រាជធានីភ្នំពេញ ៖ ដើម្បីសម្រួលភាពងាយស្រួលក្នុងការបញ្ជូនពលករកម្ពុជាទៅធ្វើការនៅប្រទេសថៃមានភាពរហ័ស និងកាត់បន្ថយការឆ្លងដែនខុសច្បាប់កម្ពុជា-ថៃ នឹងដាក់ប្រើប្រាស់ស្វ័យប្រវត្តិកម្មក្នុងការបញ្ជូន និងទទួលពលករតាមប្រព័ន្ធអនឡាញ (MOU Online) នៅចុងឆ្នាំនេះ ។…
រាជធានីភ្នំពេញ ៖ ដើម្បីសម្រួលភាពងាយស្រួលក្នុងការបញ្ជូនពលករកម្ពុជាទៅធ្វើការនៅប្រទេសថៃមានភាពរហ័ស និងកាត់បន្ថយការឆ្លងដែនខុសច្បាប់កម្ពុជា-ថៃ នឹងដាក់ប្រើប្រាស់ស្វ័យប្រវត្តិកម្មក្នុងការបញ្ជូន និងទទួលពលករតាមប្រព័ន្ធអនឡាញ (MOU Online) នៅចុងឆ្នាំនេះ ។ នេះបើតាមការឲ្យដឹងពីរដ្ឋមន្ត្រីក្រសួងការងារ ។
ក្នុងពិធីចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការការពារ និងគ្រប់គ្រងពលករកម្ពុជាធ្វើការនៅព្រះរាជាណាចក្រថៃឡង់ដ៏រវាងសមាគមទីភ្នាក់ងារហត្ថពលកម្មកម្ពុជាសមាគមជ្រើសរើសពលករកម្ពុជា និងសមាគមទំនាក់ទំនងកម្ពុជា-ថៃ កាលពីល្ងាចថ្ងៃទី៧ វិច្ឆិកា នៅសណ្ឋាគារដឹកក្រេឌូក លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ដើម្បីសម្រួលដល់ការបញ្ជូនពលករកម្ពុជាទៅធ្វើការនៅប្រទេសថៃតាមប្រព័ន្ធអនុស្សរណៈយោគយល់គ្នាឲ្យមានភាពរហ័ស និងជៀសវាងការធ្វើទេសន្តរប្រវេសន៍ដោយប្រថុយប្រថានគ្មានឯកសារ និងចូលរួមប្រយុទ្ធប្រឆាំងនឹងការជួញដូរមនុស្សឆ្លងដែន អគ្គនាយកដ្ឋានការងារនៃក្រសួងការងារ និងបណ្តុះបណ្តាលវិជ្ជាជីវៈកម្ពុជា និងអគ្គនាយកដ្ឋានការងារនៃក្រសួងការងារថៃកំពុងធ្វើការសាកល្បង (Testing) ដាក់ឲ្យប្រើប្រាស់ប្រព័ន្ធស្វ័យប្រវត្តិកម្មក្នុងការបញ្ជូន និងទទួលពលករតាមប្រព័ន្ធអនឡាញ (MOU Online) ដែលរំពឹងថា នឹងបញ្ចប់នៅចុងឆ្នាំនេះ ។
លោករដ្ឋមន្ត្រីបានបញ្ជាក់ថា «ការដាក់ឲ្យដំណើរការប្រើប្រាស់ប្រព័ន្ធអនឡាញនេះដំណើរការបញ្ជូន និងទទួលពលករដែលបានកាត់បន្ថយពេលវេលាយ៉ាងច្រើនជាពិសេសភាគីថៃនឹងកាត់បន្ថយរយៈពេលពីប្រមាណ៣ខែមកត្រឹម២សប្តាហ៍ចាប់ពីការស្នើសុំការប្រើប្រាស់ពលករបរទេស (កូតា) ដល់ការបញ្ជូនពលករមកធ្វើការព្រមទាំងកាត់បន្ថយបែបបទឯកសារដោយប្រើប្រាស់តាមប្រព័ន្ធអេឡិច-ត្រូនិកជំនួសវិញ» ។ ជាមួយគ្នានេះដែរលោករេដ្ឋមន្ត្រីបានជំរុញដល់សមាគមទាំងបីសហការគ្នាឲ្យបានស្អិតរមួត