រាជធានីភ្នំពេញ ៖ បុរសម្នាក់បើកបររ៉ឺម៉កម៉ូតូកង់បី ឆ្លងកាត់ទទឹងផ្លូវខ្វះការប្រុងប្រយ័ត្ន ក៍ត្រូវបុរសម្នាក់ទៀតបានជិះម៉ូតូជ្រុលទៅបុកចំពាក់កណ្តាលពេញ បណ្តាលរ៉ឺម៉កម៉ូតូកង់បីក្រឡាប់ផ្ងារជើងមួយចំហៀង ព្រមទាំងធ្វើអោយមនុស្សរងរបួសធ្ងន់ម្នាក់ និងស្រាលម្នាក់ ។
ហេតុការណ៍នេះបានកើតឡើងនៅវេលាម៉ោង៦និង៣០នាទីយប់ថ្ងៃទី៧ ខែវិច្ឆិកា ឆ្នាំ២០១៨ ជិតច្រកចូលសាលាខណ្ឌមានជ័យ ផ្លូវ៦០ម៉ែត្រ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
តាមប្រភព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេបានឃើញបុរសម្នាក់ជាអ្នកបើកបររ៉ឺម៉កម៉ូតូកង់បី បានបើកឆ្លងកាត់ទទឹងផ្លូវ ក្នុងទិសដៅពីកើតទៅលិច ក្នុងគោលបំណងទៅជួបជុំផឹកស៊ីនៅហាងមួយកន្លែងដែលនៅក្បែរនោះ ។
លុះរ៉ឺម៉កម៉ូតូកង់បីខាងលើឆ្លងជិតផុតទៅហើយ ស្រាប់តែមានបុរសម្នាក់ទៀតបានជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១១ ពណ៌ខ្មៅ ពាក់ស្លាកលេខ ភ្នំពេញ ១AY-២៧៩៤ ធ្វើដំណើរតាមផ្លូវ៦០ម៉ែត្រ ក្នុងទិសដៅពីជើងទៅត្បូង ក្នុងល្បឿនលឿនដូចហោះ បានជ្រុលទៅបុករ៉ឺម៉កម៉ូតូកង់បី ដែលកំពុងបើកបត់ឆ្លងផ្លូវ ចំពាក់កណ្តាលពេញទំហឹង បណ្តាលឱ្យរ៉ឺម៉កម៉ូតូកង់បីក្រឡាប់ផ្ងារជើងមួយចំហៀងកៀបជាប់គ្នាជាមួយម៉ូតូម៉ាកហុងដាឌ្រីម ព្រមទាំងធ្វើឱ្យបុរសជាអ្នកបើកបរម៉ូតូហុងដាឌ្រីមរងរបួសបែកក្បាល បាក់ដៃខាងឆ្វេងធ្ងន់ ត្រូវបានរថយន្តសង្គ្រោះមកដឹកយកទៅសង្គ្រោះនៅមន្ទីពេទ្យមិត្តភាពខ្មែរសូវៀត ។
ដោយឡែកអ្នកបើកបររ៉ឺម៉កម៉ូតូកង់បីវិញបានរងរបួសបែកក្បាលហូរឈាម តែមិនបានទៅមន្ទីពេទ្យនោះទេ ។
ក្រោយពេលកើតហេតុ ឃើញមានកម្លាំងសមត្ថកិច្ចប៉ុស្តិ៍នគរបាលចាក់អង្រែក្រោម ព្រមទាំងកម្លាំងជំនាញខណ្ឌមានជ័យ បានចុះទៅដល់កន្លែងកើតហេតុ រួចហើយក៍បានធ្វើវាស់វែងយកទៅម៉ូតូទាំងពីរគ្រឿងទៅរក្សាទុកនៅអធិការដ្ឋានខណ្ឌមានជ័យ ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