ខេត្តកំពង់ស្ពឺ ៖ ម៉ូតូចំនួន៣គ្រឿងដែលក្រុមក្មេងស្ទាវចំនួន៣នាក់បានកែច្នៃស៊ីមាំងឱ្យឮសំឡេងខ្លាំងៗរំខានដល់អ្នកភូមិ ត្រូវបានសមត្ថកិច្ចចរាចរចាប់ដកហូតម៉ូតូទុក និងកោះហៅអាណាព្យាបាលមកទទួលយកទៅអប់រំជាបន្ត ក្រោយពេលសមត្ថកិច្ចបានណែនាំរួចមក។ ប្រតិបត្តិការនេះធ្វើឡើងកាលពីរសៀលថ្ងៃទី៨ ខែវិច្ឆិកា ឆ្នាំ២០១៨ ត្រង់ចំណុចរង្វង់មូលវិមានឯករាជ្យ…
ខេត្តកំពង់ស្ពឺ ៖ ម៉ូតូចំនួន៣គ្រឿងដែលក្រុមក្មេងស្ទាវចំនួន៣នាក់បានកែច្នៃស៊ីមាំងឱ្យឮសំឡេងខ្លាំងៗរំខានដល់អ្នកភូមិ ត្រូវបានសមត្ថកិច្ចចរាចរចាប់ដកហូតម៉ូតូទុក និងកោះហៅអាណាព្យាបាលមកទទួលយកទៅអប់រំជាបន្ត ក្រោយពេលសមត្ថកិច្ចបានណែនាំរួចមក។
ប្រតិបត្តិការនេះធ្វើឡើងកាលពីរសៀលថ្ងៃទី៨ ខែវិច្ឆិកា ឆ្នាំ២០១៨ ត្រង់ចំណុចរង្វង់មូលវិមានឯករាជ្យ ក្បែរសាលាខេត្តកំពង់ស្ពឺ។
ក្មេងស្ទាវដែលសមត្ថកិច្ចចាប់ដកហូតម៉ូតូរួមមាន ១-ឈ្មោះយន វណ្ណឌី ភេទប្រុស អាយុ១៩ឆ្នាំ រស់នៅភូមិសំរោងជើងភ្នំ ឃុំសែនដី ស្រុកសំរោងទង ខេត្តកំពង់ស្ពឺ បើកម៉ូតូម៉ាក Exciter ពណ៌ខៀវ គ្មានស្លាកលេខ ២-ឈ្មោះរឿន វណ្ណនី ភេទប្រុស អាយុ២៣ឆ្នាំ រស់នៅភូមិអង្គសិរី ឃុំភ្នំបាត ស្រុកពញាឮ ខេត្តកណ្តាល ជាម្ចាស់ម៉ូតូម៉ាក MSX ពណ៌ស គ្មានស្លាកលេខ និង៣-ឈ្មោះ ផល រ៉ូត ភេទប្រុស អាយុ១៨ឆ្នាំ រស់នៅភូមិស្វាយលាភ ឃុំទំនប់ធំ ស្រុកពញាឮ ខេត្តកណ្តាល ជាម្ចាស់ម៉ូតូម៉ាក MSX ពណ៌ស គ្មានស្លាកលេខ។
ប្រភពព័ត៌មានពីសមត្ថកិច្ចចរាចរបានឲ្យដឹងថា មុនឈានដល់ឃាត់ខ្លួនក្រុមយុវជនខាងលើ មានប្រជាពលរដ្ឋបានរាយការណ៍មកថា មានក្មេងស្ទាវៗ១ក្រុមជិះម៉ូតូម្នាក់១គ្រឿង ឆ្លងកាត់ពីភូមិមួយចូលភូមិមួយទៀត បើករោទ៍សំឡេងឮខ្លាំងៗរំខានដល់អ្នកដទៃ ហើយម៉ូតូពួកគេគ្មានស្លាកលេខសម្គាល់នោះទេ។
ប្រភពដដែលបន្តថា ក្រោយទទួលបានសេចក្តីរាយការណ៍នេះរួច កម្លាំងនគរបាលចរាចរ ដែលកំពុងដាក់ប៉ុស្តិ៍ត្រួតពិនិត្យច្បាប់ចរាចរណ៍នៅចំណុចក្បែរវិមានឯករាជ្យ ក៏តាមឃ្លាំមើល។លុះដល់ម៉ោងកើតហេតុ មុខសញ្ញាទាំង៣នាក់ បានជិះម៉ូតូមកដល់ ទើបសមត្ថកិច្ច ស្ទាក់ឲ្យឈប់ពិនិត្យ គឺម៉ូតូទាំង៣គ្រឿងសុទ្ឋតែច្នៃបំពង់ស៊ីមាំងខុសប្រក្រតី ។
នៅពេលសមត្ថកិច្ចសាកសួរ ក្មេងស្ទាវទាំងនោះបានឆ្លើយថា ពួកខ្លួនបានកុំម្ម៉ង់ឲ្យជាងច្នៃកាត់បំពង់ដែកទីបផ្សាភ្ជាប់ស៊ីមាំងដើម្បីឲ្យឮសំឡេងខ្លាំង បើកជិតអ្នកដទៃទើបគេភ័យខ្លាច។
បច្ចុប្បន្នសមត្ថកិច្ច បានដកហូតម៉ូតូទាំង៣គ្រឿងយកមករក្សាទុកនៅការិយាល័យនគរបាលចរាចរណ៍ផ្លូវគោកខេត្ត ដើម្បីឲ្យអាណាព្យាបាលពួកគេចូលមកធ្វើកិច្ចសន្យា និងអប់រំរួចយកស៊ីមាំងម៉ូតូធម្មតាមកដោះដូរឲ្យដូចដើមវិញ ទើបប្រគល់ម៉ូតូឲ្យយកទៅប្រើប្រាស់វិញ ៕
ចែករំលែកព័តមាននេះ