កាលពីដើមរដូវរំហើយកន្លងមកនេះ បុគ្គលិកក្រុមហ៊ុន Terrafugia បានស្នើទៅក្រុមប្រឹក្សាទីក្រុងWoburn នៃរដ្ឋMassachusetts សហរដ្ឋអាមេរិក ដើម្បីពង្រីកការិយាល័យធំរបស់ខ្លួនដែលអាចឲ្យអ្នកជួសជុល និងវិស្វករយន្តហោះធ្វើការសាកល្បងនូវវត្ថុធាតុសម្រាប់រថយន្តដែលអាចហោះបានរបស់ក្រុមហ៊ុន ។
ដើម្បីក្លាយជាទីក្រុងដែលជាកន្លែងកំណើតនៃរថយន្តអាចហោះបានដំបូងលើពិភពលោក មន្ត្រីនៅទីក្រុងWoburnបានអនុញ្ញាតលើសំណើនេះ ។
លោក Anthony Hazlett វិស្វករម្នាក់នៅក្រុមហ៊ុន Terrafugia បានឲ្យដឹងថា ៖« អគារនេះអនុញ្ញាតឲ្យពួកយើងបន្តយុទ្ធនាការក្នុងការបង្កើតផលិតផលថ្មីៗសម្រាប់ទីផ្សារ និងធ្វើឲ្យទីក្រុង Woburn ជាទីតាំងនាំមុខរបស់ក្រុមហ៊ុនអាកាសចរណ៍ធំៗ »។
គួរបញ្ជាក់ថា លោកនាយកប្រតិបត្តិ Chris Jaran របស់ក្រុមហ៊ុនTerrafugia បានប្រកាសថា រថយន្តគំរូឈ្មោះថា Transition ដែលអាចហោះបាន នឹងត្រូវលក់លើទីផ្សារចាប់ពីឆ្នាំ ២០១៩ ខាងមុខនេះទៅ ។
ក្រុមហ៊ុនខាងលើបានឲ្យដឹងដែរថា រថយន្ត Transition អាចផ្ទុកអ្នកដំណើរបានពីរនាក់ និងអាចផ្លាស់ប្តូរទៅMode ដែលអាចហោះបានដោយគ្រាន់តែទម្លាក់ស្លាបសម្រាប់បត់បែនប៉ុណ្ណោះ ។
ក្នុងរយៈពេល៥ឆ្នាំមកនេះ អ្នកហោះហើរសាកល្បងបានបើកបររថយន្តនេះលើអាកាស និងចុះចតវិញប្រមាណ៣១៧ដង ក្រោមអាកាសធាតុ និងស្ថានការណ៍ខ្យល់ខុសៗគ្នា ។
ជាមួយគ្នានេះ ក្រុមហ៊ុន Terrafugia មានផែនការផលិតច្រើនជាងរថយន្តដែលអាចហោះបានទៀត ។ ប៉ុន្មានឆ្នាំមុន បុគ្គលិករបស់ក្រុមហ៊ុនបានប្រកាសពីផែនការចេញលក់រថយន្តដែលអាចហោះបាននៅមួយកន្លែងផ្សេងទៀតផង ៕
ចែករំលែកព័តមាននេះ