បានក្លាយជាវត្ថុអនុស្សាវរីយ៍ ជូនដល់យុវសិស្សនិទ្ទេសA…
- ភ្នំពេញ
រាជធានីភ្នំពេញ ៖ ដូចការគ្រោងទុក នាព្រឹកថ្ងៃទី៨ ខែវិច្ឆិកា នៅវិមានសន្តិភាព ទីស្តីការនាយករដ្ឋមន្ត្រី សម្តេចអគ្គមហាសេនាបតីតេជោ ហ៊ុន សែន…
រាជធានីភ្នំពេញ ៖ ដូចការគ្រោងទុក នាព្រឹកថ្ងៃទី៨ ខែវិច្ឆិកា នៅវិមានសន្តិភាព ទីស្តីការនាយករដ្ឋមន្ត្រី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានអញ្ជើញជួបសំណេះសំណាល និងផ្តល់រង្វាន់ដល់សិស្សដែលបានប្រឡងជាប់សញ្ញាបត្រមធ្យមសិក្សាទុតិយភូមិនិទ្ទេស A ចំនួន៤០៨នាក់ ។
សម្តេចតេជោ បានមានប្រសាសន៍ទៅកាន់យុវសិស្សទាំងអស់ថា ចំណុចនេះគឺជាចំណុចដែលយើងអាចនិយាយបានថា សង្គមរបស់យើងចាប់ផ្តើមប្រែប្រួលនៅពេលដែលយើងចាប់ផ្តើមរឹតបន្តឹងការប្រឡង ។ ពីមុនការប្រឡងមានការលួចចម្លង បាញ់ប្រូ៊យ៉ុងចូលតាមបង្អួច…ពេញទឹកពេញដី ។ សម្តេចតេជោបញ្ជាក់ថា ឥឡូវនេះទ្រឹស្តី «ចេះទើបជាប់ បើមិនចេះអត់ជាប់» ។
ក្នុងឱកាសនោះ សម្តេចតេជោបានជូនសារចំពោះចៅៗយុវសិស្សដែលប្រឡងមិនជាប់ថា «សូមចៅៗបន្តការខិតខំ ដើម្បីរៀនបន្តទៀតដើម្បីប្រឡងឆ្នាំក្រោយ» ។ទាក់ទិននឹងបញ្ហាយេនឌ័រ ការប្រឡងសញ្ញាបត្រមធ្យមសិក្សាទុតិយភូមិនៅឆ្នាំនេះ ដែលប្រឡងជាប់មាន៧៦.០៣៤នាក់ក្នុងនោះមាននារី៣៩.៨៩១នាក់ គឺច្រើនជាងសិស្សប្រុសរហូតដល់៣.៧៤៨នាក់ ។
ដោយឡែក និយាយពីនិទ្ទេសA សិស្សស្រីតិចជាងសិស្សប្រុស២០នាក់ ប៉ុន្តែដល់និទ្ទេស B វិញសិស្សស្រីច្រើនជាងសិស្សប្រុស៣៨នាក់ ។និទ្ទេសC សិស្សស្រីច្រើនជាងសិស្សប្រុស៦៣៣នាក់ និទ្ទេសD សិស្សស្រីច្រើនជាងសិស្សប្រុស១.៩៩៦នាក់។ លុះដល់និទ្ទេស E បែរជាសិស្សប្រុសច្រើនជាងសិស្សស្រី ។
សម្តេចតេជោបានឲ្យគិតជាភាគរយ ព្រោះសម្តេចត្រូវសិក្សាអំពីបញ្ហានេះដែរ គឺជំរុញឲ្យកុមារី យុវនារី បានទទួលការបណ្តុះបណ្តាលកាន់តែខ្ពស់កាន់តែល្អ ។ ដូច្នេះគឺជាជោគជ័យមួយនៅក្នុងនយោបាយសមភាពយេនឌ័រនៅក្នុងវិស័យអប់រំ ។ សម្តេចតេជោ បានលើកទឹកចិត្តឲ្យមានការវិនិយោគទៅលើការសាងសង់ ដែលទន្ទឹមនឹងការសាងសង់អគារសិក្សាបន្ថែមគ្រប់ទីកន្លែង ក៏ត្រូវយកចិត្តទុកដាក់លើការសាងសង់អគារស្នាក់នៅរបស់គ្រូ ហើយនិងការស្នាក់នៅរបស់សិស្សដែលមានទីលំនៅឆ្ងាយ ដើម្បីកុំឲ្យមានការបោះបង់ចោលការសិក្សា ឬត្រូវបង់ថ្លៃសម្រាប់ឈ្នួលផ្ទះ នៅពេលដែលខ្លួនមករៀន កាត់បន្ថយការលំបាករបស់មាតាបិតា អាណាព្យាបាល។
