ខេត្តកំពង់ស្ពឺ ៖ បុរសស្ត្រីជាគូស្នេហ៍នឹងគ្នាដែលជាមុខសញ្ញាជួញដូរគ្រឿងញៀនយ៉ាងសកម្មប្រចាំទឹកដីស្រុកបសេដ្ឋ ហើយត្រូវប្រជាពលរដ្ឋឃើញបុរសជាគូស្នេហ៍ប្រើស្រីស្នេហ៍យកគ្រឿងញៀនឱ្យម៉ូយទាំងកណ្តាលថ្ងៃ ក៏រាយការណ៍ប្រាប់សមត្ថកិច្ចការិយាល័យបង្ក្រាបគ្រឿងញៀនខេត្ត ចុះឃាត់ខ្លួនដល់ក្នុងផ្ទះជនសង្ស័យតែម្តងកាលពីម៉ោង៩ព្រឹក ថ្ងៃទី៨ ខែវិច្ឆិកា ឆ្នាំ២០១៨ ស្ថិតក្នុងភូមិព្រះម្លប់ ឃុំភារីមាជ័យ ស្រុកបសេដ្ឋ ខេត្តកំពង់ស្ណឺ។
មុខសញ្ញាជួញដូរគ្រឿងញៀនជាគូស្នេហ៍១គូខាងលើនេះ ១-ឈ្មោះ នៅ សុទិត្យ ភេទប្រុស អាយុ៣១ឆ្នាំ រស់នៅភូមិ-ឃុំកើតហេតុ និង២-ឈ្មោះ ឆុន បូរិន ភេទស្រី អាយុ២១ឆ្នាំ រស់នៅភូមិស្រែសំរោង ឃុំស្រែសំរោង ស្រុកជុំគិរី ខេត្តកំពត។
ប្រភពពីសមត្ថកិច្ចការិយាល័យជំនាញគ្រឿងញៀនខេត្តបានឲ្យដឹងថា មុនពេលសមត្ថកិច្ចចុះបង្ក្រាបមុខសញ្ញាជួញដូរគ្រឿងញៀននេះ កម្លាំងនគរបាលបានទទួលសេចក្តីរាយការណ៍ពីប្រជាពលរដ្ឋក្នុងភូមិកើតហេតុពីសកម្មភាពពួកគេថា គេតែងឃើញជនសង្ស័យជាប្រុសស្នេហ៍ តែងប្រើស្រីស្នេហ៍របស់ខ្លួនឲ្យយកថ្នាំញៀនចែកចាយឲ្យម៉ូយទាំងថ្ងៃក៏មាន គ្មានកោតញញើតសមត្ថកិច្ចមូលដ្ឋានទេ។
ប្រភពដដែលបន្តថា ក្រោយពីទទួលបានព័ត៌មានច្បាស់ហើយ កម្លាំងនគរបាលការិយាល័យប្រឆាំងគ្រឿងញៀនខេត្ត បានចឃាត់ខ្លួនមុខសញ្ញាទាំង២នាក់ដល់ក្នុងផ្ទះតែម្តង។ នៅពេលឆែកឆេរសមត្ថកិច្ច ដកហូតបានម្សៅពណ៌ស សង្ស័យថ្នាំញៀនចំនួន៤កញ្ចប់ (មធ្យម១,តូច៣),ដាវ១ដើម, ឧបករណ៍ និងសម្ភារៈប្រើប្រាស់គ្រឿងញៀនមួយចំនួនទៀត។ បច្ចុប្បន្នជនសង្ស័យ និងវត្ថុតាង សមត្ថកិច្ចកំពុងកសាងសំណុំរឿងបញ្ជូនឡើងតុលាការចាត់ការតាមច្បាប់៕
ចែករំលែកព័តមាននេះ