ខេត្តកំពត ៖ តាមសេចក្តីរាយការណ៍បឋមពីសមត្ថកិច្ចបានឲ្យដឹងថា នៅវេលាម៉ោង៦និង៣០នាទីព្រឹក ថ្ងៃទី៩ វិច្ឆិកា ឆ្នាំ២០១៨នេះ ដែលហេតុការគ្រោះថ្នាក់ចរាចរណ៍មួយបានកើតឡើងរវាងរថយន្តបែនដឹកដីបានប៉ះគ្នាជាមួយរថយន្តសាំយ៉ុងដឹកកម្មករកម្មការិនីរោងចក្រកាត់ដេរ ក្នុងទិសដៅបញ្ជ្រាសគ្នាលើផ្លូវជាតិលេខ៣ កំពត- ខេត្តព្រះសីហនុ ត្រង់ចំណុចខាងត្បូងទីតាំងសិប្បកម្មសាច់ក្តាម ចម្ងាយជាង២០ម៉ែត្រ ស្ថិតក្នុងភូមិតាដឹប សង្កាត់អណ្តូងខ្មែរ ក្រុងកំពត ខេត្តកំពត ។
ក្នុងហេតុការគ្រោះថ្នាក់ចរាចរណ៍ខាងលើនៅមិនទាន់ដឹងថា ចំនួនអ្នករងគ្រោះជាកម្មករកម្មការិនីរបួសធ្ងន់ និងស្រាលប៉ុន្មាននោះទេ គេគ្រាន់តែដឹងថា មនុស្សយ៉ាងតិចពី៧ទៅ១០នាក់ ជាកម្មករកម្មការិនីបានរងរបួសធ្ងន់និងស្រាល នៅក្នុងហេតុការខាងលើនេះ ។
ប្រភពដដែលឲ្យដឹងថា ជនរងគ្រោះទាំងអស់ត្រូវបានដឹកទៅសង្គ្រោះនៅមន្ទីរពេទ្យស៊ុនយ៉ាឃៀលចំការដូង ស្ថិតក្នុងភូមិកែបថ្មី ឃុំបឹងទូក ស្រុកទឹកឈូ ខេត្តកំពត ។
តាមប្រភពពីអ្នកឃើញហេតុការនៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តម៉ាកសាំយ៉ុង ពណ៌សំបកឪឡឹក មិនចាំផ្លាកលេខ ដឹកកម្មករកម្មការិនីបើកបរក្នុងទិសដៅពីកើតទៅលិច លុះមកដល់ចំណុចកើតហេតុ ដោយផ្លូវមានជង្ហុករថយន្តដែលដឹកកម្មករក៏បានគេចជង្ហុកផ្លូវ ទទួលរថយន្តម៉ាកបែនដឹកដីបើកបរក្នុងល្បឿនលឿនមកពីទិសខាងលិចក៏បានប៉ះ និងរថយន្តដែលដឹកកម្មករជញ្ជាំងខាងឆ្វេងក្រពឹតយ៉ាងដំណំ ។ រីឯរថយន្តបែនក៏បានខូចខាតផ្នែកខាងមុខយ៉ាងដំណំដែរ ដោយជ្រុះភ្លើងហ្វា និងបែកកញ្ចក់ពេញផ្លូវ ហើយក្រោយពីកើតហេតុរថយន្តបែនបានបន្ថែមល្បឿនរត់គេចខ្លួនបាត់ នៅសល់តែរថយន្តដឹកកម្មករនៅកន្លែងកើតហេតុ ។
នៅក្នុងហេតុការនេះកម្មករកម្មការិនីបានរងរបួសធ្ងន់ និងស្រាលជាច្រើននាក់ កំពុងត្រូវបានសង្គ្រោះនៅមន្ទីរស៊ុនយ៉ាឃៀលចំការដូង សមត្ថកិច្ចកំពុងចុះទៅស្រង់ស្ថិតិឈ្មោះ និងចំនួនមនុស្សដែលរងគ្រោះធ្ងន់ និងស្រាលនៅមន្ទីរពេទ្យ ។ ចំណែករថយន្តបែនដឹកដីដែលរត់គេចខ្លួនសមត្ថកិច្ចកំពុងតែតាមរុករកតាមច្រកល្ហកក្នុងក្រុងកំពតមិនអាចគេចខ្លួន ឬលាក់ខ្លួនបានទេ ពីព្រោះរថយន្តបែននេះក៏រងការខូចខាតធ្ងន់ដែរ ៕
ចែករំលែកព័តមាននេះ