រាជធានីភ្នំពេញ ៖ យុវជនម្នាក់អាយុប្រហែល២៥ឆ្នាំសង្ស័យស្រវឹងស្រា បានបើករថយន្តស៊េរីទំនើបមួយគ្រឿងបោះពួយយ៉ាងលឿន និងរេចង្កូតទៅបុកក្បាលរបាំងថ្មពុះចែកទ្រូងផ្លូវ រួចរេឆ្លងទៅផ្លូវម្ខាងទៀតបុកដើមរំយោលមួយដើមរួមនឹងរបងវិទ្យាល័យ ជា ស៊ីម សាមគ្គី បណ្តាលឲ្យរថយន្តក្រឡាប់ផ្ងារជើង…
រាជធានីភ្នំពេញ ៖ យុវជនម្នាក់អាយុប្រហែល២៥ឆ្នាំសង្ស័យស្រវឹងស្រា បានបើករថយន្តស៊េរីទំនើបមួយគ្រឿងបោះពួយយ៉ាងលឿន និងរេចង្កូតទៅបុកក្បាលរបាំងថ្មពុះចែកទ្រូងផ្លូវ រួចរេឆ្លងទៅផ្លូវម្ខាងទៀតបុកដើមរំយោលមួយដើមរួមនឹងរបងវិទ្យាល័យ ជា ស៊ីម សាមគ្គី បណ្តាលឲ្យរថយន្តក្រឡាប់ផ្ងារជើង និងឆេះ
សន្ធោរសន្ធៅអស់ទាំងស្រុង ។ គ្រោះថ្នាក់នេះកើតឡើងកាលពីវេលាម៉ោង១០និង៥០នាទីយប់ថ្ងៃទី៧ ខែវិច្ឆិកា នៅតាមផ្លូវលេខ២៧១ ក្នុងសង្កាត់ទឹកល្អក់ទី៣ ខណ្ឌទួលគោក ។
ប្រភពនៅកន្លែងកើតហេតុឲ្យដឹងថា រថយន្តទំនើបមួយគ្រឿងនេះម៉ាកឡង់គ្រីស្ស័រស៊េរីឆ្នាំ២០១៨ ពណ៌.ស ពាក់ផ្លាកលេខ ភ្នំពេញ២V-០០៧៩ ធ្វើដំណើរយ៉ាងលឿនតាមផ្លូវលេខ២៧១ ក្នុងទិសដៅពីស្តុបណូគា ឆ្ពោះទៅស្ពានអាកាសស្ទឹងមានជ័យ ។ លុះទៅដល់ចំណុចខាងលើ ដោយផ្លូវមានសភាពកោង ស្រាប់តែរថយន្តរេចង្កូតទៅខាងឆ្វេងដៃបុកក្បាលរបាំងថ្មពុះចែកទ្រូងផ្លូវ បណ្ដាលឲ្យបែកអស់មួយចំណិត រួចរេបន្តឆ្លងផ្លូវទៅបុកបង្គោលថ្មរបស់សាលាសម្រាប់ថ្ពក់ច្រវាក់ហាមចតលើចិញ្ចើមថ្នល់ បណ្ដាលឲ្យបាក់អស់ចំនួន៣ដើម ។
ថ្វីបើបែបនេះក្តី រថយន្តមិនទាន់អស់ល្បឿនទេ បន្តជ្រុលឡើងលើខឿនបុកដើមផ្ការំយោលទំហំគល់ប្រមាណ២តឹកមួយដើម បណ្ដាលឲ្យបាក់ដាច់ជា២កំណាត់ រួចខ្ទាតផ្លោងរថយន្តទៅប៉ះនឹងរបងសាលាបណ្តាលឱ្យបែកប្រេះ ទើបរថយន្តក្រឡាប់ផ្ងារជើងបែរក្បាលត្រឡប់ក្រោយគងលើដើមផ្ការំយោលមួយដើមទៀតទើបឈប់ស្ងៀម ។ ប្រភពដដែលបន្តថា មួយសន្ទុះក្រោយមកក៏ឃើញយុវជនជាអ្នកបើកបរលូនចេញពីក្នុងរថយន្ត រួចគេចខ្លួនចេញពីកន្លែងកើតហេតុបាត់ស្រមោល ។ បន្ទាប់មក ស្រាប់តែមានផ្សែង
ហុយខ្មួលលាយឡំនឹងអណ្ដាតភ្លើងឆេះចេញពីក្នុងរថយន្តខាងលើយ៉ាងសន្ធោសន្ធៅ ។
ភ្លាមៗ អ្នករស់នៅក្បែរកន្លែងកើតហេតុបាននាំគ្នាយកបំពង់ពន្លត់អគ្គិភ័យមកបាញ់ពន្លត់អស់ពីរទៅបីបំពង់ ប៉ុន្តែអណ្ដាតភ្លើងនៅតែបន្តឆេះរថយន្តកាន់តែខ្លាំង ទើបរាយការណ៍ជូនសមត្ថកិច្ចមូលដ្ឋាន និងទាក់ទងហៅរថយន្តពន្លត់អគ្គិភ័យឲ្យមកជួយអន្តរាគមន៍ ។ រថយន្តពន្លត់អគ្គិភ័យ១គ្រឿងរបស់ស្នងការដ្ឋាននគរបាលរាជធានីភ្នំពេញ បានមកដល់បាញ់ទឹកពន្លត់ ប៉ុន្តែយ៉ាងណាក៏ដោយ រថយន្តខាងលើត្រូវភ្លើងឆេះអស់នៅសល់តែគ្រោងដែកទៅហើយ ។
ក្រោយពេលកើតហេតុ សមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញឲ្យមកស្ទូចយករថយន្តខាងលើទៅរក្សាទុកនៅឯការិយាល័យនគរបាលចរាចរណ៍ផ្លូវគោករាជធានីភ្នំពេញ ដើម្បីឱ្យម្ចាស់ចូលខ្លួនមកធ្វើការដោះស្រាយ ។ ពិតជាគួរឱ្យសោកស្តាយ ដែលរថយន្តស៊េរីទំនើបតម្លៃក្បែរពីរសែនដុល្លារ បែរជាត្រូវបំផ្លាញតែមួយប៉ប្រិចភ្នែក ៕
ចែករំលែកព័តមាននេះ