រាជធានីភ្នំពេញ ៖ គិតមកដល់បច្ចុប្បន្នពលករខ្មែរដែលចេញទៅធ្វើការនៅបរទេសទាំងស្របច្បាប់ និងមិនស្របច្បាប់មានប្រមាណ១,២លាននាក់ ដោយក្នុងមួយឆ្នាំៗបានផ្តល់ប្រាក់ចំណូលមកស្រុកប្រមាណជាង២ពាន់លានដុល្លារ។ ក្នុងនោះ ពលករខ្មែរស្របច្បាប់ដែលកំពុងធ្វើការនៅប្រទេសថៃ មានចំនួន១លាន៨ម៉ឺននាក់ ដែលបានផ្តល់ចំណូលត្រឡប់មកស្រុកជាង១ពាន់លានដុល្លារក្នុងមួយឆ្នាំៗ។ ដើម្បីលើកកម្ពស់សិទ្ធិ…
រាជធានីភ្នំពេញ ៖ គិតមកដល់បច្ចុប្បន្នពលករខ្មែរដែលចេញទៅធ្វើការនៅបរទេសទាំងស្របច្បាប់ និងមិនស្របច្បាប់មានប្រមាណ១,២លាននាក់ ដោយក្នុងមួយឆ្នាំៗបានផ្តល់ប្រាក់ចំណូលមកស្រុកប្រមាណជាង២ពាន់លានដុល្លារ។ ក្នុងនោះ ពលករខ្មែរស្របច្បាប់ដែលកំពុងធ្វើការនៅប្រទេសថៃ មានចំនួន១លាន៨ម៉ឺននាក់ ដែលបានផ្តល់ចំណូលត្រឡប់មកស្រុកជាង១ពាន់លានដុល្លារក្នុងមួយឆ្នាំៗ។
ដើម្បីលើកកម្ពស់សិទ្ធិ និងសុខុមាលភាពពលករស្របច្បាប់ដែលកំពុងធ្វើការនៅប្រទេសជិតខាងមួយនេះ សមាគមចំនួន៣ បានចុះអនុស្សរណៈនៃការយោគយល់គ្នា ដើម្បីបង្កើនការការពារតាមផ្លូវច្បាប់ និងយកចិត្តទុកដាក់ធ្វើយ៉ាងណា ឲ្យពួកគេទទួលបានអត្ថប្រយោជន៍ ដើម្បីលើកកម្ពស់ជីវភាពគ្រួសារ ។ នុស្សរណៈនេះ នឹងក្លាយជាយន្ដការថ្មីមួយបន្ថែមទៀត ក្នុងការការពារដល់ពលករកម្ពុជាដែលទៅធ្វើការនៅប្រទេសថៃបន្ថែមលើកិច្ចការពារដែលមាននាពេលបច្ចុប្បន្ន ព្រមទាំងចូលរួមចំណែកក្នុងការគ្រប់គ្រង ក៏ដូចជាការការពារនូវសិទ្ធិសេរីភាព និងលើកកម្ពស់លក្ខខណ្ឌការងារដល់ពលករកម្ពុជាដែលកំពុងបម្រើការងារនៅព្រះរាជាណាចក្រថៃ ឱ្យមានភាពកាន់តែប្រសើរឡើង ប្រកបដោយប្រសិទ្ធភាព និងប្រសិទ្ធផលខ្ពស់ ។
ក្នុងពិធីចុះអនុស្សរណៈយោគយល់រវាងសមាគមទាំងបីខាងលើ កាលពីថ្ងៃទី៧ វិច្ឆិកា កន្លងមក លោកជំទាវឧកញ៉ា អុឹង ស៊ាងរិទ្ធី ប្រធានសមាគមទីភ្នាក់ងារជ្រើសរើសពលករកម្ពុជា បានលើកឡើងថា អនុស្សរណៈនៃការយោគយល់គ្ននេះ ជាយន្តការថ្មីមួយក្នុងការចូលរួមជាមួយក្រសួងការងារនិងបណ្តុះបណ្តាលវិជ្ជាជីវៈក្នុងការធ្វើសកម្មភាពបង្កើនអត្ថប្រយោជន៍ជូនពលករទេសន្តប្រវេសន៍កម្ពុជាដែលទៅធ្វើការនៅប្រទេសថៃស្របច្បាប់ ។ លោកជំទាវសង្ឃឹមថា ៖« អនុស្សរណៈនេះ នឹងធ្វើឱ្យសមាគមទាំងបីមានកិច្ចសហការល្អប្រសើរឡើងក្នុងការលើកកម្ពស់សិទ្ធិ សុខុមាលភាព និងការការពារអត្ថប្រយោជន៍ជូនពលករ
កម្ពុជាដែលកំពុងធ្វើការនៅប្រទេសថៃ »។
