រាជធានីភ្នំពេញ ៖ ការប្រកួតប្រដាល់លក្ខណៈមិត្តភាពអន្តរជាតិនៅលើសង្វៀនទូរទស្សន៍ស៊ីអិនស៊ីបានវិលមកជួបអ្នកស្នេហាវិស័យប្រដាល់គុនខ្មែរជាថ្មីទៀតហើយនៅសុក្រទី៩ វិច្ឆិកា ដែលជាថ្ងៃបុណ្យឯករាជ្យជាតិខ្មែរ។ កីឡាករជើងខ្លាំងកម្ពុជា២រូបត្រូវបានគេសម្រាំងយកមកតតាំងជាមួយកីឡាករថៃដែលសុទ្ធតែជាជើងខ្លាំងលំដាប់ជួរមុខដូចគ្នានៅក្នុងថ្ងៃដ៏ពិសេសមួយនេះ ។
គូអន្តរជាតិទី១ កីឡាកររឿង សោភ័ណ្ឌ មកពីក្លិបមកុដរាជសីហ៍ ដែលទើបយកឈ្នះកីឡាករថៃកាលពីសប្ដាហ៍មុន ត្រូវបានគេរៀបចំឱ្យជួបប្រកួតជាមួយកីឡាករថៃឈ្មោះ សាន់ឆៃ ប្រានសងហុក ក្នុងប្រភេទទម្ងន់៧០កីឡូក្រាម ។
រឿង សោភ័ណ្ឌ កំពុងឡើងក្រឌីតខ្លាំងនាពេលបច្ចុប្បន្ន ដោយប្រកួតប៉ុន្មានលើកចុងក្រោយជាមួយកីឡាករបរទេសមិនដែលស្គាល់ចាញ់ម្ដងណាឡើយទើបទទួលបានឱកាសប្រកួតជាមួយកីឡាករថៃដែលមានបទពិសោធន៍ប្រកួតនៅលើសង្វៀនយ៉ាងជោកជាំ នៅថ្ងៃនេះទៀត។
កីឡាករថៃម្នាក់នេះធ្លាប់ប្រកួតបាន១១៣ដងឈ្នះ៨២ដង ស្មើ៥ដង និងផ្ដួលគូប្រកួតឱ្យសន្លប់បាន២០ដង។ រីឯរឿង សោភ័ណ្ឌ ធ្លាប់ប្រកួតបាន១៥៥ដង ឈ្នះ១៣៧ដង ស្មើ២ដង ចាញ់១៦ដង និងផ្ដួលគូប្រកួតឱ្យសន្លប់បាន៤១ដង។
ចាំមើលលើកនេះ រឿង សោភ័ណ្ឌ អាចរក្សាកំណត់ត្រាមិនដែលចាញ់នៅលើសង្វៀនទូរទស្សន៍ស៊ីអិនស៊ីបានឬអត់?
គូអន្តរជាតិទី២ កីឡាករ គង់ សំបូរ មកពីសមាគមកីឡាប្រដាល់ក្រសួងការពារជាតិ ត្រូវជួបប្រកួតជាមួយកីឡាករថៃឈ្មោះក្វាងងិនម៉ រាជផាត់ម៉ូបានចមបឹង ក្នុងប្រភេទទម្ងន់៦៣,៥គីឡូក្រាម ។ គង់ សំបូរ ដៃគូប្រកួតរបស់គេលើកនេះ គឺជាខ្លាកំណាចឆ្លងដែនមួយរូប ដែលមានប្រវត្តិប្រកួតគួរឱ្យញាក់សាច់បំផុតទើបអ្នកគាំទ្រកំពុងមានមន្ទិលមិនដឹងថាកីឡាករកម្ពុជារូបនេះអាចតស៊ូប្រកួតជាមួយកីឡាករថៃម្នាក់នេះបានដល់ទឹកទី៥ឬអត់នោះទេ ។
គង់ សំបូរ ធ្លាប់ឡើងសង្វៀនប្រកួតបានចំនួន៧២ដង ឈ្នះ៥៤ដង ស្មើ២ដង និងចាញ់១៦ដង ក្នុងពេលកីឡាករថៃវិញធ្លាប់ប្រកួតបានរហូតដល់ទៅ១០៥ដង ឈ្នះ៧០ដង ស្មើ៥ដងចាញ់៣០ដង និងផ្ដួលគូប្រកួតឱ្យសន្លប់បាន១២ដង។
ដោយឡែកគូប្រកួតមិត្តភាពធម្មតារវាងកីឡាករកម្ពុជានិងកម្ពុជាវិញមាន ង៉ែត្រ រដ្ឋា មកពីក្លិបតាព្រហ្មមានជ័យ ជួបប្រកួតជាមួយកីឡាករទី ពន្លែត មកពីក្លិបអង្គរមានជ័យខេត្តសៀមរាប ។ កីឡាករ តាំង កក់ មកពីក្លិបរស្មីភូមិគាបខេត្តបន្ទាយមានជ័យ ប្រកួតជាមួយកីឡាករ អៀប ធា មកពីក្លិបតាឯកដំបងដែកមានរិទ្ធ និងគូចុងក្រោយកីឡាករ រឿង រឹទ្ធមកពីក្លិបមកុដរាជសីហ៍ ប្រកួតជាមួយកីឡាករចែម ចឺម មកពីក្លិបរាជសីហ៍ខេត្តរតនៈគិរី ៕
ចែករំលែកព័តមាននេះ