រាជធានីភ្នំពេញ ៖ ទីបញ្ជាការកងរាជអាវុធហត្ថរាជធានីភ្នំពេញ កាលពីថ្ងៃទី៧ វិច្ឆិកា បានចេញផ្សាយនូវឃ្លីបវីដេអូមួយឈុត ស្តីពីសកម្មភាពក្រុមចោរដែលបានឆក់កាបូបពីស្ត្រីម្នាក់ ដែលកំពុងធ្វើដំណើរដោយម៉ូតូលើដងផ្លូវ នៅក្នុងរាជធានីភ្នំពេញ និងកិច្ចប្រតិបត្តិការបង្ក្រាបក្រុមចោរឆក់នោះ…
រាជធានីភ្នំពេញ ៖ ទីបញ្ជាការកងរាជអាវុធហត្ថរាជធានីភ្នំពេញ កាលពីថ្ងៃទី៧ វិច្ឆិកា បានចេញផ្សាយនូវឃ្លីបវីដេអូមួយឈុត ស្តីពីសកម្មភាពក្រុមចោរដែលបានឆក់កាបូបពីស្ត្រីម្នាក់ ដែលកំពុងធ្វើដំណើរដោយម៉ូតូលើដងផ្លូវ នៅក្នុងរាជធានីភ្នំពេញ និងកិច្ចប្រតិបត្តិការបង្ក្រាបក្រុមចោរឆក់នោះ ដោយមិនរង់ចាំពាក្យបណ្តឹង ។
ខាងក្រោមនេះ ជាខ្លឹមសារទាំងស្រុង របស់ទីបញ្ជាការកងរាជ អាវុធហត្ថរាជធានីភ្នំពេញដែលបានផ្សព្វផ្សាយជុំវិញការបង្ក្រាបជាបន្តបន្ទាប់ ។ ថ្មីៗនេះ មានករណីឆក់កាបូបមួយកើតឡើង បណ្តាលឲ្យស្ត្រីម្នាក់ដួលម៉ូតូបោកទៅនឹងថ្នល់គួរឲ្យរន្ធត់ នាថ្ងៃទី២៧ តុលា ២០១៨ វេលាម៉ោងប្រមាណ៦និង២០នាទី នៅចំណុចផ្លូវជាតិលេខ៦ ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។ ក្រោយពេលកើតហេតុ ជនរងគ្រោះមិនបានដាក់ពាក្យបណ្តឹង ឬផ្តល់ព័ត៌មានដល់សមត្ថកិច្ចអាវុធហត្ថទេ តែ៤ ថ្ងៃក្រោយមកកម្លាំងអាវុធហត្ថរាជធានីភ្នំពេញ បានឃើញព័ត៌មានស្តីពីករណីឆក់កាបូបខាងលើនេះ តាមរយៈវីដេអូឃ្លីបក្នុងបណ្តាញសង្គមហ្វេសប៊ុក អាវុធហត្ថក៏បានចាត់វិធានការណ៍ស្រាវជ្រាវជាបន្ទាន់ និងតាមស្វែងរកមុខសញ្ញាក្រុមចោរឆក់ទាំងនោះ ។
រហូតដល់ថ្ងៃទី៣ វិច្ឆិកា សមត្ថកិច្ចមូលដ្ឋាន កងរាជអាវុធហត្ថខណ្ឌជ្រោយចង្វារ សហការជាមួយកម្លាំងជំនាញការិយាល័យបទ ល្មើសព្រហ្មទណ្ឌនៃកងរាជអាវុធហត្ថរាជធានីភ្នំពេញ បានឃាត់ខ្លួនជនសង្ស័យចំនួន៣នាក់ ១-ឈ្មោះ សុខ ពន្លឺ ២-ឈ្មោះ រស់ សែនវាសនា ហៅ មិត្ត និង៣-ឈ្មោះ នួន រស្មី ហៅ តុង នៅចំណុចភូមិបាក់ខែង និងភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ ។