ប្រធានសមាគម ទីភ្នាក់ងារហត្ថពលកម្មកម្ពុជា លោក អន ប៊ុនហាក់ បានឲ្យដឹងដែរថា អនុស្សរណៈនេះ គឺជាឧបករណ៍ថ្មីមួយដែលនឹងធ្វើឱ្យលេចចេញនូវសកម្មភាពថ្មីៗនៅក្នុងការរួមចំណែកជាមួយក្រសួងការងារនិងបណ្តុះបណ្តាលវិជ្ជាជីវៈ ដែលជានិច្ចកាលការពារសិទ្ធិពលករចំណាកស្រុក ដោយមិនចង់ឃើញប្រជាពលរដ្ឋខ្មែរទទួលរងសម្ពាធអ្វីមួយ ខណៈដែលពួកគេកំពុងធ្វើការនៅក្រៅប្រទេស ។ លោកជឿជាក់ថា ៖« អនុស្សរណៈថ្មីនេះ នឹងចូលរួមកាត់បន្ថយភាពក្រីក្រ លើកកម្ពស់ជីវភាពពលករខ្មែរដែលធ្វើការនៅប្រទេសថៃ និងគ្រួសាររបស់ពួកគេ តាមរយៈការលើកកម្ពស់អត្ថប្រយោជន៍ដូចជា ការការពារតាមផ្លូវច្បាប់ ការផ្តល់នូវការធានារ៉ាប់រងគ្រោះថ្នាក់ការងារ និងការធានារ៉ាប់រងជីវិតបន្ថែមលើការធានាលើសុខភាពដែលមានស្រាប់របស់រាជរដ្ឋាភិបាលថៃ »។ លោក THANIT Numnoi ប្រធានសមាគមទំនាក់ទំនង កម្ពុជា-ថៃ បានឲ្យដឹងផងដែរថា ប្រទេសថៃមានប្រជាពលរដ្ឋខ្មែរធ្វើការស្របច្បាប់ជាង១លាននាក់ធ្វើការនៅតាមរោងចក្រផ្សេងៗ ។ លោកសន្យាថា ៖« សមាគមទំនាក់ទំនងរវាងកម្ពុជា-ថៃ នឹងប្រឹងប្រែងឱ្យអស់ពីសមត្ថភាពដើម្បីការពារសិទ្ធិ និងទទួលខុសត្រូវរបស់ពលករកម្ពុជា ក៏ដូចជាលើកកម្ពស់ជីវភាពរស់នៅ និងធ្វើយ៉ាងណាដើម្បីចូលរួមលើកកម្ពស់ផលប្រយោជន៍ពលករកម្ពុជា »។
ក្នុងឱកាសនោះដែរ លោក អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈមានប្រសាសន៍ថា អនុស្សរណៈនៃការយោគយល់គ្នានេះ គឺជាវឌ្ឍនភាព និងយន្តការបន្ថែមថ្មីមួយទៀតក្នុងការការពារដល់ពលករកម្ពុជាដែលទៅធ្វើការនៅប្រទេសថៃបន្ថែមលើកិច្ចការពារដែលមាននាពេលបច្ចុប្បន្ន ព្រមទាំងចូលរួមចំណែកក្នុងការគ្រប់គ្រង ក៏ដូចជាការការពារនូវសិទ្ធិសេរីភាព និងលើកកម្ពស់លក្ខខណ្ឌការងារដល់ពលករកម្ពុជាដែលកំពុងបម្រើការងារនៅព្រះរាជាណាចក្រថៃ ឱ្យមានភាពកាន់តែប្រសើរឡើង ប្រកបដោយប្រសិទ្ធភាព និងប្រសិទ្ធផលខ្ពស់ ។ លោករដ្ឋមន្ត្រីលើកឡើងថា ៖« ក្នុងនាមក្រសួងការងារនិងបណ្តុះបណ្តាលវិជ្ជាជីវៈ ខ្ញុំស្នើដល់សមាគមទាំងបី សហការគ្នាឱ្យបានស្អិតរមួត ដោយធ្វើយ៉ាងណាផ្តល់នូវការការពារសុវត្ថិភាព សុខុមាលភាពសង្គមដល់ពលករកម្ពុជាដែលធ្វើការនៅប្រទេសថៃឱ្យបានជាអតិបរមា និងសូមគាំទ្រនូវគម្រោងរបស់សមាគមទាំងបីដែលនឹងរៀបចំ ផ្តល់ជូនសេវាកម្មធានារ៉ាប់រងដល់ពលករកម្ពុជា លើការធានាគ្រោះថ្នាក់ការងារនិងអាយុជីវិត ដែលស្របតាមអនុសាសន៍ដ៏ថ្លៃថ្លារបស់ប្រមុខរដ្ឋាភិបាលកម្ពុជា សម្តេចតេជោនាយករដ្ឋមន្ត្រី ។
ម្យ៉ាងវិញទៀតឆ្លងតាមបទពិសោធន៍របស់ក្រសួងការងារនិងបណ្តុះបណ្តាលវិជ្ជាជីវៈ ក្នុងការគ្រប់គ្រងពលករខ្មែរនៅសាធារណរដ្ឋកូរ៉េ ខ្ញុំស្នើសុំសមាគមពិចារណាក្នុងការរៀបចំផ្ទះស្នាក់នៅបណ្តោះអាសន្នសម្រាប់ពលករកម្ពុជានៅតាមតំបន់ក្នុងប្រទេសថៃ ដែលអាចឲ្យពលករកម្ពុជាស្នាក់នៅបណ្តោះអាសន្នក្នុងអំឡុងពេលប្តូរការងារ ឬរង់ចាំការដោះស្រាយវិវាទជាមួយនិយោជក »៕
ចែករំលែកព័តមាននេះ