រាជធានីភ្នំពេញ ៖ បុរសជាអ្នកប្រកបរបរដើររើសអេតចាយម្នាក់បានខ្យល់គដួលស្លាប់នៅលើគំនរសំរាម ពេលកំពុងតែដែររើសអេតឆាយ ។ ហេតុការណ៍នេះបង្កឱ្យមានការណ៍ភ្ញាក់ផ្អើលឡើងកាលពីវេលាម៉ោង៣និង៣០នាទីរសៀល ថ្ងៃទី៨ ខែវិច្ឆិកា ឆ្នាំ២០១៨ នៅលើទីលានចាក់សំរាមជើងឯក ភូមិតាឡី សង្កាត់ដង្កោ ខណ្ឌដង្កោ ។
ជនរងគ្រោះដែលស្លាប់ឈ្មោះ ខុន សាវី ភេទប្រុស អាយុ៤៨ឆ្នាំ មុខរបររើសអេតឆាយ ស្នាក់ម្តុំចាក់សំរាម កន្លែងកើតហេតុ មានស្រុកកំណើត ភូមិមេឡូម ឃុំព្រៃស្នៀត ស្រុកពារ៍រាំង ខេត្តព្រៃវែង និងប្រពន្ធកំពុងមានផ្ទៃពោះ៦ខែឈ្មោះ អឿង អាំម មុខរបររើសអេតចាយ មានកូន៥នាក់ ប្រុស៣នាក់ ស្រី២នាក់ ។
តាមសម្តីស្ត្រីជាប្រពន្ធបានឱ្យដឹងថា មុនពេលកើតហេតុ ប្តីរបស់គាត់បានដើររើសអេតចាយ នៅទីលានចាក់សំរាមជើងឯក លុះដើររើសបណ្តើរ ប្តីរបស់គាត់បានត្អួញថា «ចេះតែរោយ.ក» លុះដល់វេលាកើតហេតុ ក៏ស្រាប់តែប្តីរបស់គាត់បានដួលសន្លប់នៅលើគំនរសំរាមបាត់មាត់បាត់កតែម្តង ។
ភ្លាមនោះដែរ គាត់ព្រមទាំងបងប្អូនដែលប្រកបរបរដូចគ្នាបានមកជួយលើកប្តីយកទៅដាក់លើគ្រែ ដើម្បីជួយសង្គ្រោះ តែពេលសែងមកដាក់លើគ្រែ ប្តីរបស់គាត់បានស្លាប់បាត់ទៅហើយ ។
រហូតដល់វេលាម៉ោង៥និង៣០នាទីល្ងាចថ្ងៃដដែល មានអាជ្ញាធរមូលដ្ឋាន ព្រមទាំងសមត្ថកិច្ច ប៉ុស្តិ៍នគរបាលដង្កោ ព្រមទាំងជំនាញកោសល្យវិច័យខណ្ឌដង្កោ បានចុះទៅកន្លែងកើតហេតុ ដើម្បីសាកសួរពីដំណើររឿង និងពិនិត្យសព ។
ក្រោយពេលកើតហេតុ សមត្ថកិច្ចជំនាញបានពិនិត្យឃើញថា ជនរងគ្រោះពិតជាស្លាប់ដោយសារខ្យល់គរប្រាកដមែន ហើយក៏បានធ្វើលិខិតប្រគល់សពជនរងគ្រោះអោយទៅក្រុមគ្រួសារសាច់ញាតិដើម្បីយកទៅចាត់ចែងធ្វើបុណ្យតាមប្រពៃណី ។
ពេលនោះដែរ ដោយសារតែគ្រួសាររបស់ជនរងគ្រោះក្រីក្រលំបាកពេក ព្រមទាំងអត់មានលុយធ្វើបុណ្យផងនោះ ឃើញមានតំណាងខាងគ្រប់គ្រងទីលានចាក់សំរាម បានជួយចេញថ្លៃបូជាសព ព្រមទាំងលោក ចៅសង្កាត់រងដង្កោ បានជួយឧបត្ថម្ភជាថវិកា ដើម្បីឱ្យក្រុមគ្រួសារយកសពជនរងគ្រោះទៅធ្វើបុណ្យនៅវត្តឫស្សីសាញ់ ខណ្ឌដង្កោ ៕
ចែករំលែកព័តមាននេះ