ក្រោមវិធានការជំនាញរបស់សមត្ថកិច្ចអាវុធហត្ថ ជនសង្ស័យទាំង៣នាក់បានសារភាពថា ពួកគេគឺពិតជាបានធ្វើសកម្មភាពឆក់កាបូបស្ត្រីខាងលើពិតប្រាកដមែន ដែលនៅថ្ងៃកើតហេតុពួកគេបានធ្វើសកម្មភាពតែ៤នាក់ប៉ុណ្ណោះ តែរយៈកាលកន្លងមកក្រុមពួកគេមានគ្នា៦នាក់ តែងចេញធ្វើសកម្មភាពឆក់កាបូប និងទូរស័ព្ទលើដងផ្លូវ គ្រប់ទីកន្លែងក្នុងភូមិសាស្ត្ររាជធានីភ្នំពេញ ដូចជាតាមបណ្តោយផ្លូវជាតិលេខ៦ តំបន់ព្រែកលៀប តំបន់ផ្លូវលីយ៉ុងផាត់ តំបន់វត្តក្តីចាស់ ផ្លូវសហព័ន្ធរុស្សី តំបន់ស្ពានអាកាស៧មករា តំបន់ក្រោមស្ពានជ្រោយចង្វារ តំបន់ផ្សារកណ្តាល ខណ្ឌដូនពេញ និងតំបន់ផ្សេងៗទៀត ដែលពួកគេបានជិះឆ្លងកាត់ឃើញស្ថានភាពផ្លូវស្ងាត់ និងជនរងគ្រោះធ្វេសប្រហែស ។
បច្ចុប្បន្នក្រៅពីក្រុមចោរទាំង៣នាក់ដែលសមត្ថកិច្ចឃាត់ខ្លួនបាននេះ គឺនៅមានបក្សពួក៣នាក់ទៀត បាននិងកំពុងរត់គេចផងដែរ ក្នុងនោះមាន១-ឈ្មោះ សោម ពេជ្រ ហៅ ពេជ្រខ្មោច ២-ឈ្មោះ ពេជ្រ ហៅ ពេជ្រតូច និង៣-ឈ្មោះ រិទ្ធ ហៅ លឹប ។ ដោយឡែក ឈ្មោះ សោម ពេជ្រ ហៅ ពេជ្រខ្មោច ក៏ធ្លាប់ត្រូវបានអាវុធហត្ថរាជធានីភ្នំពេញ ឃាត់ខ្លួនបញ្ជូនទៅផ្តន្ទាទោសម្តងរួចហើយ កាលពីអំឡុងខែធ្នូ ឆ្នាំ២០១៧ ពាក់ព័ន្ធករណីឆក់កាបូបជនបរទេស នៅចំណុចមុខផ្សារឡាក់គី ផ្លូវព្រះសីហនុ សង្កាត់បឹងកេងកង១ ខណ្ឌចំការមន រាជធានីភ្នំពេញ ។
ក្រោយពេលស៊ើបអង្កេត និងស្តាប់ចម្លើយជនសង្ស័យអស់ពេល៤៨ម៉ោង សមត្ថកិច្ចអាវុធហត្ថរាជធានីភ្នំពេញ បានស្វែងជនរងគ្រោះ ដែលត្រូវបានក្រុមចោរទាំងនេះ ឆក់កាបូបបណ្តាលឲ្យដួលម៉ូតូកាលពីថ្ងៃទី២៧ ខែតុលា ឆ្នាំ២០១៨ មកដាក់ពាក្យបណ្តឹងបំពេញនិតិវិធីកសាងសំណុំរឿងបញ្ជូនទៅតុលាការ ដើម្បីផ្តន្ទាទោសក្រុមចោរទាំងនេះតាមច្បាប់ ។
ជាមួយនេះផងដែរ សមត្តកិច្ចកងរាជអាវុធហត្ថសូមអំពាវនាវដល់មហាជន ប្រសិនបានឃើញឬស្គាល់ជនសង្ស័យទាំង៣នាក់ដែលរត់គេចខ្លួនខាងលើ ជួយផ្តល់ដំណឹងដល់សមត្ថកិច្ចអាវុធហត្ថរាជធានីភ្នំពេញ តាមរយៈលេខទូរស័ព្ទ ០១៧ ៨១ ៨១ ៧១ ឬសមត្ថកិច្ចដែលនៅជិតលោកអ្នក ដោយមានការធានារក្សាការសម្ងាត់ជូនទៀតផង ៕
ចែករំលែកព័តមាននេះ