ខេត្តស្ទឹងត្រែង ៖ គ្រាប់យុទ្ធភណ្ឌមិនទាន់ផ្ទុះប្រភេទធន់ធ្ងន់សេសសល់ពីសម័យសង្គ្រាមមួយគ្រាប់ត្រូវគេប្រទះឃើញកាលពីព្រឹកថ្ងៃទី៨ ខែវិច្ឆិកា ឆ្នាំ២០១៨ ស្ថិតស្រុកសៀមប៉ាង ខេត្តស្ទឹងត្រេង ។
ប្រភពព័ត៌មានអោយដឹងថា គ្រាប់យុទ្ធភណ្ឌមិនទាន់ផ្ទុះខាងលើមានប្រវែង និងទំហំធំក្នុងសភាពកាន់ច្រែសចាប់ ក្រោយការប្រទះឃើញនៅច្រាំងទន្លេភូមិបានមួង ឃុំសេកុង ស្រុកសៀមប៉ាង រួចនោះប្រជាពលរដ្ឋបានរាយការណ៍ទៅអាជ្ញាធរ និងកម្លាំងសមត្ថកិច្ចក្នុងមូលដ្ឋានដើម្បីមានវិធានការនាំបញ្ចៀសចេញរក្សាសន្តិសុខ ។
នៅព្រឹកទី៨ ខែវិច្ឆិកា ដដែលដោយទទួលសេចក្តីរាយការណ៍ពីប្រជាពលរដ្ឋកម្លាំងនគរបាលប៉ុស្តិ៍បាលឃុំសេកុងបានបន្តរាយការណ៍ទៅកម្លាំងជំនាញដោះមីន ហៅកាត់ថា «ស៊ីម៉ាក់» ចុះទៅពិនិត្យ និងជម្លៀសចេញពីមូលដ្ឋាននោះនាំទៅរក្សាទុកទីតាំងសុវត្ថិភាព ។
មន្ត្រីស៊ីម៉ាក់ក្នុងប្រតិបត្តិការណ៍អោយដឹងថា គ្រាប់យុទ្ធភណ្ឌមិនទាន់ផ្ទុះធុនធ្ងន់នេះជាប្រភេទគ្រាប់ MK82 ជាប្រភេទគ្រាប់បាញ់ផ្លោង ឬទម្លាក់ពីលើយន្តហោះហើយគ្រាប់ប្រភេទខាងលើនេះវាមានអនុភាពអាចសម្លាប់មនុស្សរាប់សិបនាក់ប្រសិនវាផ្ទុះឡើង ។ ហើយគ្រាប់នេះដែរត្រូវបានគេប្រើប្រាស់ក្នុងសម័យសង្គ្រាមអាមេរិកាំងដែលទម្លាក់ក្នុងដែនដីខ្មែរបង្កអោយប្រជាពលរដ្ឋខ្មែរស្លាប់យ៉ាងច្រើននាសម័យនោះ ៕
ចែករំលែកព័តមាននេះ