ដោយធ្វើយ៉ាងណាផ្តល់នូវការការពារសុវត្ថិភាពសុខមាលភាព សង្គមដល់ពលករកម្ពុជាដែលធ្វើការនៅប្រទេសថៃឲ្យកាន់តែមានប្រសិទ្ធភាព ។ លោករដ្ឋមន្ត្រីក៏បានស្នើសមាគមពិចារណាក្នុងការរៀបចំផ្ទះស្នាក់នៅបណ្តោះអាសន្នសម្រាប់ពលករកម្ពុជានៅតាមតំបន់ក្នុងប្រទេសថៃដែលអាចឲ្យពលករកម្ពុជាស្នាក់នៅបណ្តោះ អាសន្ន ក្នុងអំឡុងពេលប្តូរការងារ ឬរង់ចាំការដោះស្រាយវិវាទជាមួយនិយោជកផងដែរ ។
លោកអ៊ិត សំហេង លើកឡើងទៀតថា អនុស្សរណៈនៃការយោគយល់គ្នានេះ គឺជាវឌ្ឍនភាព និងយន្តការបន្ថែមថ្មីមួយទៀត ក្នុងការការពារដល់ពលករកម្ពុជាដែលទៅធ្វើការនៅប្រទេសថៃបន្ថែមលើកិច្ចការពារដែលមាននាពេលបច្ចុប្បន្នព្រមទាំងចូលរួមចំណែកក្នុងការគ្រប់គ្រងក៏ដូចជា ការការពារនូវសិទ្ធិសេរីភាព និងលើកកម្ពស់លក្ខខណ្ឌការងារដល់បងប្អូនពលករកម្ពុជាដែលកំពុងបម្រើការងារនៅព្រះរាជាណាចក្រថៃឡង់ដ៍ឱ្យមានភាពកាន់តែប្រសើរឡើង ប្រកបដោយប្រសិទ្ធភាព និងប្រសិទ្ធផលខ្ពស់ ។ លោករដ្ឋមន្ត្រីបញ្ជាក់ថា «ខ្ញុំស្នើសុំដល់សមាគមទាំងបីសហការគ្នាអោយបានស្អិតរមួតដោយធ្វើយ៉ាងណាផ្តល់នូវការការពារសុវត្ថិភាព សុខមាលភាពសង្គមដល់ពលករកម្ពុជាដែលធ្វើការនៅប្រទេសថៃឲ្យបានជាអតិបរមា និងសូមគាំទ្រនូវគម្រោងរបស់សមាគមទាំងបីដែលនឹងរៀបចំផ្តល់ជូនសេវាកម្មធានារ៉ាប់រងដល់ពលករកម្ពុជា លើការធានាគ្រោះថ្នាក់ការងារ និងអាយុជីវិតដែលស្របតាមអនុសាសន៍ដ៏ខ្ពង់ខ្ពស់ និងថ្លៃថ្លារបស់ប្រមុខរដ្ឋាភិបាលកម្ពុជា ។
ម្យ៉ាងវិញទៀតឆ្លងតាមបទពិសោធន៍របស់ក្រសួងការងារ និងបណ្តុះបណ្តាលវិជ្ជាជីវៈក្នុងការ គ្រប់គ្រងពលករខ្មែរនៅសាធារណរដ្ឋកូរ៉េខ្ញុំស្នើសុំសមាគមពិចារណាក្នុងការរៀបចំផ្ទះស្នាក់ នៅបណ្តោះអាសន្នសម្រាប់ពលករកម្ពុជា នៅតាមតំបន់ក្នុងប្រទេសថៃដែលអាចឲ្យពលករកម្ពុជាស្នាក់នៅបណ្តោះអាសន្នក្នុងអំឡុងពេលប្តូរការងារ ឬរង់ចាំការដោះស្រាយវិវាទជាមួយ និយោជក» ។
សូមបញ្ជាក់ថា សមាគមទីភ្នាក់ងារហត្ថពលកម្មកម្ពុជាសមាគមជ្រើសរើសពលករកម្ពុជា និងសមាគមទំនាក់ទំនងកម្ពុជា-ថៃ បានផ្តល់ជូនសេវាកម្មធានារ៉ាប់រងដល់ពលករកម្ពុជាលើការធានាគ្រោះថ្នាក់ការងារ និងអាយុជីវិតដែលស្របតាមអនុសាសន៍ដ៏ខ្ពង់ខ្ពស់ និងថ្លៃថ្លារបស់ប្រមុខរដ្ឋាភិបាលកម្ពុជា គឺសម្តេចតេជោនាយករដ្ឋមន្ត្រី ៕
ចែករំលែកព័តមាននេះ