូ ។
ហេតុការណ៍នេះ កើតឡើងកាលពីវេលាម៉ោង០៩និង៣០នាទីព្រឹកថ្ងៃទី៦ខែវិច្ឆិកា នៅតាមផ្លូវភ្នំពេញ-ហាណូយ ក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ ។ ជនសង្ស័យឈ្មោះ សុខ ថា ហៅហុង ភេទប្រុស អាយុ៣២ឆ្នាំ ស្នាក់នៅភូមិឌួង សង្កាត់សំរោង ខណ្ឌព្រែកព្នៅ ។ ចំណែកម្ចាស់ទូរស័ព្ទឈ្មោះ ឡុង ចិន្តា អាយុ២៧ឆ្នាំ ជាកម្មការិនីរោងចក្រ ស្នាក់នៅភូមិពោធិ៍រ៉ា ឃុំភ្នំបាត ស្រុកពញាឮ ខេត្តកណ្តោល ។
តាមស្ត្រីជាម្ចាស់ទូរស័ព្ទបានឲ្យដឹងថា នៅវេលាព្រឹកនោះ នាងធ្វើដំណើរចេញេពីធ្វើការគោលបំណងទៅផ្ទះដោយជិះម៉ូតូស្គូពីមួយគ្រឿង ។ នៅពេលទៅដល់ចំណុចខាងលើ ក៏បានដកទូរស័ព្ទដៃម៉ាកអាយហ្វូនស៊ិកផ្លាសនិយាយទៅឪពុក ។ ពេលនិយាយចប់ប្រុងដាក់ចូលក្នុងហោប៉ៅខោវិញ ស្រាប់តែមានជន២នាក់ ជិះម៉ូតូហុងដាឌ្រីមពណ៌ខ្មៅ មិនចាំផ្លាកលេខ មកពីក្រោយធ្វើសកម្មភាពឆក់យកទូរស័ព្ទដៃពីនាងបានសម្រេចហើយជិះគេចខ្លួន ។
តាមម្ចាស់ទូរស័ព្ទឲ្យដឹងទៀតថា ខណៈនោះនាងបានដេញតាមនិងស្រែកថាចោរៗ ធ្វើឲ្យជនសង្ស័យជិះគេច ខ្លួនទាំងភ័យស្លន់ស្លោក៏ធ្លាក់ជនសង្ស័យម្នាក់ដែលជិះខាងក្រោយ ហើយត្រូវប្រជាពលរដ្ឋនាំគ្នាឃាត់ខ្លួនបានវាយម្នាក់មួយដៃម្នាក់មួយជើងរហូតទ្រមខ្លួននិងរងរបួស រួចប្រគល់ឲ្យនគរបាលចាត់ការតាមច្បាប់ ៕
ចែករំលែកព័តមាននេះ