ខេត្តរតនគីរី ៖ ក្មេងប្រុសម្នាក់ឃើញគោយន្តកន្ត្រៃបើកបរតាមផ្លូវ ហក់ឡើងជិះពីក្រោយ បណ្តាលឱ្យធ្លាក់បាក់កស្លាប់ភ្លាមៗនៅកន្លែងកើតហេតុយ៉ាងអាណោចអាធ័ម ។ ហេតុការណ៍នេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី៨ ខែវិច្ឆិកា ឆ្នាំ២០១៨ ស្ថិតនៅលើផ្លូវក្រាលក្រួសក្រហម ក្នុងភូមិប៉ាតត់ ឃុំសេដា ស្រុកលំផាត់ ។
បើតាមរបាយការណ៍សមត្ថកិច្ចមូលដ្ឋានបានឱ្យដឹងថា ជនរងគ្រោះដែលស្លាប់ឈ្មោះខាំ ស ភេទប្រុស អាយុ១១ឆ្នាំ ជនជាតិដើមភាគតិចទំពួន ជាសិស្ស ចំណែកអ្នកបើកបរគោយន្តកន្ត្រៃឈ្មោះយាំង ខៀវ ភេទប្រុស អាយុ១៨ឆ្នាំ ។ ទាំងជនរងគ្រោះ និងអ្នកបើកបរគោយន្តរស់នៅភូមិឃុំកើតហេតុខាងលើ ។
សមត្ថកិច្ចដដែលបានបញ្ជាក់ទៀតថា តាមការបំភ្លឺពីអ្នកបើកបរគោយន្ត និងសាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុ គោយន្តកំពុងធ្វើដំណើរតាមផ្លូវក្រួសក្រហម ស្រាប់តែក្មេងប្រុសរងគ្រោះបានរត់តាមពីក្រោយគោយន្តហក់ឡើងជិះ បណ្ដាលអោយធ្លាក់ផ្កាប់មុខ និងបាក់កស្លាប់ភ្លាមៗនៅកន្លែងកើតហេតុ ។
សមត្ថកិច្ចដដែលបានបន្តទៀតថា សមត្ថកិច្ចមិនបានឃាត់គោយន្តកន្ត្រៃ និងអ្នកបើកបរទុកនោះទេ ដោយសំអាងលើអង្គហេតុចំនួន២គឺទី១-ក្មេងប្រុសរងគ្រោះជាអ្នកបង្កដោយខ្លួនឯង និងទី២-គឺអ្នកបើកបរគោយន្តមិនបានបុកជនរងគ្រោះនោះទេ តែសំណងក៏មិនបានសងជនរងគ្រោះដែរ គ្រាន់តែអ្នកបើកបរគោយន្តជួយចេញប្រាក់ជាងមួយលានរៀលដើម្បីធ្វើបុណ្យសព ។
ក្រោយពីសមត្ថកិច្ចធ្វើការត្រួតពិនិត្យរួច សពត្រូវបានប្រគល់អោយឌ៍ពុកម្ដាយដើម្បីរៀបចំធ្វើបុណ្យតាមព្រពៃណីជនជាតិដើមភាគតិចទំពួន ៕
ចែករំលែកព័តមាននេះ