ខេត្តរតនគិរី ៖ អ្នកភូមិជនជាតិដើមភាគតិចគ្រឹងប្រុស-ស្រីប្រមាណ១៦០នាក់ មានក្មេងមានចាស់ បានពុលអាហារដោយការក្អូតចង្អោរពេញភូមិ ខណៈដែលពួកគាត់កំពុងទទួលទានចំណីអាហារ ក្នុងពិធីបុណ្យសពរបស់អ្នកភូមិ ។ ករណីនេះ កើតឡើងនៅវេលាម៉ោង០៥ និង៣០នាទីល្ងាចថ្ងៃទី៨ វិច្ឆិកា ក្នុងភូមិល្អើនក្រែន ឃុំអូរជុំ ស្រុកអូរជុំ ។ ក្រោយពីមានបាតុភាពនេះ កើតឡើងសមត្ថកិច្ចប៉ូលិសស្រុក និងខេត្តសហការជាមួយមន្ទីរសុខាភិបាលខេត្តចុះពិនិត្យ និងដឹកជញ្ជូនជនរងគ្រោះដែលពុលមកសម្រាកព្យាបាលនៅមន្ទីរពេទ្យបង្អែក ។
បើតាមការបញ្ជាក់ពីលោកវេជ្ជបណ្ឌិត អ៊ុង រតនា ប្រធានមន្ទីរសុខាភិបាលខេត្តបានឱ្យដឹងតាមទូរស័ព្ទ នៅព្រឹកថ្ងៃទី៩ វិច្ឆិកាថា បន្ទាប់ពីទទួលបានព័ត៌មានខាងលើនេះភ្លាម លោកបានបញ្ជូនក្រុមគ្រូពេទ្យចុះទៅកាន់ភូមិកើតហេតុខាងលើ ដើម្បីជួយសង្គ្រោះបន្ទាន់ ។ លោកបន្តថា នៅក្នុងកម្មវិធីបុណ្យសពនោះម្ចាស់ដើមបុណ្យបានធ្វើម្ហូបអាហារទទួលភ្ញៀវដោយមានបាយ សម្លរ បបរគ្រឿង ក្នុងម្ហូបអាហារទាំងប៉ុន្មានមុខខាងលើគ្រូពេទ្យជំនាញបានយកមកធ្វើកោសល្យវិច័យយ៉ាងល្អិតល្អន់រួចរាល់អស់ហើយ លទ្ធផលគ្មានជាតិពុលក្នុងម្ហូបនោះទេ តែមូលហេតុនៃការក្អួតចង្អោនេះគឺបណ្តាលមកពីពួកគាត់បរិភោគចំណីអាហារមិនមានអនាម័យល្អ ។ ទោះជាយ៉ាងណា ករណីនេះមិនមានប្រជាពលរដ្ឋណាម្នាក់គ្រោះថ្នាក់ដល់អាយុជីវិតនោះទេ ។
លោកថា គិតមកដល់ថ្ងៃទី៩ វិច្ឆិកា ស្ថានភាពរបស់ពួកគាត់ទាំង១៦០នាក់នេះ បានធូរស្រាលហើយ ។ ទាក់ទិននឹងករណីខាងលើ សមត្ថកិច្ចប៉ូលិសមូលដ្ឋានបានឱ្យដឹងថា នៅថ្ងៃកើតហេតុនោះ បងប្អូនជនជាតិដើមភាគតិចគ្រឹងបានធ្វើបុណ្យសពស្ត្រី វ័យជាង៦០ឆ្នាំម្នាក់ដែលបានស្លាប់ ដោយជំងឺជាង១ឆ្នាំកន្លងមកហើយ ដែលតាមប្រពៃណីជនជាតិដើមភាគតិចគ្រឹងគឺបានធ្វើបុណ្យក្នុង១ឆ្នាំ១ដង ។ ខណៈភ្ញៀវដែលចូលរួម ពេលកំពុងទទួលទានអាហារបានកន្លះម៉ោង ស្រាប់តែកើតហេតុនេះ ឡើងដោយភ្ញៀវប្រមាណ៧០%បានក្អួត និងសន្លប់ ក្រោយពីទទួលទានអាហាររួច ទើបធ្វើឱ្យមានការភ្ញាក់ផ្អើលពេញកម្មវិធីតែម្តង ។
បច្ចុប្បន្ន អ្នកជំងឺទាំង១៦០នាក់កំពុងសំរាកព្យាបាលនៅមន្ទីរពេទ្យបង្អែកខេត្ត និងបានថ្លែងអំណរគុណដល់សមត្ថកិច្ចប៉ូលិស និងមន្ទីរសុខាភិបាល រួមទាំងមន្ទីរពេទ្យបង្អែកខេត្តបានយកចិត្តទុកដាក់និងព្យាបាលដោយឥតគិតថ្លៃ ។ តាមប្រភពព័ត៌មានពីគ្រូពេទ្យបានឱ្យដឹងថានៅ ព្រឹកថ្ងៃទី៩ ខែវិច្ឆិកា អ្នកជំងឺជាង១៦០នាក់ គ្រូពេទ្យបានអនុញ្ញាតទៅផ្ទះវិញជាងពាក់កណ្តាលហើយ នៅសល់ប៉ុន្មានគ្រូពេទ្យកំពុងតាមដានពីអាការៈដោយយកចិត្តទុកដាក់ព្យាបាលបន្តទៀតព្រោះធ្ងន់ជាងគេ ៕
ចែករំលែកព័តមាននេះ