ខេត្តកំពង់ស្ពឺ ៖ សង្ស័យស្រវឹងបើកម៉ូតូទៅបុករថយន្តដែលបញ្ច្រាសទិសគ្នា បណ្តាលឲ្យបុរសម្នាក់ស្លាប់ភ្លាមៗនៅកន្លែងកើតហេតុ ។ ករណីគ្រោះថ្នាក់ចរាចរណ៍នេះកើតឡើង កាលពីវេលាម៉ោង២០និង៥៦នាទីត្រូវនឹងថ្ងៃទី០៨ ខែវិច្ឆិកា ឆ្នាំ២០១៨ នៅលើផ្លូវជាតិលេខ៤៤ (km២.៣) ស្ថិតនៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ ។
ប្រភពពីសមត្ថកិច្ចបានឲ្យដឹងថា មុនពេលកើតហេតុមានម៉ូតូ០១គ្រឿង ម៉ាកហុងដា C100 កូរ៉េ ពណ៌ក្រហម គ្មានផ្លាកលេខ បើកបរដោយឈ្មោះ សេក វិន ភេទប្រុស អាយុ៤២ឆ្នាំ រស់នៅភូមិត្រពាំងលើក សង្កាត់ច្បារមន ក្រុងច្បារមន ខេត្តកំពង់ស្ពឺ បើកបរពីទិសខាងកើតទៅទិសខាងលិច លុះទៅដល់ចំណុចខាងលើបានទៅបុករថយន្ដ០១គ្រឿង ម៉ាកហាយឡេនឌ័រ ពណ៌ទឹកប្រាក់ ពាក់ផ្លាកលេខភ្នំពេញ 2AT-6657 ដែលកំពុងបើកបរបញ្ច្រាសទិសគ្នា បណ្ដាលឲ្យគ្រោះថ្នាក់ស្លាប់អ្នកបើកម៉ូតូម្នាក់ ។
ប្រភពបន្តថា អ្នកបើកបរត្រូវបានស្គាល់មានឈ្មោះ ផុង រិទ្ធិវាសនា ភេទប្រុស អាយុ២១ឆ្នាំ រស់នៅសង្កាត់អូរឡាំពិច ខណ្ឌចំការមន រាជធានីភ្នំពេញ ។ ប្រភពបន្តទៀតថា ក្រោយកើតហេតុតៃកុងបានរត់គេចខ្លូនបាត់ ។ ក្រោយមកសមត្ថកិច្ចបានចុះវាស់វែង និងធ្វើកំណត់ហេតុប្រគល់សពឲ្យក្រុមគ្រួសារទទួយកទៅធ្វើបុណ្យតាមប្រពៃណី ។ ចំពោះវត្ថុតាងរថយន្ដ០១គ្រឿង ត្រូវបាននាំយកមករក្សាទុកនៅការិយាល័យនគរបាលចរាចរណ៍ខេត្ត ៕
ចែករំលែកព័តមាននេះ