ទាក់ទិននឹងការសាងសង់អគារសិក្សា សម្តេចតេជោ បានសម្រេចឲ្យសាងសង់អគារឡើងដល់៣ជាន់-៤ជាន់ ដើម្បីកុំឲ្យពិបាករកដីសាងសង់ ព្រោះតម្លៃដីឥឡូវឡើងថ្លៃណាស់ ។ ឥឡូវមនុស្សធ្វើអ្នកមានច្រើនណាស់ដោយសារដី ។ សម្តេចតេជោមានប្រសាស៍ថា បើខ្ញុំមិនរំលត់សង្គ្រាមទ េអស់លោកក៏មិនអាចមានសន្តិភាពហើយប្រើប្រាស់ដីធ្លីនោះបានដែរ ។
បើខ្ញុំមិនដឹកនាំកសាងហេដ្ឋារចនាសម្ព័ន្ធតភ្ជាប់ទៅកាន់តំបន់នោះ ដីរបស់អស់លោកនៅតែអត់មានតម្លៃឥឡូវដីគ្រប់កន្លែងឡើងថ្លៃ ។សម្តេចតេជោ ហ៊ុន សែន បានប្រកាសថាក្នុងពេលជួបសំណេះសំណាលនិងផ្តល់រង្វាន់លើកទឹកចិត្តដល់សិស្សជាប់និទ្ទេសAម្តងៗ គឺចំណាយអស់ប្រមាណ៨០០លានរៀល ស្មើប្រមាណ២០ម៉ឺនដុល្លារអាមេរិក ។ សម្តេចបានជួបសិស្សប្រឡងជាប់បាក់ឌុបទទួលបាននិទ្ទេស A ចាប់តាំងពីឆ្នាំ២០១៤ ហើយមកដល់ឆ្នាំ២០១៨នេះ ជាលើកទី៥ហើយ ។
នៅចុងបញ្ចប់នៃពិធីសំណេះសំណាលនេះ សម្តេចតេជោនាយករដ្ឋមន្ត្រី ក៏បានប្រកាសផ្តល់រង្វាន់លើកទឹកចិត្តដល់បេក្ខជនប្រឡងជាប់បាក់ឌុបនិទ្ទេសA នៅឆ្នាំ២០១៨ ចំនួន៤០៨នាក់ ក្នុងម្នាក់ៗទទួលបានប្រាក់ស្លឹង១ ដែលជាប្រាក់បោះពុម្ពនៅឆ្នាំ១៥១៤ ក្រោយពេលហ្លួងព្រះស្តេចកនឈ្នះសង្គ្រាម ហើយត្រូវរើរាជធានីទៅតាំងនៅខេត្តត្បូងឃ្មុំសព្វថ្ងៃ ។ ប្រាក់ស្លឹងនេះ យើងបានយកពីប្រទេសហូឡង់ ហើយបោះពុម្ពឡើងវិញនៅប្រទេសសិង្ហបុរី ដែលធ្វើពីមាសផង និងធ្វើពីប្រាក់ផង។ ការផ្តល់ជូនប្រាក់ស្លឹងនេះ ដើម្បីឲ្យដឹងថា ខ្មែរយើងមានប្រាក់ចាយតាំងពីឆ្នាំ១៥១៤ ។
ក្រៅពីនេះ សិស្សម្នាក់ៗក៏ទទួលបានប្រាក់២លានរៀល អាយផេត១គ្រឿង(តម្លៃ៤៨០ដុល្លារ)និងសៀវភៅម្នាក់២ក្បាល ដែល១ក្បាលជារបស់លោកតាក្រមង៉ុយ និង១ក្បាលទៀតជាសៀវភៅរបស់បណ្ឌិត អ៊ូចុង ច្បាប់គោរពមាតាបិតា ។ដោយឡែក នាយកសាលាចំនួន១៧១នាក់ដែលអមដំណើរបេក្ខជនប្រឡងជាប់បាក់ឌុបទទួលបាននិទ្ទេសA មកជួបសម្តេចតេជោនាយករដ្ឋមន្ត្រីនាពេលនេះ ម្នាក់ៗទទួលបានប្រាក់ស្លឹង១ សៀវភៅ១ប្រអប់ ថវិកាផ្ទាល់ខ្លួន១លានរៀល និងថវិកាសម្រាប់សាលាចំនួន១៧១ ក្នុងសាលា មួយទទួលបាន៣លានរៀល។
សម្តេចតេជោ ហ៊ុន សែន ក៏បានណែនាំដល់នាយកសាលាថា ប្រាក់៣លានរៀល នាយកសាលាអាចរៀបចំទទួលទានបាយជួបជុំគ្នាជាមួយលោកគ្រូអ្នកគ្រូ នៅពេលបុណ្យឯករាជ្យជាតិ ឬក៏នៅពេលបុណ្យអុំទូក ដើម្បីលើកទឹកចិត្តឲ្យលោកគ្រូអ្នកគ្រូ ខិតខំបង្រៀនសិស្ស ដើម្បីឲ្យសិស្សប្រឡងជាប់កាន់តែច្រើន ៕
ចែករំលែកព័តមាននេះ